Dagiti biktima ti pannakalmes, sirena ti akingapuanan?

Ni Jose Ed. Sajonia

Kas insalaysay ni Mrs. Jesusa Imperio-Villaruz, Brgy. Quimmallogong, Sinait, Ilocos Sur.

 

ALAS TRES ti malem ti Disiembre 24, 2010, bisperas ti Paskua,  idi nagturong da Jenriel Villaruz, ama, ni Malaya, inauna nga anakna, ti buridek a kibinna,  ken ni Sandra a kaanakanda, anak ti kabsat ti asawana a Taga-Cagayan. Nagluganda iti traysikel a napan iti igid ti baybay a masakupan ti Barangay Pug-os, Sinait, Ilocos Sur.

Mangisursuro ni Jenriel iti Don Leopoldo Yabes Elementary School, sigud a Pug-os Elementary School ket no bakasion, pagduyosanna ti mapan iti igid  ti baybay nga agpidut iti pino a batbato ken buttiki nga iyarkosna iti arubayanda. Masansan nga itugot ni Jenriel ti kameng ti pamiliana ken pasaray ni Jesusa nga asawana.

Medio naatab ti baybay ket iti ababaw laeng ti igid ti napanan  nagpisawpisawan da Malaya ken Sandra. Nagpidut met da Jenriel ken ti buridek iti pino a bato iti igid.

Di mabayag, dimmuklos ti napigsa a dalluyon a nangguyod kadagiti agay-ayam iti danum nga ubbing. Naglagaw ni Jenriel ket ginandatna a tulongan dagiti malmalmesen  nga ubbing.

‚ÄúGet help, anak!‚ÄĚ imbagana iti¬† inaudi nga anakna a napataray iti kigtotna.

Dimmenden ni Jenriel  iti kaallonan. Ngem  sinallukoban ida ti ulo-ulo ti dakkel a dalluyon ket ditan a nagpukawda iti kadanuman!

Immarayat dagiti agindeg ket nagturongda  iti baybay. Inkarigatan dagiti makabael nga aglangoy a binirok dagiti nagpukaw a tallo a biktima. Idi agangay, nariparda ti dua a timpaw nga ubbing iti di adayo ti pagburakan ti dalluyon. Awan a nakitada ti ama.

Intaray dagiti immarayat dagiti ubbing iti maysa nga  ospital iti ili ti Cabugao ngem daksanggasat ta pimmusayda gapu ngatan ti  pannakapadsoda  iti napaut bassit a pannakalmesda!

Naglabbet ti pannakabigla ken leddaang  ti pamilia, gagayyem, am-ammo ken kakabagian  dagiti maseknan a nabiktima. Insamirada a binirok ti bagi ni Jenriel iti aglawlaw a kadanuman ti pattapatta a nakalmesanna no kas pangarigan.

Segun ken ni Uliteg Andring (Alejandro Castillo  del Rosario, 62, agnaed ti kaamaanna  iti asideg ti baybay ken nakipag-arayat kadagiti nalmes), timmulong pay dagiti frogmen ti coast guard a nangarinsawad ti kabaybayan ti Pug-os, Cabugao-Sinait, ngem saanda a nakita ni Jenriel. Linawlawda pay a linangoy ti aglawlaw ti dakkel a bato iti adalem a paset ti baybay a batog ti mapattapatta a nakalmesanda ngem awan latta.

Adu dagiti nagboluntario a nangisakripisio ti orasda a nagbirok ken nagwanawan iti baybay ken nangpadaan iti itatapaw ti bangkay no kas pangarigan awan metten ti gasatna, ngem awan met latta.

Kinuna ni Mang Andring nga iti oras ti alas tres met laeng iti sumuno nga aldaw (Disiembre 25 a kaaldawan ti Paskua), addada ken dagiti kakaduana iti igid ti baybay. Nagkintayegda idi mariparda ti nagbukel a nangisit a banag a kasla a maidurduron manipud paglukotan ti dalluyon iti tengnga sa ipapaigid ti allon. Kasla adda mangidurduron itoy a nangisit a banag!

Adu ti naklaat ken di mamati a ti gayam ulo ni Jenriel a tumtumpaw ti maidurduron a nangisit a banag iti danum. Inalawda ni Jenriel sada intakdang.

Dandani dida mailasin ti  langa ti nalmes a mangisursuro! Limnek dagiti dua a matana. Adu ti dunor ti rupana.  Ti pakasdaawan da Uliteg  Andring, 24 orasen a nalmes ni Jenriel ngem saan man la  a bimsog ti tianna kas gagangay a mapasamak iti nalmes agsipud iti kaadu ti mainomna a danum.

Adu ti mamati a biniktima ti sirena ni Jenriel ta adu ti padana met a nalmes a mapapati a  kinursonada ti sirena iti kallabes a tawen iti daytoy a paset ti baybay.

(Maigibusto)