Sinursuran: Dagiti pudno a kumaw iti tanap | Tawid News Magazine - Weekly Ilocos News 📰
sinursuran-banner-sqSinursuranNi Jobert M. Pacnis

Dagiti pudno a kumaw iti tanap

ADDADA kumaw! Addada kumaw!

Dayta a damag ti mangdaydayyeg iti Tanap kabayatan a masursurat daytoy a para iti kolumtayo.

Kumaw? Ania dayta?

Idi ubingak pay, naynay a mangngegak ti kaadda dagiti kumaw/agkumaw. Isuda kano dagitay tattao nga agala kadagiti ubbing iti kalsada kadagiti nalengleng a lugar.

Pagan-anoda dagiti alaenda?

Italawda kano dagiti biktima tapno sidaenda. No saan, ilakoda kadagiti agar-aramid iti rangtay wenno dadakkel a pasdek tapno ti kano dara dagitoy ti maipatedted iti pundasion daytoy. Ta iti pammati, tumibker ti pasdek wenno ania man nga inprastruktura a mapatedtedan iti dara. Aglalo no dara dagiti inosente nga ubbing!

Idi kapigsak nga agbayanggudaw tapno makiay-ayam, naynay nga estoriaen da tatang ken nanang ti maipanggep kadagiti agkumaw. No mangngegmi idin daytoy, agtalinaedkamin iti balaymi. Saankami metten nga agpakpakarabian.  Nalaka, aya, ti makumaw! Nagimas ti aguli iti bayyabas ken agsapul iti bayuyo kadagiti pampantok!

Nagbalin dagitoy nga estoria ti kumaw/panagkumaw a rangtay tapno agsingsingpetkami nga ubbing. Mabalin a dagidi nga estoria, aramid laeng dagiti nagannak tapno maisuroda dagiti annakda.

Ngem sumagmamanon a lawas ti naglabas, rimmuar manen daytoy nga estoria wenno damag ditoy Tanap. Idi damo, adukami a  mangngilngilangil kadaytoy. Pammutbuteng laeng, kinunkunami.

Ngem iti panaglabas dagiti aldaw, kimmaro a kimmaro dagiti damag. Adu kanon ti biktimada nga inwalangda lattan iti langalang. Innalada kano pay ti lalaem dagitoy.

Gapu itoy, rimsua dayta text brigade tapno mabagaan ken mapagannad dagiti umili. Naggapu kano kadagiti otoridad dayta nga addang.

Ket naparnuay ti aliaw ditoy Tanap. Nagbalinen a managbutbuteng dagiti umili aglalo kadagiti nakaawat iti mensahe.

Iti maysa nga agsapa a kaaddak iti sentro ti ilimi tapno ipatsek-upmi ti ubingmi, maysa a nataengan a babai ti inasitgan ti naubing a traysikel drayber. Dinamag ti drayber no agawiden ti babai (nga agur-uray laeng iti likud ti nagparkingak).

“Wen,” naisungbat.

“Yuraydak ngarud, nana, ta alaek laeng diay luganko,” kinuna ti drayber. Intudona ti nakaparking iti ballasiw ti kalsada.

Idi addan ti traysikel iti batogmi, madi metten a lumugan ti babai. “Adda kaduak, barok, diak pay gayam agawid,” kinunana iti drayber. Isu met a sumungad ti balasitangna a naggapu iti groseri iti ballasiw met la ti kalsada.

“Apay, nana?” masmasdaaw ti drayber.

“Adda pay gayam gatangenmi.”

Uray kasano a pilit ti drayber nga aguray, ken indisnudona payen nga itulod ida iti paggatanganda, saan nga immannugot ti babai. Pimmanaw ti drayber a mangkudkudkod iti ulona.

“Nalaka, aya, no agkumaw. Diak met mailasin,” kinuna ti babai iti balasitangna idi agangay.

Napaisemak laengen. Ta ti naubing a drayber, nagbalin nga estudiantek iti pribado a pagadalan ditoy ilimi. No nasao la koma ti babai ti rasonna idi adda pay ti drayber, uray ginarantiaakon a di agkumaw ti mangitulod kadakuada.

Nagbalin a managridam dagiti umili. Napaliiwko nga immadu dagiti nagannak a mangsukon kadagiti agbasbasa iti elementaria nga annakda. Narigat kanon no iti iruruar dagitoy iti eskuelada, kellaat lattan a piduten ida dagiti kumaw/agkumaw.

Nakaisurat iti sanguanan ti maysa nga agrakrakaya a balay iti asideg ti  elementaria iti ilimi,  ti pakdaar nga agannad kadagiti agkumaw. Nakalista pay dagiti numero ti plaka dagiti lugan nga us-usaren dagitoy a managdakdakes.

Iti damag, adun ti nagbalin a biktima dagitoy nga agkumaw. Adda kano sangapamilia a sinerrek ken pinapatayda idiay Magapit, Lal-lo. Kasta met nga adda intalawda kadagiti ili ti Gattaran, Gonzaga ken Aparri. Maysa pay a biktima ti inwalangda lattan iti ili ti Sta. Teresita. Ken asawa kano pay ti maysa a kapitan.

Itay nabiit, idiay kano Iringan (Allacapan) ti immatakeanda. Maysa nga estudiante ken gagangay nga umili dagiti biktima.

Ti modus?

Naka-van kano dagitoy a kumaw. Kellaat a  sardenganda ti magmagna a biktimaenda sada piliten nga ilugan. Di kano makapagkitakit ti biktima ta sakbay a makalaban (no adda panggepna a kasta), ideppelandan iti ramitda nga addaan iti koriente. Apagapaman a maawanan iti puot ti biktima.

No saan, agpammarang a pampasahero ti van. Agduduma iti edad dagiti pasaheroda kuno. Gayam, kakaduada. Agpik-apda iti kalkalsada (awan ti bukodda a terminal). Dagiti mailuganda, laklakaenda a biktimaen. No lumaban, patangadenda a dagus iti barsanga.

(Adda tuloyna)