“Ngem di met kasadodan a dua? Dida la mabainen? Pwe!” intanupra ni Baket Itang.

“Talaga a nagatel ni daydiay a mistra.”

“Sino ti nagatel, Nana?” kasla mangukop a karasaen a nakasagana a tumukkaw ni Ma’am Onor a saanda gayam a napuotan nga immasideg.  Panagkunak, nangngegna amin a sinasao dagiti dua a tsismosa.

A! e! kua… addaka gayam dita,” indueto da Baket Itang ken Insiang a kaslada nasibugan iti nalamiis a danum.

“Ania ti ibagbagam, Nana Insiang nga adda relasionmi ken ni Sir Cesar? Wen, nakikaluganak kenkuana idi naminsan nga aldaw ta nakigiddanak a nagpakabisera. Paunayka metten a bakbaketan, ibagbagam ketdin nga agkamalalakami!” dandani idugsol ni Maestra Onor ti tammudona iti rupa ni Baket Insiang.

“Saan a sika, mistra,” medio agtigergeren ti bibig ti naitudo. Mangrugi metten nga agmarangmang dagiti tao iti waiting shed.

“Wen, saan a sika, ma’am,” impapainayad met ni Baket Itang.

“Ta siak pay la ti iyaw-awanmo iti tengnga ti aldaw, sika a baket a tarabitab! Pinapispisandaka la ngaruden gapu iti panangibabam ti shortpan, sika pay laeng ti adda ganasna a mangibaga a nagatelak!” no palausen ti manarita, umasuken ti agong ni Ma’am Onor.

Nagtalinaed a kasla natuktokan a bisukol dagiti dua a baket. Saanda siguro a namnamaen a maitured ida a pagsawsawan ni Ma’am Onor.

“Tandaananyo, uray pay babbaketkayon, rubirobek dagita nabunglog  a ngiwatyo no didak sardengan a pagtsistsismisan. Naawatanyo?” intudo pay ida naminsan ni Ma’am Onor sana tinallikudan dagiti babbaket a kaarig natilmonda itan dagiti nagsiping a dilada.

Ngem saan latta a naleksion dagiti babbaket a tsismosa. Agalas sais pay laeng iti sumuno a bigat nakatungrarawen ti uloda iti labes ti saan unay a nangato nga aladmi bayat ti panagsagsagad ni nanang iti paraanganmi. Dagitoy ketdi a babbaket ta pamigatda manen a pagestoriaan ti biag ti akinbiag, nayesngawna.

“Talaga a nasukir dayta Jovita a balasangmo, sika Josing. Agasem, kalkalpasna laeng iti hayskul, nangasawan!” nangngegko a kinuna ni Baket Itang.

“Wen nasapa a nagutso-otso,” impasaruno ni Baket Insiang. Nasapa ngamin a nangasawa ni Manang Jovita ket makipagnanaedda ita ken Manong Marino iti balaymi.

“Anak la ti anak a, nana. No nailaw-an a ket masapul latta a tulongan,” insungbat ni nanang.

“Ay, naanuska man. No siak a ket diak ida awaten iti balaymi, pwe!” intanupra manen ni Baket Itang.

“Pagtalawem ketdin, Josing. Awan serserbina nga inanak,” insegunda ni baket Insiang a nangpaatiddog pay iti immusuos a subsobna. “Laksidem idan, Atanud!”

“Dayta ti saanko a maaramid, Nana Itang,” insardeng ni nanang ti panagsagadna ket sinangona dagiti dua. “No nakayam idi a binaybay-an tay anakmo nga addaan rangkap, saan kaniak, nana. Aniaman ti pagbiddutanda, awatek ken tulongak ida a bumangon iti nakaitublakanda,” mangrugin a ngumato ti timek ni Nanang.

“Hah! martirka a Josing no kasta,”  naginnapir pay dagiti dua.

“Diay ketdi koma anakmo, Nana Itang, a nangmolestia iti aglaklako iti laya a taga-Cagayan ti rumbeng a laksidem. Apay ngay a napanmo idi inareglo iti siento beinte mil tapno saandan nga idarum? Dika pay la binay-an a malungsot iti pagbaludan tapno saanen a makapaltog iti panay met ngad padamgis. Ita, saanmo met a mapan isuko no  di ilemlemmengmo. Ipadpadamagmo pay nga inggatangam iti shotgunna tapno dida magaraw. Nalawag a panangkonsintir dayta, saan kadi, Nana?” nadagsen a palagid ni nanang.

Hay, no isuda idi ti nangiyab-abog ken ni Manang Jovita ken  ni Manong Marino. Isuda pay idin ti makisangsango no kasdiay nga umay  idi agpasiar iti sardam. Arigna isudan ti nangsungsungbat iti wen iti agar-arem ta isuda met ti nangnangruna a nangkakaan iti agduduma’t klasena a tsokolate a regalo ni manang. Ita ketdin ta nailaw-an dagiti dua kastan ti ibagbagada. Awan a talaga ti manaknakem dagitoy.

Manipud iti siledda ken manang, bigla a rimmuar ni Manong Marino. Kuso pay laeng ti kulot a buokna. Nalabit a nalukag iti ingangato ti timek ni nanang. Saan sa  a nasiputan dagiti tsismosa ta mayat pay laeng ti katkatawada. Naladawen idi nadlawda  ni Manong Marino nga asidegen  iti ayanda. Sakbay a nakagunay dagiti dua a babbaket, nagdisson ti gemgem ni kayong iti pagigupda iti digo. No diak maallilaw, tay pimmirak a pustiso ni Baket Insiang ti naipalladaw itay manipud iti ngiwatna!

(Adda tuloyna)