Dagiti padas ken paliiwko kabayatan ti quarantine

ADDAAK iti opisinami iti Palacio Arzobispado de Nueva Segovia iti Vigan City idi agalas-5 iti malem ti Marso 16, 2020 idi mabasak iti social media ti panangideklarar ni Presidente Rodrigo Duterte ti pannakaipakat iti Luzon ti enhanced community quarantine manipud Marso 17, 2020 agingga iti Abril 14, 2020 tapno malapdan ti panagraira ti Corona Virus Infectious Disease 2019 ( COVID-19).

Iti panagawidko ken ilalabasko iti St. Paul Cathedral iti sentro ti siudad, nadlawko ti kinaawanen ti matatao ken lugan iti aglawlaw, nakarikepen ti akinsango a ruangan ti katedral. Nalagipko a kadagiti naglabas nga aldaw ket tumuyutoy dagiti turista iti daytoy a paset ti Heritage City ken maysa kadagiti New Seven Wonder Cities of the World. Nalagipko la ket ngarud dagiti grupo dagiti Chinese a nakaumanko idi Disiembre 26, 2019, ken Enero 6, 2020 a pasahero ti cruise ship a simmanglad iti Salomague Port iti ili ti Cabugao. Simken iti panunotko ti naipadamag a kaadda dagiti Pilipino a tripulante ti cruise ship a naka-quarantine sadiay Oklahoma, Japan nga inakaran dagiti masakit a pasahero.

Nakamakamko ti kakaisuna a bus iti terminal nga agpa-San Juan nga ilimi. Impalagip ti kundoktor nga agpatingga laeng iti public market ti bus ken saannan a malabasan ti balaymi iti Amianan ti poblasion ngem inkeddengko ti naglugan ken pagnaekton agingga iti pagtaenganmi ta awanen ti bus. Naayatannak ta adda pay maysa a bakante a nagtugawak.

Tumanabutob ti nakaabayko a babai idi nagsardeng ti naglugananmi iti bus stop iti ili a Bantay ket adu dagiti nagtatakder a limmugan. Ibagbaga ti babai ti “social distancing” iti lugan. Nakunak nga innanus laengen ta kayat met dagiti pada a pasahero ti makaawid.

Idi makasangpetak iti balaymi, saanen a nasdaaw ti misisko idi ipadamagko ti lockdown iti Luzon ken awanton ti public transportation ken serrek ti trabaho agingga no malpas ti Semana Santa. Immunan a nasuspende ti klase dagiti amin nga estudiante iti Ilocos Sur

Kabigatanna, nakariknaak ti pannakaikawa ta nairuamakon a nasapa nga agriing ken agsagana a sumrek iti trabahok gapu iti rigat ti pagluganan kadagiti naglabas nga aldaw. Naayatan met ti siam ti tawenna a kakaisuna nga anakmi ti kaawan ti serrekko ta adda kanon napaut a panawenko a makalangen isuna, ken makapankamin a kanayon iti mall ken tiendaan a gumatang iti ay-ayamna. Naupay ti anakko idi ibagak a saan a mabalin ti mapan agpasiar ken inlawlawagko ti kaipapanan ti lockdown. Impalagipna la ket ngarud a no saankami a makapan agpasiar ket suruak nga agbisikleta ken tarimanek ti nadadael a pagbasketbolanna.

Kadagiti immuna nga aldaw ti quarantine, nakitak ti kaadu dagiti saanko a naobra iti pagtaengan ken arubayanmi nangruna ti agarbas kadagiti narukbos a kayo ken mangurnos kadagiti gargaret iti kalapaw ken pannakabodegami. Adu dagiti nabaybay-an iti uneg ti balay ken paraanganmi ta makumikomkami met nga agassawa kadagiti obligasionmi.

Makumikomak iti lawasna kadagiti nagadu nga annongek iti Catholic Newspaper. Uray iti Sabado ken Domingo ket adda met latta pakakumikomak kadagiti programak iti Catholic radio.

Saan met a nagbalin a naan-anay a lapped ti enhanced community quarantine iti panangannong kadagiti akem iti media no man pay limitado laeng dagiti maaramidak. Dakkel unay a katulongan ti moderno a teknolohia tapno updated ken makaipatulod kadagiti artikulo ken ma-acces dagiti impormasion. Uray no addaak iti pagtaengan, adu met latta a trabaho ti maaramidan.

Kabayatan ti quarantine, naipasnekko a kalangen ti pamiliak nangruna iti mamitlo iti inaldaw nga agsasangokami a mangan, ken agaabay nga agbuya iti telebision. Malaglagipko la ket ngarud ti “social distancing” nga ipagpaganetget ti gobierno uray kadagiti agkakapamilia.

Uray iti kaaddak iti arubayanmi, nakitak ti kinasukir dagiti dadduma a tattao kadagiti inyetnag ti gobierno a pagannurotan kabayatan ti quarantine. Adda latta dagiti sangsangaili a tattao a saan a malapdan nga agdakiwas iti arubayanmi aglalo kadagiti mapan agtrabaho iti bangkag a nakaigapuan ti panangikabilko iti nalaga a barut tapno malapdan ti yaasidegda iti balaymi, ken pannakiay-ayam dagiti ubbing iti anakko.

Nasaksiak met ti rigat ken sakripisio dagiti mannalon nga agistimar kadagiti mulada iti bangkag iti likudan ti balaymi. Agsibog, agdalus ken ag-spray-da iti mulada a repolio uray no saan a masigurado ti presio ken paglakuanda gapu iti lockdown. Napaliiwko met ti inaldaw a panag-spray iti nagingel a kemikal a patiek a no maigamer iti nateng a repolio ket agbalin a sabidong a makadakes iti salun-at dagiti mangipauneg.

Iti panawen ti quarantine, nakumikom ti asawak kadagiti annongenna iti pagtaengan, kabayatan a ti anakmi ket nakasentro met ti imatangna iti panagbuya ti telebision, panag-bukel iti lego, ken panagay-ayam iti bola ken indayon iti paraanganmi. Adda dagiti gundaway a kaduaek ti anakko nga agay-ayam iti basketball ken itultulodko iti indayon a gubuayen met ti ragsakko kas maysa nga ama a makiay-ayam iti anakna.

Iti panawen ti quarantine ti schedule-ko a mapan sadiay Lorma Medical Center iti San Fernando City para ti regular check up ken Avastin boaster injection ngem saanakon a nakapan gapu iti lockdown.

Iti rabii ken iti nasapa a parbangon a makariingak, diak nagawidan ti agkararag gapu iti amakko a posible a maakaran iti COVID-19 gapu ta addaanak iti medical history nga acute upper respiratory disease idi 1998 a dandani nakatayak ken naalak gapu iti kina-chain smoker-ko. Dayta ti gapu a no adda dagiti allergic a malang-abko ket leklekannak iti uyek, ken napaut no agpanatengak. Dayta ti gapu nga adu dagiti iwaywayatko a precautionary measures kabayatan ti panagraira ti COVID-19. Iti panawen a naglak-amak iti nakaro a sakit iti naglabas a panawen idi naospitalak sadiay Cardinal Santos Medical Center ken ita iti Lorma Medical Center, nariknak la unay ti kinapateg ti biag, ket awan sabali a kangrunaan a nagkamangak no di ni Apo Jesucristo a nangisalakan kaniak iti sango ti patay ken peggad babaen ti panangaramatna nga instrumento kadagiti doktor a nangagas kaniak.

Naldaanganak kadagiti maipadamag a natay gapu iti COVID-19, nangruna dagiti adun a doktor ta pimmusayda gapu iti panangannongda kadagiti akemda a mangagas kadagiti masakit ken mangispal iti biag.

Iti panagraira ti mapagam-amkam a virus, mamatiak a babaen ti panagkamang iti Dios ken panangtungpal kadagiti iyetnag ti gobierno a pagannurotan kas ti nainget a quarantine ket malapdan ti panagraira ti COVID-19.