sinursuran-banner-sqSinursuranNi Jobert M. Pacnis

Dagiti Pasalip iti Literatura

Kolum: Sinursuran

   Ni Jobert M. Pacnis

   (Maudi a paset)

 

 

Sabagay, addanto pay la dayta pannakapnek no mangabakka. Ken uray no maabakka. At least, pinadasmo ti makisalip Maikadua laeng dayta awaten a gunggona.

Maysa pay. Adda dagiti pasalip a di mangikaskaso ti rigat dagiti simmalip. Maysa a kapadasantayo daytoy. Adda idi simmalipak a pakontes iti sarita, dua tawenen ti napalabas. Idi nadanon ti deadline, adda pakaammoda a mayalud-od daytoy agingga iti Disiembre. Kalpasan dayta, awanen ti pakaammo. Basta limned lattan dagiti coordinator ken sponsor ti pasalip (nga ahensia pay met ti gobierno). Kinontakko babaen ti email ti coordinator a mannurat. Sungbatna: Awan ti ammok dita, ading. Ngem saandan san nga intuloy ta limliman sa ti entri. Isuda ketdi ti pagdamagam…

Ney, isu ti coordinator, ket ibagana a dagiti esponsor ti pagdamagak? Ammok ngarud ti konkontakek ket diak met am-ammo ti adda iti likudan dayta nga ahensia ti gobierno? Dinamagko met ketdi no asino. Ngem saanen a nagkimaw ti coordinator.

Ket awan lattan. Kaniak laeng, mabalin met a huraduanda dagita naisalip uray limlima a kunada. Ta uray bassit no nasagitsit, kunada ngarud!  Ngem no awan nakapatar iti pagrukodanda, okey laeng. Nalaglag-an nga awaten. Basta adda pakaammo iti publiko. Ngem dayta kunada a dida ituloyen ta bassit ti entri… hmmm, diak la ammon a saritaen. Awan pay pormal a pakaammoda iti publiko.

Nagbibingayandan dagiti nailatang a gunggona? Diak kayat a panunoten a kasta…

No diak pay nagdamag iti coordinator, a di pay sierto ti sungbatna ta adda met “sa”-na, awanen ti ammok pay kadayta a pasalip. Dagiti padak a nakisalip, ammok a masmasdaawda met.

Maudi daytoyen. Adda dagiti pasalip a di agpapada (consistent) dagiti pagannurotanda. Kas iti maysa manen a pasalip itay nabiit. Idi naipablaak dagiti alagaden iti Hunio nga isyo ti magasin kadayta a tawen, masapul kano a buklen iti tallo a daniw ti isalip. Kunana pay: saan a nakurkurang ngem duapulo a linia ti daniw ngem di met ad-adu ngem limapulo a linia.

Naglawag dayta a pagannurotan. Isu nga idi isaganak ti isalipko, nagsukisokak pay. Saan a masapul a sinsinan dagiti mayentri. Iti kadakkel dagiti papremio, adu la ketdi ti makisalip.

Pantoun, sestina ken daniprosa ti nangbukel iti insalipko. Idi maibusonkon dagitoy, rimmuarda met a dagus iti magasin ta paset ti pagannurotan daytoy a dagiti laeng maipablaak ti kualipikado a maisalip.

Ngem idi ngannganin agngudo ti pasalip, iti sumuno a tawen, sabalin ti maikankannawag kadagiti press release. Tallo a daniw ti isubmitir ti mannurat (okey pay laeng kadaytoy) ket saan a lumbes iti duapulo ket maysa a linia ti tunggal daniw (daytoyen ti problema).

Ania pay, dagidi entrik, naikkatdan kadagiti kualipikado nga entri! Uray naipablaakda!

Saan met a kasta kalakana ti mangipatulod iti baro nga entry. Kas nakunan, masapul a maipablaak iti magasin (saanen a masapul pay nga inaganak) dagiti entry tapno naan-anay ti pannakakualipikadoda.

Iheritko man laengen. Adda pay sabali a pasalip kadayta a magasin. Salaysay. Masapul ti affidavit. Ken maibuson ti entry. Simmalipak, idiretsokon. Ngem di man met natuloyen! Makagapu?

Segun iti mapagtalkan a nakasaritak (naasideg/kameng kadayta a grupo), saan gayam a sinuportaran ti isponsor dayta a salip ta iti sumaruno laengen a tawen nga agpasalip. Ti makadakes, naikannawag nga adda daytoy a salip iti pesbuk ket nai-tag pay kaniak. Kinontak, kinasaritak ti nagi-tag (a maysa a bangolan a mannurat) idi ngannganikon masangal ti entrik ta dinamagko no addan entry a naawatna (ta isu kano ti coordinator). Kunana ketdi nga ipatulodkon ‘diay entrik. Isu a kasta ngarud ti inaramidko.

Ngem, kas nasaon, awan ti salip a napasamak! A dikami man laeng napakaammuan.

Daytoy pay ti nakas-ang a pasetna. Daydi entrik, inruarda lattan iti magasin nga awan pammalubosko. Naklaatak lattan idi mabasak. Ita ta ituloyda kanon ita a tawen ti pasalip, saanen a kualipikado dayta entrik ta naipablaak ngaruden. Anian a pannakadis-mayak.

Nalpasen dagitoy. Sapay la koma ta agserbi a pagsarmingan. Narigat no awan rupa nga isarang kadagiti readers.#