DAGITI PANAGBOMBA ITI DAVAO CITY

Komentario ni Eden A. Alviar

NAMIN-ADUN a napasamak ti panagbomba sadiay Davao City iti naglabas a tiempo, ngem apay a kasla saan a nakasagana dagiti opisial ti gobierno ti siudad iti naudi a terorismo iti laksid nga addan bomb threat a naawatda?

Maysa a pananginsulto ken panangkarit iti agdama nga administrasion ni Presidente Rodrigo Duterte ti napasamak a panagbomba iti night market sadiay Roxas Avenue, Davao City, ta daytoy ti lugar ken nagserserbian a mayor ti Presidente iti adu a tawen. Iti agdama, dua pay nga annakna ti naisaad kadagiti kangatuan nga akem iti siudad – da Mayor Inday Sarah Duterte ken Vice Mayor Paolo Duterte. Idi napasamak ti terorismo ket nairana pay nga adda ti Presidente iti siudad.

Ti pannakapasamak ti panagbomba ket tungpa met iti liderato ti Philippine National Police nangruna ken ni PNP Chief Director General Ronald De La Rosa ta nabayag isuna a nag-hepe iti siudad a puon ti panagassidegda iti Presidente ken pannakadutokna iti agdama nga akemna. Dakkel met a karit iti PNP ti pannakatiliw dagiti terorista nga akin-aramid iti panagbomba. Iti pannakaideklarar ti intero a Pilipinas nga “Under the State of National Emergency on Account of Lawless Violence,” awanen ti rason ti gobierno a saanda a matiliw dagiti terorista a nangbomba iti Davao City wenno adda pay sabali manen a mapasamak a terorismo iti nagduduma a paset ti pagilian.

Gapu iti napasamak a terorismo, mayakaren iti destino ti Davao City Police Director idi napasamak ti panagbomba. Nalawag a nagliway dagiti pannakabagi ti linteg iti pannakalapped koma ti panagbomba a nakatayan dagiti 14 a tattao pakairamanan ti maysa a pulis ken nakasugatan dagiti 67 a tattao. Saanda a nalapdan ti panagbomba iti laksid nga addan dagiti bomb threat a naawat dagiti opisial ti siudad. Inaklon a mismo ni Vice Mayor Duterte nga adda dagiti naawatna a bomb threat dua nga aldaw sakbay ti ibebettak ti bomba ngem saanna nga inrakurak iti publiko tapno saan a maalarma dagiti tattao.

Nagkas-ang a panunoten a no kasano ti karegget ti agdama nga administrasion iti gerra kontra illegal a droga, ket nabaybay-anda ti seguridad dagiti inosente nga umili iti mismo a siudad ti Presidente. Nagpangta nga immunan ti Abu Sayyaf Group a bumalesda iti gobierno gapu ti napainget nga operasion dagiti tropa ti Armed Forces of the Philippines sadiay Sulu kalpasan ti pannakapapatay dagiti 15 a kameng ti Philippine Army a mangan-anup kadakuada. Kagiddan koma ti napainget nga opensiba sadiay Sulu ket ti pannakapainget met ti seguridad dagiti posible a target ti pammales dagiti terorismo kas maibasar kadagiti lugar a nakapaspasamakanen ti panagbomba kadagiti naglabas a tawen kadagiti dadakkel a siudad kas ti Davao, Cebu ken Metro Manila.

Ammo ti Presidente ken PNP Chief a ti Davao City ket kanayon a target dagiti terorista manipud pay idi 1981 a panagraira ti riribuk ken pammapatay kabayatan ti kabara ti insurhensia iti siudad. Sakbay ti kaudian a panagbomba idi Septiembre 2, 2016, naminpiton nga adda napabettak a bomba wenno granada iti siudad. Agdagupen iti 73 dagiti napapatay ken 551 dagiti nasugatan kadagiti walo a panagbomba

Idi Abril 19, 1981, Domingo Panagungar, napabettak ti dua a granada sadiay Saint Peter Cathedral kabayatan ti Misa. Agdagup iti 17 dagiti natay ken 157 dagiti nasugatan a makimkimisa kabayatan dayta a terorismo a maibilang nga umuna a panagbomba kalpasan a naikkat ti Martial Law.

Napidua manen ti pannakabettak ti tallo a granada iti Saint Peter Cathedral idi alas sais iti malem ti Disiembre 28, 1993 kabayatan ti Misa ken panagsersermon ti padi. Innem dagiti natay ken 151 a makimkimisa dagiti nasugatan iti dayta a pannakabettak dagiti granada. Maikaduan a termino ni Mayor Duterte iti Davao City iti dayta a tawen.

Idi Mayo 16, 2002, bimtak ti bomba iti siled ni Michael Terrence Meiring sadiay Evergreen Hotel. Ni Meiring ket maysa nga Amerikano ken nabigbig a treasure hunter nga adda pakainaiganna iti Central Intelligence Agency. Kalpasan ti panagbettak a nakadangran ni Meiring, naikamang isuna sadiay Davao Doctor’s Hospital, ngem inyakar dagiti mapapati nga ahente ti Federal Bureau of Investigation iti ospital iti Manila sa napagawid sadiay Estados Unidos.

Naipadamag a narurod ni Mayor Duterte iti dayta a pasamak ket krinitikarna ti US ta dagiti mapapati nga FBI agents ket kellaatda lattan a simrek iti ospital ken saandan a sinungbatan dagiti saludsod dagiti pulis a nangbanbantay ken ni Meiring sakbay nga inyakarda ti Amerikano a biktima ti panagbomba. Adda dagiti saan a nalawag a report idi a ti kaadda ni Meiring iti Mindanao ket adda nalimed a pakainaiganna iti kampania ti Estados Unidos kontra terorismo iti sangalubongan. Mapapati a dayta nga insidente ti maysa a gapu ti panagdudua ni Duterte kadagiti opisial ti Estados Unidos.

Idi Marso 4, 2003, dagiti saan a nabigbig a lallaki ket nagpabettak iti Improvised Explosive Device iti waiting area ti old Davao International Airport terminal a nakatayan dagiti 22 ken nakadangran dagiti 155 a tattao. Pinabasol ti gobierno ti Muslim terror group a Jemaah Islamiyah nga akin-aramid iti panagbomba.

Makabulan kalpasan ti panagbettak ti bomba iti Davao Airport idi Abril 3, 2003, maysa manen a napigsa a bomba ti bimtak iti Sasa Wharf. Iti dayta a panagbomba, natay dagiti 16 a tattao pakairamanan dagiti 4 a pulis ken maysa a madre. Nasugatan met dagiti 46 a tattao.

Idi agalas-sais iti malem ti Pebrero 14, 2005, bimtak ti Improvised Explosive Device sadiay Davao City Overland Transport Terminal. Natay iti dayta a terorismo ti ubing a lalaki nga agtawen iti 12, ken lima dagiti nasugatan. Dayta a panagbomba ket dandani kinagiddan ti panagbettak ti bomba sadiay Makati City ken General Santos City. Inaklon dayta a terorismo ti Abu Sayyaf Group.

Idi alas-nuebe iti rabii ti Septiembre 13, 2013, dandani naggiddan a bimtak dagiti bomba kadagiti pagsinean sadiay SM City iti Ecoland ken Gaisano Mall. Awan ti natay iti dayta a panagbettak ngem adu ketdi dagiti nasugatan.

Iti kaadun dagiti immuna a panagbomba iti Davao City, rebbengna nga idi addan dagiti bomb threat a naawat dagiti opisial ket sineriosoda koman ken nangipakatda kadagiti nainget a security measures tapno nalapdan ti ibebettak ti bomba. Mabalin a nakumikom unay dagiti pulis iti Davao City iti sabali nga operasion ta nagamakdan sa met kadagiti matay-mabiag a terorista ta dagiti babassit a drug pushers ti ipampamaysada#