Footer

Dagiti Labid iti Nagkurusan (Maikadua a paset)

Pagammuan ta adda nangtukma iti kullapit a takiag ni Baket Insiang. Ni Lakay Pulikin, ti sobsobra ti angkit nga asawana.

“Addaka man ditoyen a makitsistsismis a bakbaketan. Awan pay madanonan a pammigat ti aggapu iti talon. Ammom met a kapadesen ti panaggagatud. Ala, agawidka!” immandar ti lakay. Kinautna ti bassit a kahita a naikabit iti barikesna. Nakarikna siguro manen iti panagkupit ti barukongna isu a nangkaut iti agasna nga ashmasolon.

“Ne! Panawanka pay, Atanud Itang, ta narigat ti madapig,” kinuna ni Baket Insiang sa immunan a nagna a sarsarunuen ti kasla abal-abal ti angesna nga asawana. Nabati met nga agsipsipat nga agkatkatawa ni Baket Itang a kasla ubing a maray-aw iti idiar dagiti agassawa nga agpadpadaya.

Inkanayonko metten ti timmakder ta napasungadak ni Aira, tay kaeskuelaak iti Gred payb a kaarrubami met laeng. Apagisu a naglukaten ti computer cafe iti ballasiw ti kalsada. Awisek man laengen ta mapankami agay-ayam iti farmville.

Apagisu nga ipukkaw ni Manong Delfin a nalpasen ti orasmi iti computer idi adda mangngegko a riaw manipud iti waiting shed. Diakon intuloy ti nagpaplas payb ket ginuyodkon ni Aira tapno mapanmi kitaen ti mapaspasamak.

Apagdanonmi iti waiting shed a napno iti usioso, nadlawko a dagus ti lumablabbaga a pispis ni Baket Itang. Kasla napapispisan. Makaliblibbi pay.

“Apay, inan-anodan ni Baket Itang?” sinaludsod ni Nanang a maysa gayam kadagiti naitallaong. Umaynak ngata koma biroken isu a nagpakrosing.

“Ayna, kunam aya, komadre, ket tinapak ni Toniong!” insungbat ni Anti Myrene a madama nga aggadgadgad iti yelo para iti lakona a halohalo.

“Ne, apayen? Di la nakakaasin dakayo?” pinampag pay ni nanang ti barukongna.

“Kastoy dayta, komadre,” insagpaw ni Angkel Simo a traysikelan. “Agtugtugaw itay dita ni Baket Itang dita waiting shed a nangpanawan ti besprenna a ni Baket Insiang. Idi kuan, simmangpet ni Toniong ket nagtakder dita waiting shed a nakatalikod kadayta baket. Bigla lattan nga imbaba ni Baket Itang ti shortpan ni Toniong ket nakitan a tay tallo ti abotna a kansonsiliona,” insalaysay ni Angkel Simo a makakatkatawa idinto a kasla pay laeng nakatukno’t atang ti baket a mangsarsarapa iti pispisna.

“Ket?”

“Ket ania pay koma, tinapak a ni Toniong ta pispis ni Baket Itang isu a kaslan pauraga a baka ti rungaabna,” agkatkatawa met a binagi ni Anti Myrene.

“Inangawko laeng ti laglag,” agsasaibbek a kinuna ti napapispisan.

“Ania ti kuna ngarud ni Toniong?” insalpika met ni Baket Insiang a kasangsangpetna. Nadamagna siguro ti napasamak isu nga adda ita ditoy. Dinagusna a napan inapungol ti besprenna.

“Ti kunana? Ay! Naaremka pay met gayam a bakbaketan!” inyayug ti drayber ket nagkakatawa amin a tao iti waiting shed. Pati dakami ken ni Aira ket naisurot a nakipagkatawa. Ad-adda la ket ngaruden ti saibbek ni Baket Itang a kasta unay ti kusilapna kadagiti immaribungbong.

Saan a rimrimmuar ni Baket Itang iti sumagmamano nga aldaw.

“Nagnakem siguron,” kinuna ni Nanang. “Agasem met ngamin ti mapapispisan aya. Siguro, agsardeng metten nga aglablabilab iti di mangan-ano.”

Ngem iti  malem ti sumuno a Sabado  bayat ti igagatangko iti sitsiria iti bassit a  sari-sari store iti krosing, napasungadak ni Baket Itang a kaduana ni Baket Insiang. Napanda manen nagpuesto iti waiting shed. Manipud iti ayanko a gumatgatang, nalawag a mangngegko ti saritaan dagiti “komentarista”. Idi laeng a nadlawko  nga adda gayam badang nga igpil ni Baket Itang. Mabuteng ngatan a mapapispisan isu nga addan armasna.

“Ay, adda kad’ ipadamagko, atanud,” nangngegko a kinuna ni Baket Insiang.

“Ania dayta? Naudin sa met dataon yos, “ medio naspig ti isem ni Baket Itang. Kasla saanna a maawat a naunaan iti “kaudian a damag”.

“Ay! Wen gayam ania? Makalawas a tinarakenmo dayta limteg a pispismo. He! He!”  inkatawa ti baket a nakuttong ngem saanna nga intuloy ti nagpaggaak  ta immatiddog ti subsob ni Baket Insiang.

“La, istoriaemon.”

“Kastoy nay, atanud. Ni mistra Onor dita Cabsil Community School, nakitak nga inlugan ni Mistro Cesar iti kotsena a volkswagon, sika…” imbitin ni Baket Insiang.

“Saan ngata nga adda relasionda, atanud?” kasla napagustuan a maed ni Baket Itang iti naammuanna.

(Adda tuloyna)