Footer

Dagiti Labid iti Nagkurusan (Maudi a paset)

Kalpasan ti tallo nga aldaw a panagsuyotda, adda manen iti waiting shed dagiti dua. Gapu ta bakasion metten iti eskuela, masansan ti kaaddak iti krosing ta maganasko metten ti agay-ayam iti farmville iti Facebook. Maysa pay, ditoy ti ayan dagitay mamerienda kas iti miki, barbekio ken halohalo. Adu pay ti mangngeg nga estoria.

“Ayna, addan sa nangpayugpog kadata, atanud,” kasla napaksuyan pay laeng ti timek ni Baket Itang.

“Kasla ngarud kasta, sika. Sangarakem a diatabs ti nainumko ngem di met pimmipia. Idi nagangerak iti ukis ti kayo ti lumboy, ay, ket naminpinsan a nagtalna ti diables a sakit ti tian,” insungbat ni Baket Insiang. Iti panagkitak, lalo pay a kimmuttong kalpasan ti tallo aldaw a panagpasikalna.

“Ay, agpadata. Nagangerak met iti punnuot ti ramut ti balayang ket isu ti inin-inumko. Inanusak ti sugpetna ta awan met ti epektona diay made in Saudi a polymagma. Isu ti nalagipko a kuna daydi Dios ti aluadna  a Baket Silling a mangngagas,” madlaw ti rurod iti timek ni Baket Itang.

“No dinto met nangipan iti asin da Danny iti rabaw ti lamisaan. Nasamay kan’ daydiay a pangsukal iti gamud iti dayaan.”

“Maammuak laeng no asino dayta nga adda balinbalinna ta kitaek no diak ipatiliw ti kararuana iti surkano!”

“Ipupokmo iti uneg ti bote ti sammigel kunam, atanud”

“Ay, narigat la ti agsasao ngem adda pattapattak a daydiay kasangsangota idi a pada a baket ti makin-aramid. Natadem ti panagmatmatana ni daydiay, atanud,” kinuna ni Baket Itang.

“Immapal ngata kadagita singsingmo ken kadayta aritosmo nga ar-aruy-oy,” kinita ni Baket Insiang dagiti alahas ti besprenna a kaslan aghepa iti kinakiawna. Dina met nga’d bagay ta kasla aglanglangan a mamasang iti balay pagraragsakan.

Ania ketdin ‘ya dagitoy a babbaket, nakunak iti nakemko. No naglawagan a gapu iti kaadu ti nakanda ti makaigapu iti panagsakit ti tianda, ita pabasolendan diay kinasangoda a nanggamud kaniada. Timmakderak ket nagpadayaakon ket napanak  nakiay-ayam iti langit lupa kada Aira.

Pinukkawannak ni nanang. Nagteks kano ni Manang Jovita a mapankami iti krosing ta iyawidmi dagiti kargada. Madama kan’ a sangsangatenna dagiti agpartner a babbaket.

Pinidutko ti ismagelko nga ispartan ket nagdardarasakon a napan kimmamakam ken ni nanang a kaslan di makaanak a pusa a nagtaray nga agpakrosing. Napnon iti tao ti waiting shed. Kasla adda siuting iti pelikula ni Sharon Cuneta.

“Agsaganakayo ita a dua a bakbaketan ta siak ti mangputed  kadagita nagatel a dilayo!” nadanonmi nga ipukpukkaw ni Manang Jovita.

“Ay, awan ti sinasaok a kasta, nakkong, uray makimat ni Atanud Insiang,” insapata ti labilab a baket.

“Ayna, saanka nga agkasta, atanud, ta dakes ti agisapata,” napatandaan pay ti nainaganan.

“Awan ti imbagayo nga adda um-umay mangkalkallong kaniak no kasdiay nga awan ni lakayko? Ibagbagayo pay a kuartana ti gasgastuek a mapan makisinnarak. Agsaganakayo ta dandani itan dagiti pulis nga inayaban ni Marino. Ipabaludkayo!” simmingkiten ti mata ni manang iti pungtotna.

“Ay, dika agkaskasta, nakkong, ta awan ti pammaneknekmo nga adda sinaomi a kasta. Amangan no sika ti ipapulismi,” medio naallangon sa ni Baket Itang ti riknana ket nagbaniekes pay.

“Siak pay itan ti pagbalinenyo nga agparparbo iti sarita! Anti Myrene, umaymo man paneknekan ti sinasao dagitoy tarabitab a babbaket,” impukkaw manen ni manang.

“Wen, ayabannakto lattan nga umay agsaksi, Jovita. Aggadgadak man pay iti yelo ket ne, adu ti kustomer no kastoy nga adda drama ditoy krosing,” inkatawa ti aglaklako iti halohalo.

Adda nagsardeng a lugan iti sango ti krosing. Ni Manong Marino. Adda kaduana a dua a pulis ken maysa a napugot a lalaki nga adda iggemna a tape recorder. Nakalawlawag a mabasa ti naimarka iti likudan ti tsalekona ti “KOMANDER ANTOKOY,  MR. INBESTIGADOR”.

Kasla naperresanen a lagdaw da Baket Itang ken Baket Insiang. Saanen nga ang-angaw daytoy ta addan dagiti pulis iti sanguananda. Adda pay reporter a mangkober iti pannakatiliwda.

“Pakawanennakami, nakkong Jovita, balasangko. Dinakami kad’ la ipapulisen  ta kababain. Saanminton nga ul-uliten, nakkong, pangngaasim,” induetoda a kasla agleksio iti Semana  Santa sada nagparintumeng iti sango ni manang a mangmesmesmes pay laeng.  Impunas pay ni Baket Itang ti butegna iti gayadan ti bidangna a tualia.

“Ay, saandak a maalan iti kasta, dakayo a nalaing a mangparpardaya. Itan ti tiempo nga agnakemkayo. Ala, Sarge Ventura, tiliwenyon dagitoy dua a bakbaketan. Sumarunokami ken lakay sadiay prisinto,” kinuna ketdi ni Manang Jovita.

Awan naaramidan dagiti agbespren idi kibinen ida dagiti pulis nga impalugan iti patrol car. Sigurado a madamdama laeng, isudanton ti topiko iti kapigsaan a radio iti Ilokandia. Matamborandanto iti radio babaen ken ni Komander Antokoy ket agdinamagton iti sibubukel a probinsia ti dakes nga aramid dagiti agpartner a tsismosa. Ay, nagdakkel la ketdi a pakaibabainan dagitoy labid iti nagkurusan ti pannakatamborda iti radio!#