Footer

DAGITI PIEK DA SABAS KEN OMAR

Sarita para ubbing ni Dexter Marin Fabito

(Maudi a paset)

PIEK! Piek!” Naragsakanak iti nasinggit a nangegko iti dayta a Sabado. Naragsakanak ta adda met laengen agpissa kadagiti uk-ukopak. Timmakderak. Impidegko ti kimmotko iti baki. Nakaruar ti sippit ti piek iti kasla kadakkel ti binukel ti mais nga abut iti maysa nga itlogko. Adda met rikki ti dua pay nga itlogko. Dagitoy ngata dagiti immun-una a nayitlogko. Nagtugawak.

“Piek! Piek!” nangegko manen ti nasinggit nga uni.

Kruk! Kruk!” insungbatko. Kinitak ti aglawlaw. Madama dagiti dua a nangisit nga upa ken ti nalabaga a kawitan nga agbirok iti kanenda iti katarongan. Saan pay unay nakatangkayag ti init.

Pasado alas dos iti malem, napissaanen ti uppat nga itlogko. Tallo dagiti nalabaga a piekko. Immalada iti maris dagiti dutdotko. Nalabaga met ti maris ti masansan idi a mangasawa kaniak. Maysa ti nangisit. Malagipko, inasawanak ngamin naminsan diay nangisit a kawitan ti kaarruba da Amo Batag. Kayumanggi met amin dagiti uppat a piek ti Sasso. Saggaysakami ti di pay napissaan. Adda ketdi rikki ti itlog ni Sasso. Nagdanagak. Saan ngata nga ibbong ti nabati nga itlogko?

Simmangpet da Amo Sidro kalpasan ti maysa ngata nga oras. Kaduana manen ni Omar. “Ne, maymaysa la gayamen ti di napissaan, manong,” kinuna ni Amo Batag kalpasan a kinitana ti uneg ti baki nga ayanko.

“Innan, kitaek man,” kinuna ni Amo Sidro sa nagturong iti ayanko. Nagpasgarak idi iwalinna bassit ti barukongko. Nangala iti maysa a piek ti Sasso. Immisem sa insublina ti piek. Innalana ti nabati nga itlogko. Kinutogna iti abay ti lapayagna.

Ibbong! Plok! Plok! Kunana!”

Nalidayanak. Limlima la ngaruden ti itlogko nga inukopak, ibbong pay la ti maysa!

Ikabkabil ni Amo Batag dagiti piekmi ken Sasso iti labba nga indissona iti bangko idi immasideg ni Omar. Iniggamanna ti maysa a piek. “Tatang, ana ti ibbong?”

“Daytay saan a napissaan,” insungbat ni Sabas. Nagtugaw met iti abay ti labba sa nangala iti maysa a piek.

Bimmabaak ta kayatko a kepkepan dagiti piekmi ken Sasso.

“Apay, tatang?” kinita ni Omar ti amana.

Kusto diay kuna ni gayyemmo Sabas, anakko.” insungbat ni Amo Sidro.

“Apay ngarud nagibbong, tatang?”

“Mabalin a nabasa wenno nakutogkutog idi madama a maukopan, anakko.”

Immasidegak iti yan ti bangko ngem binugawnak ni Amo Batag.

Kukuak amin dagitoy, a, tatang,” inalikumkom ni Omar dagiti piek.

Ay, saan a, anakko,” immisem ni Amo Sidro. Immisem met ni Amo Batag. “Kukua ni Sabas dagita uppat. Ngem, ibatita pay laeng ta subliantanto inton makaaramidak iti pagipupokak iti piek.”

Inyakar ni Amo Batag dagiti piekmi iti kulongan a kas katayag ti siketna ti basar daytoy. Binay-anna a nakalukat ti ridaw daytoy. Inalistuak ti limmagto a simrek iti yan dagiti piekmi.

Kruk! Kruk! Kruk!” kinunak. Dagus met nga immasideg dagiti piek.

Inrikep ni Amo Batag ti kulongan.

TUKTUKTOKEK ti feeds nga inted itay ni Sabas idi makangegak iti danapeg. Dandanin agdua lawas dagitoy piekmi. Inyeg daytoy idi ni Amo Sidro kabigatan ti panagpissa dagiti piekmi ken Sasso. Kinitak ti sango, agtartaray da Sabas ken Omar nga agturong ditoy kulongan. Magmagna da Amo Batag ken Amo Sidro nga agturong met laeng ditoy.

“Nagdadakkeldan!” nakagaygayad ti isem ni Omar kalpasan a nagsao.

“Siak ti nagpakpakan!” kinuna met ni Sabas.

“Umaymi alaen idan.” Gandaten ni Omar a lukatan ti kulongan ngem igawid met ni Sabas.

Agtalnakayo, annakko,” kinuna ni Amo Sidro idinto nga impatayna dagiti imana iti abaga dagiti dua. “Kitaenyo dagiti piek, ubbing, Agsasabali ti maris dagiti dutdotda, ania?”

“Wen, angkel,” insungbat ni Sabas.

Sabali ti inang dagiti uppat, sabali met ti inang dagiti lima,” intuloy ni Amo Sidro. “Ngem, kitaenyo ket saanda nga aggaapa. Saanda nga ap-apaen dayta maymaysa a nangisit. Di ngamin, Omar?”

“U-uwen, tatang.”

Kayatko ngarud a manipud ita ket saanmon a kasursuron ni Sabas,” pinerreng ni Amo Sidro ni Omar. “Kayatko nga aggayyemkayo kas iti panaggagayyem dagiti piekyo. Dikayo agap-apa.”

Wen, tatang. Wen, angkel,” arig naggiddan a simmungbat dagiti ubbing.

Immisem ni Amo Sidro a nangkuso iti buok da Omar ken Sabas.

“Ikkakto ni Sabas iti ay-ayam ken badok, tatang,” kinuna ni Omar a kimmita iti amana.

Nagtung-ed met ni Amo Sabas.

Kruk! Kruk!” kinunak a nangtuktok manen iti kanenmi. Immasideg dagiti piek. Nakariknaak iti ladingit ta alaendan madamdama dagiti lima a piek ni Sasso. Inbilangkon dagitoy a piekko ngem awan maaramidak ta immay laeng impapissa kaniak ni Amo Sidro.

Kruk! Kruk!” kinunak manen. Nakaisemak ta aggayyemen da Sabas ken Omar.#