Dagiti bannuar ken paan-anawa iti laban kontra COVID-19

ITA a panawen a ti Pilipinas ket adda iti “state of calamity” ken naideklarar ti enhanced community quarantine ti intero a Luzon gapu iti Coronavirus Disease 2019 (COVID-19) ket adu dagiti maibilang a bannuar iti pananglaban itoy a sakit, ngem adda latta dagiti paan-anawa a mangpadagsen ti problema.

Maibilang a bannuar dagiti adda iti gobierno ken pribado a tattao a tumultulong iti pananglapped iti panagraira ti COVID-19 nangruna dagiti frontliners – dagiti doctors, nurses ken dadduma pay a health workers; dagiti kameng ti Philippine National Police, Armed Forces of the Philippines ken dadduma pay nga ahensia ti National Government ken lokal a gobierno ken barangay; ken dagiti pribado nga umili a makikaykaysa iti gannuat ti gobierno.

Addan 10 a pimmusay a doktor ti medisina iti pannakaakarda iti COVID-19 gapu ti exposure-da iti pannakataming dagiti pasiente a positibo itoy a virus. Sabali pay dagiti nagduduma a health workers a naakaran iti virus iti panangtamingda kadagiti pasiente ta kurangda kadagiti personal protection equipments.

Nakasaysayang dagiti natay nga agkabannuag a doctors nga espesialista. Adu a panawen, rigat ken resources dagiti nabusbosda tapno laeng makapagdoktor ken makapag-espesialistada. Ngem iti ayatda a mangispal iti biag ket bukodda met a biag ti imbuisda.

Napateg ti serbisio dagiti health workers iti agdama a panawen gapu iti kaadu kadagiti ospital dagiti pasiente a maibilang a persons under investigation. Adun nga ospital idiay Metro Manila dagiti saanen nga agawat kadagiti pasiente nga addaan kadagiti sintoma ti COVID-19 ta napunnon dagiti isolation facilities-da.  

Iti panagadu dagiti pasiente, bumasbassit met ti bilang dagiti agserbi a doctors ken health workers ta umad-adun dagiti ma-quarantine kalpasan ti exposure-da kadagiti nagpositibo iti virus. Maibilang kadagiti nag-self quarantine ni Health Secretary Francisco Duque III gapu ti pannakilangenna iti maysa nga opisial ti Department of Health a positibo iti COVID-19.

Mabigbig met a bannuar dagiti polis, soldado ken dadduma pay nga agserserbi iti gobierno a 24/7 a mangmanmanehar kadagiti checkpoints ken mangipatpatungpal ti curfew kadagiti nagduduma a lugar iti Luzon. Iti panangipakatda a nainget kadagiti pagannurotan nangruna dagiti screening protocols ket mabalin a maakaranda met iti COVID-19 nangruna ta agkurangda kadagiti usaren a personal protection equipments ken adu latta nga umili dagiti nasukir kadagiti pagannurotan. Nagpositibo iti COVID-19 ni AFP Chief of Staff General Filemon Santos ken sumagmamano a militar.

Iti panagpaut ti lockdown iti Luzon, adun dagiti polis ken soldado kadagiti checkpoints ti kimmapsut ti resistansida gapu iti bannog ken puyat iti panangipatungpalda kadagiti checkpoints ken curfew iti agmalem ken agpatnag. Adda dagiti polis ken soldado a nagpositibo iti COVID-19 ket mabalin nga umadu pay ti bilangda.        

Mabigbig met a bannuar dagiti kameng ti media a mangidandanon kadagiti pudno a damag, ken dagiti pribado nga umili nga agserserbi iti pannakaidanon dagiti taraon ken kangrunaan a kasapulan dagiti tattao, ken dagiti amin a natudio ken tumultulong iti pannakaipakat dagiti pagannurotan ken panangsuportada iti gobierno.

Adu met latta dagiti nasukir a paan-anawa nga opisial ken agserserbi iti gobierno ken pribado a tattao gapu iti panaglabsingda kadagiti pagannurotan tapno malapdan ti panagraira ti virus. Narurod ti management ti Makati Medical Center ken ni Sen. Aquilino “Coco” Pimentel III a nakompirman a positibo iti COVID-19, gapu iti ipapanna iti ospital a nangkuyog iti naganak nga asawana. Nagreklamo ti MMC iti inaramid ni Sen. Pimentel ta uray saan pay idi a kompirmado a positibo iti COVID-19 ket nagpa-test isunan ket maibilangen a person under investigation a rumbeng a naka-self quarantine. Napan pay ti Senador naggatang pay iti maysa a dakkel a grocery. Mapagam-amkan nga iti inaramidna ket mabalin a nayakarna ti virus kadagiti nakapulapolna.

Kalaksidan ken ni Sen. Pimentel, dua pay a senador dagiti nakompirmaran a positibo iti COVID-19 – da Juan Miguel Zubiri ken Sonny Angara nga agpada a naka-self quarantine.

Nakalkaldaang ti inaramid ni Sen. Pimentel ta iti laksid a maibilang isuna a “lawmaker” ket nagbalin a “lawbreaker” kadagiti pagannurotan tapno malapdan ti panagraira ti COVID-19.

No maaramid ti maysa a kameng ti Kongreso ti nagsukir kadagiti pagannurotan, saanen a nakaskasdaaw nga adu dagiti kadawyan nga umili dagiti saan nga agtungpal kadagiti pagallagadan kabayatan ti enhanced community quarantine iti Luzon. Saanen a nakaskasdaaw no adda dagiti natiliw a drayber dagiti taxi ken tricycle dagiti agpilpilit nga agpasada tapno adda masapulanda nga igatangda iti pagbiagda ken dagiti pamiliada.

Ita a panawen a sumangsango ti Pilipinas iti krisis gapu ti panagraira ti COVID-19, agbalin koma amin a Pilipino a paganninawan ti kinabannuar babaen ti panangsurotda kadagiti pagallagadan tapno mapaksiat daytoy a mapagbutbungan a virus a nangkettelen iti adu a biag.