Footer

Dagiti Gaud ti Biag: Kararag ken Trabaho

ADDA dagiti gundaway iti panagbiagtayo a kapilitan nga agdesisiontay iti aramidentayo iti sanguanan ti nakaduyyayat a problema. Kas koma iti maysa a panawen ti biagmo a masarakam ti bagim iti nagsangaan ti dalan. Dimo ammo ti surotem. Agpakannigid? Agpakannawan? Masaludsodmo iti bagim: Ania ti agur-uray kaniak iti ungto ti dalan no surotek ti kannigid wenno ti kannawan?

Iti daytoy a gundaway, kapilitan nga ikeddengtayo ti pagturongantayo. Awan ti makarisut iti problematayo no saan a datayo laeng.

Kastay kunadan, maysa a mangliwengliweng a taaw ti biag ken gauden ti tunggal parsua ti bukodna a bangka tapno makaballasiw ken makadanon iti destinasionna.

Saan kadi a no dadduma, masaludsodtayo iti bagitayo: Ania ngata ti nagbalinak no saan a kinamaestra ti innalak? Wenno naasawak ngata ni Maring no impettengko ti napan nangged iti siudad?

Wenno saan, kunatayo: No koma…

Wen, no koma, diak nagballog idi agbasbasaak, saannak koma a kargador laeng iti tiendaan. Maysaak koma a superbisor ti maysa a pasdek-negosio.

No koma diak nagpaadipen iti droga, saannak koma a drug addict a lumlumoten iti rehabilitation center. Maysaak koma a mangop-opisina iti kapitolio wenno iti munisipio.

No koma diak kinalkalbit ni Mayyang, saan koma a nagtungpal a nasikogak. Agpadakami koma ita a mangisursuro iti ilimi. Saan koma nga aglaklako iti turon ken bibingka ken saannak koma a peon laeng iti maysa a kontraktor.

Iti apagdarikmat wenno apagkanito, mapalusposantayo ti balligi gapu iti apagapaman a panagkitakittayo wenno iti saan nga umisu a pangngeddengtayo.

Agbabawitayo ngem saantayon a mapasubli ti dimteng a gundaway a mangitunda kadatayo iti naranraniag a masakbayan.

Kasta ti biag.

Nupay kasta, saantayo koma nga agpulkok lattan no napuglay man ti arapaaptayo gapu iti maysa a biddut wenno panagliwaytayo.

Agbalin koma ketdi dayta a pannakapaay a sinagraptayo a paratignay tapno baliwantayo ti umaddang, rugiantayo a wayaan ti nasiit a dalan a naturongtayo kalpasan iti pannakaisiasitayo iti nagsangaan ti dalan.

Agingga iti adda angestayo rumbeng a saantayo a rumukma kadagiti pannubok iti biag nga agpanggep a mangibual iti kinatibkertayo.

Ditoy ti pakasuotan ti kinataotayo.

Ti pudno a malalaki, tumurtured, tumibtibker no ad-adda a masugatan.

Ti takrot, agsanuden iti umuna pay la a pannakalak-amna iti pannakapaay.

Ngem ditayo koma iwalin ti kinapudno nga adda Naindaklan nga Ima a kibintayo. Uray sadino man a papanantayo, adda latta iti sibaytayo, madadaan a tumulong kadatayo iti panawen a seknantayo iti ngatangata ken duadua. Adda latta a madadaan a mangibuat kadatayo no ditay kabaelan nga iyaddang ti sakatayo gapu iti kawatiwat ti pinagnatayo wenno gapu kadagiti kibbakibbakol a dalan a naglasatan ken dagiti nasang-at a bantay nga inulitayo.

Imuriantayo ti estoria ni Bishop Tikomer Toth.

Nagbalin a pasahero ti maysa a lakay a mangngalap ti maysa nga agtutubo. Paitulod iti kabangibang a puro.

Nakita ti agtutubo a naikitikit  ti balikas a “kararag” iti maysa a gaud. Naikitikit met ti balikas a “trabaho” iti maysa a gaud.

Manglalais ti timek ti agtutubo: “Awan, maudikan, lakay. Ania ti pakasapulan iti kararag no madama ti panagtrabahom?”

Saan a simmungbat ti mangngalap. Inibbatanna ketdi ti gaud a nakaikitikitan ti “kararag” ket ti laeng maysa a gaud ti inaramatna. Gaud a gaud ngem awan ti progresoda ta nagrikosrikos laeng ti bangka.

Naawatan ti agtutubo a malaksid ti gaud ti “trabaho”, kasapulan ti gaud ti “kararag” tapno makadanonda iti destinasionda.

Ania ti maagsawmo kalpasan a naungpotmo a basaen daytoy, kailian?

Nabileg ti kararag, dimo pagintutulngan. Kas kunada: paggarawen ti kararag ti bantay. Lussokenna ti langit. Paluknengenna uray pimmamulinawen a puso. Lunagenna uray katangkenan nga asero.

Ngem ditayo koma met lipatan ti mangiruknoy iti kararag ti panagyaman iti kanito a magun-odtayo dagiti arapaaptayo iti biag. Wenno iti pannakadanontayo iti tapaw ti balligi. We should be humble to praise God in victory…#