Footer

Dagiti nadumaduma a rupa ti daniw (Umuna a paset)

ABCEDARIAN — A poem having verses/words beginning with successive letters of the alphabet.

Ti pangrugian a balikas ti/dagiti linia ket nagsagannad a letra ti kurditan (alphabet). Mangrugi iti rugi sa agsagannad. Uray ania ti nangrugian a letra no la ket agsasagannad ti sumaruno. Kasta met nga uray agbaktaw daytoy,  mabalin latta no la ket agsasagannad.

Kadagiti dadduma, irugida met iti ungto ti kurditan santo met la agsasagannad. Abcedarian dayta, kunada met.

Kadagiti dadduma, abecedarian kunada, ta adda dayta letra e. Ngem uray no ania kadakuada, isu latta  nga isu.

Basaen ti ehemplotayo iti napalabas nga isyo. Napauluan iti Abcedarian-Iluko: Dagiti Gikgik. Nagsasagannad dagiti umuna a letra dagiti binatog. ABC. Isu a naawagan iti ABCEDARIAN a daniw.

Nalaka kadi ti agaramid iti abcedarian a daniw?

Nalaka. Isu met laeng nga isu ti inka panagputar. No addaankan iti idea iti suratem, kasla met laeng iti panagigup iti digo ti rabong ken saluyot. Ngem sasaurem laeng dayta  bagim no dimo ammo ti inka daniwen ket agkarkaradapka pay laeng kadagiti balikas wenno  inka  pay la agpidut iti kabalangegan, iti tamtambak wenno rangrangat kadagiti ikapetmo a balikas iti dika met  ammo a daniwen. Narigat a putaren.

Ngem no ammom ti daniwem, nalaka laengen dayta. No dimo kabaelan a daniwen babaen iti imagery wenno symbolism, apay a dimo daniwen nga  umuna babaen ti achmeism?

Nalaklaka ngatan ti inka panangaramid ta saankan nga agpanunot iti nauneg a balikas a sandi dayta  nalag-an a balikas.

Abcedarian, kunam, kailian? Nalaka laeng dayta! Ala man, padasem!

ACROSTIC-ILUKO

Adtoy manen ti sabali pay a rupa ti daniw, kailian. Porma, kunak man laengen.

ACROSTIC – A verse in which certain letters such as the first in each line form a word or a message.

Karuprupa la unay ti Abecedarian daytoy, kailian. Ti laeng nagdumaanda, adda balikas wenno dagiti balikas a mangbukel kadaytoy a daniw. Daydiay umuna a letra iti linia ti rugi dagiti balikas wenno mensahe ti daniw. No ti Abecedarian ket nagsasaganad nga ABC, iti met acrostic, adda mabasa a mensahe, nagan, wenno ania  la ditan a pakabuklan iti amin a pangrugian a  letra dagiti linia.

Basaen ti ehemplo ti daniwko kadagiti napalabas nga isyo a napauluan iti Acrostic Iluko: Maria Armida Rillera

Popular la unay daytoy kadagiti agtutubo. Daytoy no kua ti kaunaan a suratenda lalo dagiti addaan iti grupo wenno gang, ikkanda dayta naganda iti mensahe wenno kaipapanan.

Makita met no dadduma daytoy  nga acrostic uray kadagiti graffiti. Idi agtutuboak ket siak ti para surat iti  love letter dagiti kabaddungalan. No meaning laeng ti grupo, siak ti pakaikumitanna no kua. Mahilig met idi datao no kua iti vandalism, hehehe, ket maisurat ti acrostic kadagiti pader wenno puon ti kayo.

Saanko laeng nga ammo idi a daniw met gayam dagita. Ken saanko pay nga ammo nga acrostic gayam iti  pangawag kadaytoy.

Uray dagiti puon ti nabun-as a saba ket maaddaan iti acrostic no aggagatel ti utek idi agtutuboak pay.

Iti kaanoman ket saanko nga  inarapaap ti panagbalinko a mannurat. Nupay kasta, napatpateg nga adayo ti libro wenno magasin a linaon ti makinlikud a bulsa ti pantalonko wenno siortpanko ngem ti sagaysay ken panio. Adda met dagiti ramay nga ikuraykay iti tuktok no kayat, saan? Saanko a kasapulan ti panio ta saan met a datao a butegan, ania! Saanak met a naarte, mabalinen ti bukot wenno bangad ti dakulap a pagpunas iti ling-et. No awan ti makakita, ti gayadan ti tisiert, a, hehehe! Puera manggas ta dinto ket agbalin datao a Felix The Cat. Ngem ti libro wenno magasin? Kasla aggurigorak no awanda lalo no agbiaheak! Makagatangak iti pocket books ngem diak a makagatang iti tisiertko, yos! Ta nalastogak met ngamin idi agtutuboak pay dakayo, ket kunak man nga uray ania ti isusuotmo, no naguapoka, naguapoka latta. Ken maysa, saan a mailemmeng ti napintas a bado ti narugit a nagan, di kadi?

Idi bulan ti Abril 2006, simrek manen ti kinasutil daytoy nga acrostic. Kadagiti amin nga acrostic a nabasak, daytoy man ti tagipintasek ta linaonna aminen a pammagbaga a kayat kadagiti kassagpat iti kinaestado.

Maika-9 nga inanakmi iti kasar ken baket da Rodrigo Miranda iti Quirino, Isabela ken ni Lilibeth Soley iti Itogon, Benguet. Nagkasarda idi Abril 28, 2006 iti alas 9:00 a.m. sadiay St. John The Evangelist Parish iti Quirino, Isabela. Agpadada  nga estudiante a di nakatutor. Ngem uray ta  intuloy ni Rod ti panagiskuelana ket graduating iti BS Criminology. Ituloyto kano met ni Lilibeth ti panagiskuelana inton maibuangna ti bugi.

Iti imbitasionda ti nakakitaak dayta nakapimpintas nga acrostic. Kastoy man ti  linaon dayta nga acrostic, kailian:
 
            Marriage Creed
 
            Listen to each other
            Open your heart
            Value your Union
            Express your trust

Dayta man! Uppat laeng a linia.

No amirisen a nalaing, dagiti umuna a letra dagiti uppat a binatog ket  mabasam dita ti maysa a balikas a mamagkayammet iti agassawa. LOVE. Dagiti mensahe dita ket para kadagiti agassawa. Naibaga dita. Kumpleto rekado.

Immemoriak dayta nga acrostic.

Naisurotak iti maysa a “yuuli” sadiay La Union. Inawisdak, di simmurotak met ta saanak a pamiliar unay iti danondanon.  Nakapuy ti ideak ditoy ta diak pay napadasan. Patiek ngamin a maaramatko dayta nga eksperiensa iti masanguanan.

[ Adda tuloyna ]