: Dagiti Pudno a Kumaw iti Tanap | Tawid News Magazine - Weekly Ilocos News 📰
sinursuran-banner-sqSinursuranNi Jobert M. Pacnis

Dagiti Pudno a Kumaw iti Tanap

Kolum: Sinursuran

Ni Jobert M. Pacnis

(Tuloyna)

 

Pagteng dagitoy a nangdegdeg iti aliaw kadagiti amin nga umili aglalo kadagiti agbibiahe wenno iti haywey ti balayda.

Ramen ti estoria itay nabiit ti pannakatiliw ti maysa a grupo (ta aduda kano) dagiti agkumaw. Ngem ti  pagsiudotan dagiti umili ita, ti pannakaruar dagitoy ta nakapiansada. No apay a kasta, dagiti laeng pannakabagi ti linteg a nakatiliw, ken nangparuar kadakuada, ti makasungbat. Dayta, a, ket no agpayso ti damag!

Kabayatan a masursurat daytoy, baro manen a pasamak ti agwarwaras. Maysa kano nga estudiante a kailiak ti nasarakanda a nasinasina ti bagina. Nagwaras daytoy kadagiti ili ti Sanchez Mira, Pamplona, Claveria ken Sta. Praxedes ken kadagiti kadarapat nga ili ti probinsia ti Apayao.

Ngem iti panagsukisokko, awan ti kasta a napasamak. Kasta metten daydi  immun-una a nagwaras a damag a maysa nga ubing ti pinidut dagiti kumaw iti Brgy. Zitanga a madalanan iti panagpa-Ilokos.

Wen, pudno nga adda dagitoy nga agkumaw. Ngem segun iti imbestigasion, dida kano al-alaen ti lalaem dagiti biktimada tapno ilakoda kadagiti ganggannaet. Ta no malagip, nagbalin a dakkel a negosio daytoy iti kallabes. A mabalin nga agpapan kadagitoy, mapaspasamak pay laeng kadagiti dadduma a paset ti pagilian.

Ti ketdi agpayso, kuna dagiti otoridad, takawanda laeng dagiti biktimada. Ngem ipaknida dagitoy no lumabanda wenno dida sumurot iti pagayatanda. Dagitoy kan’ ti aw-awaganda idiay siudad iti Budol-budol Gang.

No kasta, holdaper dagitoy a kumaw!

Masapul ngarud a mapaksiat dagitoy a managdakdakes sakbay nga umadu nga umadu dagiti biktimada. Obligasion ti tunggal maysa ti pannakarippuog dagitoy. Saan koma ngarud a maturog laeng iti pansitan dagiti otoridad. No adda matiliwda, maipataw koma kadagitoy ti pannusa a maitutop kadagiti aramidda.

Ti saludsod ita, pagtataudan dagiti nalabes unay a damag? Asino ti adda iti likudan dagitoy a kumaw?

Iti maysa a mensahe iti text nga agwarwaras ita, saan kano a rumbeng a pakaaliawan, pagbutngan dagitoy a holdaper a nabirngasan iti kumaw. Nalaka laeng a marippuog ida no adda panagkakayyammet dagiti umili.

Ta kitaen, a. Adda dagita agwarwaras a numero ti luganda. Di naglaka ngarud nga ammuen no asino ti akinlugan kadagita babaen ti pannakikayammet iti maseknan nga ahensia? Dayta laeng manen, a, ti rigatna no peke dagitoy a plaka. A dakkel la unay ti posibilidadna a kasta! Ta asino ti agaramid iti maikaniwas a ti pudpudno a plaka, a nainagan pay kenkuana, ti aramatenna?

Iti text, ti kano pudno a kumaw iti Tanap, a rumbeng a mapaksiat, ket dagiti adda iti likudan ti agtultuloy a pannakaminas dagiti aplaya. Ta iti agdama, kairutda manen ti agbunag kadagiti nangisit a darat (magnetite) aglalo iti Brgy. Linao, Aparri. Pinullo a damtrak ti agipanaw kadagitoy a mineral a numero uno a kasapulan iti panagaramid iti landok. Kastoy met laeng ti mapaspasamak kadagiti dadduma pay nga ili iti dumaya a paset. Kasla nayalis ditoy dagiti pyramide dagiti Ehipsio!

No agtultuloy daytoy, saan nga adayo ti pannakapukaw iti mapa dagiti ili a pakaar-aramidan dagitoy nga aramid.

Ita ngarud, mabalin a pudno ti kuna ti text. Aramid dagiti adda iti likudan ti panagminas dagitoy makaaliaw a damdamag. Tapno di maipokus kadakuada ti atension dagiti makapungtot nga umili gapu iti maikaniwas nga aramidda.

Ngarud, isuda nga agminminas, agnumnumar iti panagminas, dagiti pudpudno a kumaw iti Tanap. Saan laeng a managsaggaysa ti biktimada. Ti sibubukel nga ili a pagkubkobanda iti riniwriw a pirak.

No kaano nga agsardengda, maymaysa laeng ti sungbat: inton naunasen ti Tanap iti mapa ti pagilian. A di rumbeng a mapasamak! Masapul ti panagkakayammet ken panagkuti itan sakbay nga umagek dagiti dalluyon kadagiti paraangan!

Paksiaten dagiti pudpudno a kumaw iti Tanap!#