Footer

Dagiti makaipas a balikas ti Presidente

BAY-AN kadi lattan dagiti Pilipino dagiti nakairuaman a nagubsang ken makaipas a panagsasao ni Presidente Rodrigo Duterte kabayatan ti agduan a tawen a panagtakemna iti kangatuan a pagsaadan iti pagilian?

Immuna idin a pinagsasawanna iti dakes ti Santo Papa; itan, ti Dios dagiti Kristiano a kaaduanna a mangbukel ti papulasion ti Pilipinas.Adu dagiti Kristiano nangruna dagiti Katoliko ti nasaktan iti kaudian a balikas ti Presidente a nangisawanganna nga istupido ti Dios dagiti Kristiano. Krinitikarna ti pammati ken doktrina naipalaon iti Biblia.

Naglak-am ti Presidente iti adu a kritisismo manipud kadagiti umili a Kristiano a nasaktan iti panagsaona a “your God is stupid.” Nanglayus iti social media kadagiti mensahe a nangipeksaan dagiti umili kadagiti bukodda a karirikna ken kananakem.

Iti panagsarita ti Presidente a naipabuya iti telebision idi Hunio 22, 2018, natratarna ti paset iti Biblia a pannakaparsua ti lubong, ken nasaludsodna no apay a ti Dios ket pinarsuana da Adan ken Eva tapno iti kamaudiananna ket agbasolda a nangdadaelna iti inaramidna. Kinuna ti Presidente: “Who is this stupid God? You created something perfect and then you think of an event that would destroy the quality of your work. How can you rationalize that God? How can you believe him?”

Nagsarita manen ti Presidente iti imatang dagiti opisial iti barangay sadiay Cagayan de Oro City idi Hunio 25, 2018. Kinuna ti Presidente: “Your God is not my God because your God is stupid. Mine has a lot of common sense. If I choose not to believe in any God, what’s the fucking thing about it? It’s a freedom to choose one.”

Iti sabali a ponto ti Presidente, kinunana: “I did not say that God is stupid, listen in the records. I said your God is stupid God, my God is perfect.”

Inawagan ni Manila Archbishop Luis Antonio Cardinal Tagle dagiti Katoliko ti panagbalinda a natalna ken naannad a panagtignay iti sango dagiti balikas a maikontra ken ni Jesucristo. Kiniddawna ti panangrespeto dagiti Katoliko iti relihion ken pammati iti padada a tao.

Ibilang ni Caloocan Bishop Pablo Virgilio David, Vice President ti Catholic Bishops’ Conference of the Philippines a ti insawang ti Presidente ket maysa a “blasphemous” wenno kinaawan ti panagraem iti Dios dagiti kaaduan a Pilipino. Impeksana ti panagduduana iti panangidaulo ti Presidente a saanna nga am-amo ti Dios dagiti kaaduan nga umili a Kristiano ken Katoliko.

Nabagas ti mensahe ni Lingayen-Dagupan Archbishop Socrates Villegas, sigud a Presidente ti Catholic Bishops’ Conference of the Philippines, ken dagiti kakaduana nga obispo, iti panangawagna kadagiti mamati nga iti laksid dagiti balikas ti Presidente a maikontra iti Dios ket ikagumaanda nga ayaten ken ituloyda ti panagkarkararag tapno maamiris ken pagbabawianna dagiti basol ken biddutna.

Kiniddaw met dagiti lider ti Philippine Council of Evangelical Churches kadagiti kamengda nga itultuloyda nga ikararagan ti Presidente tapno maidauluan ken maiturongna ti Pilipinas nga addaan iti naan-anay a kinasirib, nadiosan a kananakem ken iti nalinteg a panagbiag.

Kiniddaw ni Jesus Is Lord Movement Founder Brother Eddie Villanueva a nasken a dumawat ti Presidente iti pammakawan iti Dios iti publiko iti insawangna. Inawisna dagiti kapamatianna ti panangikarkararagda iti Presidente tapno maiturongna dagiti umili iti kinalinteg.

Dinependeran met ni Presidential Spokesman Harry Roque ken Presidential Legal Counsel Salvador Panelo ti naisawang ti Presidente nga ibagbagana laeng ti bukodna a kapanunotan ken personal a pannakaawatna ti pannakaparsua iti lubong iti Biblia. Inrakurakda ti pannakaisayangkat ti dialogo iti baet ti administrasion ken ti religious sector.

Iti pannakayusuat ti dialogo iti nagbaetan ti Simbaan ken dagiti pannakabagi ti Presidente, maayatan ni Davao Archbishop Romulo Valles, CBCP President, tapno mapagpapatanganda a nasayaat dagiti nasken nga aramidenda ket mapagari ti panagkikinnaawatan ken panagkaykaysa ti administrasion ken Simbaan para ti pagimbagan ti sapasap a pagilian.

Ninamnama dagiti obispo ken papadi nga iti panagakem ni Abp. Valles idi Disiembre 2017 kas CBCP President, ken kas Arsobispo iti Davao ket sumayaat ti pannakilangenda iti Presidente. Ngem nagtultuloy ti yaadayo ti relasion ti Presidente kadagiti lider ti Simbaan Katolika gapu ti panangtubtubngar dagiti obispo, papadi ken mamadre kadagiti gannuat ni Duterte nangruna iti pannakalabsing ti human rights iti nadara a kampania kontra illegal a droga ken itan ti nainget a kampania a pannakatiliw dagiti istambay kadagiti publiko a lugar ken panaglabsing kadagiti lokal nga ordinansa.

Panawen pay laeng ti kampania idi 2016 idi nakaisawangen ni Duterte iti balikas a makaipas kadagiti Katoliko idi pinagsasawanna iti dakes ni Papa Francisco kabayatan ti panangisalsalaysayna ti pannakaipitna iti trapiko idi bumisita ti Santo Papa iti Pilipinas idi Enero 2015. Nagparnuay dayta iti nagduduma a reaksion dagiti Katoliko ket dimmawat iti pammakawan ni Duterte ken ni Papa Francisco.

Adun a dakes a denggen a balikas ti Presidente. Iti laksid dagiti adu a kritisismo iti panagsarsarita ti Presidente ken dagiti programa ti administrasionna ket agtultuloy ti suporta dagiti kaaliado ken adu nga umili kenkuana. Ngem ita ket nagduduma ti reaksion dagiti kaaliadona iti politika ken dagiti nangato nga opisial ti gobierno. Kinondenar da Vice President Leni Robredo, ken dagiti dadduma a senador a kameng ti oposision a da Antonio Trillanes IV ken Riza Hontiveros, ken dagiti adda iti administrasion a da Senate Pro Tempore Ralf Rector, Sherwin Gatchalian, Joel Villanueva, ken Panfilo Lacson ti naisawang ti Presidente maikontra iti ibilang ken pagdaydayawanda a Dios, ken Dios dagiti walopulo a porsiento ti kadagupan a papulasion dagiti Pilipino.

Kas pangulo ti Kristiano a pagilian ket rumbeng a raemen ti Presidente ti Dios dagiti tattao nga idauluanna. Kas pudno a Kristiano, rumbeng met a dagiti Pilipino a mangibilang ken Kristo a Dios ket iyanninawda a panursuro ti Apo babaen ti panangayat ken panangikararag ti mangirurumen ken uray kadagiti kabusorda. #