Dagiti nadumaduma a rupa ti daniw (Maikadua a paset)

NAPINTAS ti pammagbaga dagiti lallakay ken babbaket idi natinongen ti kaaldawan ti kallaysa. Pammagbaga kadagiti agkasar.

Ammo ti nangawis kaniak a mannuratak.

“Denggentayo man met ti masao ni Pari Jimmy, maysa a mannurat,” kunana ketdin! Nakudkodko a dagus ti di met nagatel a tuktokko. Makapatpatteltelak kenkuana ta impasubonak, kailian!

Nalagipko dayta “Marriage Creed” nga acrostic. Isun ti usarek, kunak iti panunotko. Ket impasaksakkon a kinuna: “Lima a tawen a nagsursuratak iti adbays iti radio babaen ti programa a ‘Toy Numo Toy Biang, Manang Helen’”

“Ay, sika!” adda nangisengngat a baket.

“Ne, sika gayam ti agsursurat kadagita!” kuna pay ti maysa. Naipatangatang ngamin daytoy a radio-drama con adbays kadagiti nalalatak a radio stations iti Northern Luzon a kas iti DZNS, Vigan  City; DZPA, Bangued, Abra; DZWT, Baguio City; DWRV, Bayombong, Nueva Vizcaya; DWDY, Isabela, ken ti Catholic-run radio stations sadiay Tuguegarao, Cagayan ken Alaminos City, Pangasinan.

“No mamagbagaak, agtaud iti pusok ti pammagbaga. Ababa laeng ti makunak ta uppat laeng dagitoy. Umuna: LISTEN TO EACH OTHER. Iti ania man a kanito, dumngeg koma tunggal maysa kadakayo. No agsao ti maysa, dumngeg ti maysa a sipapasnek. Saankayo nga aggiddan nga agsao tapno agkinnaawatankayo. Iti panangdengngeg iti agsasao ket agtungpal iti panagkikinnaawatan. Daytoy a panagkikinnaawatan ti tulbek iti naragsak a pamilia.”

Ania ketdin nga isem dagiti dumdumngeg, kailian!

“Maikadua: OPEN YOUR HEART. Silulukat koma ti pusoyo iti tunggal maysa tapno nalaklaka pay a dumteng dayta a panagkikinnaawatan. Awan koma ti mailemmeng a sakit ti nakem wenno negatibo a banag iti uneg ti puso. Silulukat koma a kanayon dayta tapno makita ken maiyebkas a dagus  ti linaonna. Iti ababa a pannao, adda nalawa ken nalawag a kumunikasionyo nga agassawa. No adda di kayat ti maysa, ibagana ket dumngeg met ti maysa. Kastanto met ti maysa. No pagsasaritaan ti parikut ken ti di kayat, maamiris ken masolbar dayta. Ta adda aya met parikut a di masolbar?” 

Inisemak ken pinerrengko ti inyarasaas itay ti kumparik a kunana a kaub-ubinganna a balo ken awanan anak. Agpalpaliiw iti suli. Ngem natipedko pay laeng ti riknak a kiddayan. Nagsam-it ket ti paludipnan, kailian! Sal-it, malipatankan, Yolanda, nakunak iti bagik isu nga intuloyko met laengen.

Ti maikatlo: VALUE YOUR UNION. Ipategyo ti inkay panagdenna. Sagrado ti kallaysa. Diyo patpatien a ti kallaysa ket sangkapirgis laeng a papel. Saan a pudno dayta. Daydiay papel a nakaisuratan ti naganyo, isu ti sangkapirgis a papel. Ngem  napatpateg pay ngem balitok ti kaipapanan dayta a papel. Naibudak pay dita ti kinataoyo. Ti pinagtipon ti Dios ket saan a mabalin a pagsinaen ti tao. Isu ngarud a kunak itay a no adda parikut a dumteng,  pagsasaritaan ken solbaren tapno saan a marakrak ti kallaysa. Ti panagdennayo koma ti lapped ti tunggal maysa tapno makontrol ti rikna a tumaliaw iti sabali.”

Nagbiddutak sa, kunak man iti bagik, kailian, ta idi taliawek ni balo, ket nagdumog a kasla ketdin nabainan, yos. Ammona ngata nga addan Yolandak, yos!

“Maikapat ken maudi: EXPRESS YOUR TRUST. Agtalinaed koma nga agnanayon dayta panagtalek iti tunggal maysa kadakayo. No talken ti asawa, uray ania ti kakuyogna wenno kabinbinoltitna dita, saan a tumpuar kenka dayta nga  imon agsipud ta adda panagtalekmo iti asawam a saanna a maaramid ti panangliputna kenka. Iti kanito a ‘sweet moment’ wenno iruangan ti sweet moment, sawen latta ti panagtalek iti asawa. Uray no saan a sweet moment basta malagip dayta, sawen iti asawa tapno umun-uneg pay dayta iti kaunggan ket isunton ti lapped iti panagaramid iti di maikanniwas.”

Yos! Idi taliawek ni balo, likudanna laengen ti nataldiapak! Impakamakamko latta a minatmatan ti nasip-pukel a patongna, iti pamudawen a luppo iti siortpanna a puraw nga  inasmanganna iti venus cut a nalabaga a tisiert a kurang sa ti tela ta agparparang ti pusegna itay.

Pinutedkon ti pammagbagak. Ania ket ti palakpaken ti tallaong. Linamanodak pay! Intagayannak pay ti nalipatakon ti naganna a kapitan daydiay a barangay iti sangasudo a basi. Inimaskon ti simmimsim a kagiddan ti pammadayawda.

Ngem yos, dida la ammo, a nagtaud dayta a pammagbagak iti ACROSTIC! Imbag man ta adda daydiay acrostic a “Marriage Creed,” ta no saan, nagkammulawak koman a nangbagbaga, hehehe!

Diakon imbaga a nagtaud iti acrostic ti pammagbagak. Ta ti kapatgan ditan ti mensahe.   

ACROSTIC, kailian. Dayta man. Padasenyo man met.

Ania ti kunam, kailian? Nabitinka ken ni balo? Ala, ituloyko a.

“Agawidkayon, manong?” kunana idi agawidkami, sika. Ta inggagarak met a sinapul iti paraangan a kasla ketdin kailiwko ti isemna. Wenno imbaludnak ti isemna?

“Saan koma pay a, ta adda man nakaibaludan dagiti matak a diak mauma a mangbuybuya,” kunak man. Ket anian a  sam-it ti isemna! 

“Asino met ngay?”

“Dua nga agpa ti kaadayona ti kaasitgan kaniak, isu a kunak metten nga imperreng, yos: “S-sika!” 

“N-napintasak, aya?”

“Saan laeng a napintas no di ket kapipintasan!”

“Naangaw kadi amin a mannurat?”

“Saan. Awan ti naangaw a mannurat ta disipulo iti kinapudno. Saanak a mamati ti kunkunada a love at first sight, ngem ita, mamatiakon ta napadasakon. Agingga a dimo marikna ken mapadasan gayam, saanka mamati, saan?”

Nagkiriring ti selpon. Ni Yolanda!

“Ania? Mangiyawidak iti babai? Wen, sangadram! Aaahhh, basi! Lawagem met ngamin a iti agsao!?
Sal-iten, isturbo, hehehe!

Innalak ti selpon namber ni balo. Innalana met kaniak. Agkarateks ken umawag no kua ngem diakon a sinungbatan amangan no malipatak pay ni Yolanda ken dagiti annakko, sal-it ketdi.

Isu daydiay daniw nga ehemplona.

Dayta man, kailian. Acrostic-Iluko. Daydiay umuna a letra dagiti binatog no basaen iti “pababa” ket adda balikas a kaimudinganna.

ACROSTIC-ILUKO? Ala, padasenyo met a, kailian, total maymaysa laeng met ti kaipapanan daytoy: Panagsubli iti kinaagtutubo! Wenno reminiscence of long-long ago?

[ Adda tuloyna ]