sinursuran-banner-sqSinursuranNi Jobert M. Pacnis

Dagiti I-Gers

Sinursuran: Kolum ni Jobert M. Pacnis
(Maikadua a paset)

Apay nga iGeneration? Apay a saan koma a Generation Z kas sumaruno iti Generation X ken Generation Y?

Kinapudnona, nagbibinnutosan dagiti eksperto iti sikolohia no ania ti panga-wagda iti agdama a henerasion. Dua ti naikonsidera iti lamisaanda: iGen wenno Gen Z. Ket nangabak ti iGen.

Ania ngarud dayta iGen? mabalin ita a saludsodem.

Iwarasmo ti imatangmo iti aglawlaw. Nagadu nga i’s a masaksiam, saan kadi? iPod, iPad, iTune, iTouch, iPhone ken dadduma pay. Internet, mabalin pay. Instant foods. Dagita ti namunganayan ti iGen.

Iti nagkaadu a ramit ita a pakakumikoman dagiti iGeners, kasla man nakakas-kasdaaw kadagiti kameng ti dadduma a henerasion (aglalo dagiti traditionalists, baby boomers ken Gen X). Masdaawda iti kasla di pannakabannog dagiti iGeners iti panagkuditda kadagiti gadgets-da.

Saanen a nakakaskasdaaw dayta. Saguday dagiti iGen ti kina-multitaskers-da wenno kinaadu ti ar-aramidenda. Saanda a kayat ti aglawlaw a kas iti aglawlaw a pagaayat dagiti traditionalist, baby boomers ken Gen X.

Kinapudnona, iti panagadal, nagadu nga oras ti ib-ibusen dagiti iGen iti ikub dagiti nadumaduma a gadgets-da. Dagiti agtawen iti 4-8, mapan kano nga 6 nga oras; edad 9 – 12, 10 oras; edad 13 – 15, 16 nga oras; idinto a 21 nga oras dagiti agedad iti 16 – 18.

Imposible dayta 16 ken 21 nga oras?

Posible dayta. Kitaem dagiti iGen ket uray nakaturogda, adda pay laeng a nakaselsel kadagiti lapayagda ti headset-da. Im-imasenda a timuden dagiti livestreaming wenno dagiti in-download-da a samiweng.

Isu a saanen a nakakaskasdaaw a nalalaing itan dagiti ubbing wenno agtutubo ngem kadagiti nagannakda no gadgets ti pagsasaritaan. No ti Generation X, kitaenna nga umuna ti manual ti ginatangna a ramit, ti iGen, iselselna a dagus dagiti connector kadagiti makitana a port. Iti laeng sumagmamano a kanito, kasla henio dagitoyen a mangkudit-kudit iti gadget.

Kuna ngarud ti panagadal, kasla addan a nayimbed/naikapet iti isip dagiti iGeners ti siribda iti teknolohia uray sikogda pay laeng. Saan ngaruden a nakakaskasdaaw no kastanto laengen ti laingda a mangmanipolar kadagitoy nupay awan ti pormal a pana-gadalda.

Isu a kaaduan kadagiti iGeners ti saan laeng a maymaysa ti gadget-na. Laptop, iPad, iPod, iPhone ken dadduma pay. Isu a matda laeng dagiti nagannak nga ag-iPaid.

Ngem ketdi, kuna dagiti eksperto, saan a rumbeng a lapdan, paritan dagiti iGeners iti panagaramatda kadagitoy a ramit. Iti kinapardas ti pannagna, panagdur-as ti teknolohia, ad-adda laeng a mabatida iti langalang no “wish knowing-da” kadagitoy. Didanto pulos makakamat iti panawen no kasta. Didanto maragpat ‘tay nam-ay no saanda a pamiliar kadagitoy nga adda iti aglawlawda.

Ita a panawen ti iGen, nauso ti selfie (panangala iti bukod a ladawan) kada groufie. Amin a selfie ken groufie, saan a kumpleto no di mayupload iti peysbuk, twitter, instagram ken dadduma pay. Amin nga ubraen, ar-aramiden dagiti iGeners, maikannawag iti social media. Awan makalusot.

Isu ngarud a kuna ti maysa nga eksperto, “privacy” is a word gone by. Dayta ti nakadadanag. Awanen ti mailemmeng iti kinatao. Nalakan a siimen, suroten, siputan ti kayat a paliiwen.

Ngarud, mayannatup laeng ti pannakaawat dagiti nagannak iti garaw, aw-awid dagiti iGeners tapno maaddaan iti naannayas a relasion, ken lubong, iti nagbaetan ti nagduma a henerasion. Ken ania koma ngarud ita ti serbi ti impakabit a wi-fi iti pagtaengan no paritan met ida a kumonekta? Ania ti serbi dagiti ramit a ginatang no ungtan ida a mangusar kadagitoy?

Ti laeng yanna ita nga aramiden dagiti nagannak, isu daytay nainkabsatan a panangtarabay kadagiti iGeners. Agbalinda koma a nalablabes pay ngem kabsat kadagiti annakda. Itoy a wagas, saanto a pulos nga agrebelde dagiti annak; ipudnoda ti ania man a mapaspasamak kadakuada.

Kuna dagiti eksperto, iti udina, dagitoy nga iGeners ti mangitag-ay kadagiti nagannakda. Iti kinaabilidadda, saan a karkardayo kadakuada ti panangballigida iti masanguanan.

Kamaudiananna, nayanak man iti henerasion dagiti traditionalists, baby boomers, X wenno Y, ken i, agpapada ti amin nga agnanaed iti agdama a henerasion dagiti iGeners.

Saan koma ngarud nga ipalubos a dagitoy a panagduduma iti henerasion ti mamagsayyasayya ti tunggal maysa, aglalo iti uneg ti pagtaengan.
Give and take a kunada iti Ingles, ti solusion ti amin.#