Sinursuran: Dagiti relief goods — Tawid News Magazine - Weekly Ilocos News 📰
sinursuran-banner-sqSinursuranNi Jobert M. Pacnis

Dagiti relief goods

MAKAPAISEM man ‘tay aglablabas iti Facebook maipanggep kadagiti maibumbunong ita a relief goods. Adu met bassit kano idi naggapu iti ngato, Ngem iti kare-repack, ne, ay, bassit-usit laengen ti dimmanon kadagiti umili.

Maysa manen daytoy a ladawan ti kunniber. Nga uray panawen ti gawat, ti krisis, ti kalamidad, adddada latta dagiti dina maipaigid ti kinagamrudna. Masisirapda latta iti grasia nga adda iti sangoda.

A singkaaduanna, opisialda pay met a makuna! Ladawan koma ida ti kinapudno!

Iti agdama a sangsanguen ti sangalubongan, dakkel ti pinarnuayna a parikut iti panagbiag. Iti pagilian, adu dagiti mangnamnama iti aginaldaw a sueldoda a pangsuportada iti pamiliada. Ngem napilay amin dagitoy gapu kadagiti naipatungpal a lockdown gapu iti enhanced community quarantine wenno ECQ.

Gapuna nga adu ti mangnamnama iti ayuda nga ipaay ti gobierno. Nga idi pay damdamo ti nasaknap a parikut, impanamnaman ti administrasion ti tulongna kadagiti maapektaran a kailian.

Naibilin kadagiti barangay nga ited daytoy ti aginaldaw a kasapulan dagiti agindeg tapno iti kasta agtungpalda iti nayetnag nga ECQ.

A literal metten iti pannakaawat ti kaaduan. Adu a post kada komento ti naipanalbaag iti social media. Pagsasawandan ni kapitan ken ti sibubukel a konseho. Yanna kanon ‘tay rasionda a taraon? Naglawag kano met ti bilin iti ngato.

Ay-ay pay dagiti opisial iti barangay, piman! Adu latta ngamin ti nangednged ti pannakaawatna iti mangngeganda a damag. Saanda a panunoten a naimbag. Iti sibubukel a pagilian, adda ngata makaited iti inaldaw a taraon dagiti agindegna? Mano met laengen, aya, ti pondo ti barangay?

Agpayso, adda nailatang a pondo ti amin a barangay agpangato agingga iti nasional nga agpang. Ngem iti paset ti barangay, mano met laengen, aya? Ket no daytoy ti namnamaen dagiti nangisadagen iti biagda iti inaldaw, awan ti pagturongan no di riri ken di panagkikinnaawatan.

Mapabasol dagiti opisial a kinautda, imbolsada ti pondo! Manen, ay-ayda pay.

Datayo koma nga umili, ammotayo ti aguray. Papananna, aya, a di ibunong ti barangay ti ayuda, rasion wenno relief goods a makunkuna. Iti kinasaknap ti social media, agalanganda met, a, a di agtungpal iti pammilin. Mano met laengen nga agwaras ti damag/isyu no agkibaltang dagiti opisialtayo?

Ket no ania man ti adda a nabalinan ti barangay, saan koma metten a yaramidan ti dakkel nga isyu. Saan nga ipadpada ti bariotayo kadagiti nadumaduma a barangay. Aglalo kadagiti barangay kadagiti narang-ay a siudad. Amang a dakdakkel ti pondoda a pangalapkapanda iti ayuda kadagiti masakupanda.

Nakakalkaldaang a panunoten ita a panawen ti krisis, adu pay laeng ti agririri, agaapa, agpipinnasagid, ken di makaaw-awat. Kasla isuda ti kalaingan nga agiposte iti social media.

Maipaay dagiti relief goods kadagiti biktima no panawen ti kalamidad, ti nakaro unay a kalamidad kas koma iti panagbettak ti bulkan, ginggined, bagyo, layus ken gubat. Ken kas itoy sangsanguen ita ti sangalubongan a krisis. Awan koma ti maidaddaduma.

Ngem ti laeng yanna nga adat, adda met latta ngamin itta iti benneg dagiti mangipatpatungpal itoy nga aramid. Al-alaenda daytoy a gundaway a makaleksab iti dakkel. Dida mapanunot a pananggundaway daytoy kadagiti umili.

Isu a kasta la unayen ti pammilin ti Pangulo a saan a daytoy ti panawen ti panagkupit, ti panagkunniber (a kuna met dagiti pilosopo: apaman a malpas ti krisis, daytanton ti panawen nga ituloy manen ti maikaniwas nga aramid. Amaya!) wenno pananggundaway. Agkaykaysa koma ti amin.

Iti biang dagiti lokal nga opisial, no adda koma maawatda a reklamo iti panagibunongda kadagitoy a relief goods, arisitenda koma manen ti listaanda. Baka met no nabayagen daytoy ket adu ti rumbeng a mapabaro. Iti kasta, awan ti agsaksakit ti nakemna nga umili.

Saan ket a daytay no adda agreklamo, pagsawan ida iti di maikanatad. Saan daytay ibilang ida a kalaban. Maawatan koma ti riknada aglalo kadagitoy a panawen ti naidaddaduma a krisis.

Kadagiti met umili, saan koma nga alaen iti panagpungtot no kasta a di mapagustuan. Makisarita iti nasayaat. Saan nga iti social media ti pakarisutan ti parikut. Aglalo no di met gayam ammo dagiti mapaspasamak iti lugar wenno iti aglawlaw.

Ti pay nakakatkatawa ita a mapaspasamak kadagitoy a relief goods, isu daytay pannakapolpolitikana. Nakaimaldit ti nagdadakkelan a nagan no nagtaudan dagitoy. Nabatad a panagkampania, no panawen koma ti basingkawel.

Aglalo ket dagiti nakatugaw ti naynay a mangar-aramid itoy. Dakkel a gatad ti mabusbos iti panagpaaramid iti bag wenno plastik a nakaimalditan ti nagan ti politiko tapno ditoy nga ipalaon dagiti relief goods. No koma nausar laengen dagitoy a nayon a paggatang kadagiti maibunong a pagimbagan?

Maysa pay a dakkel nga isyu ditoy relief goods, isu ti di maawatan nga ar-aramiden dagiti kailian. Alaanda iti ladawan dagiti naawatda sa makapsionan iti kasla pananglais. No koma yamanenda lattan.

Ti kakaruan ditoy, isu daytay panagyamyaman dagiti dadduma. Panagyamyamanda kadagiti gobernadorda, mayorda, kapitanda wenno asino ditan a politiko a nagtaudan ti relief goods.

Dakkel a biddut daytoy. Iti kaano man a saan a nagtaud kadagiti lidertayo dagitoy nga ipapaayda a tulong wenno relief goods. Dagitoy ‘tay imbayadtayo a buis, kas umili. maitutop laeng a maisubli kadatayo iti wagas a mangipaay iti pagimbagan. Pagarigan, mailatang iti proyekto kas koma kadagiti kalsada, rangtay, pagadalan ken relief goods no panawen ti panagkasapulan.

Iti kaano man, saan a nagtaud iti bukod a kuarta dagiti lidertayo dagita nga ipapaayda. Nagtaud iti kaban ti gobierno a naur-or babaen ti panagbayadtayo iti buis. Saanda koma ngarud nga usaren a pangkawit iti rikna ti umili. Ken ad-adda a saanda koma a gamgamen. Kuarta ti umili dagita!

Ti rigatna pay, no dadduma, dagiti saan pay nga agbaybayad iti buis, dagiti sobsobra ti ili a kunada dagiti nareklamo unay. A no alaen ti husto, awan koma ti kalinteganda nga umarikiak aglalo iti social media. Ngem gapu ta makipagilida, maikagkagumaan latta met ti pannakairamanda kadagiti tulong.

Ti rumbeng koma a pagyamanan, dagiti agbaybayad iti buis. Dagiti natudio nga umili nga uray sangkatipping laeng a sapulda ket mabuisan pay. Saan a kas kadagiti dadakkel a tao a kasta unay ti siribda a manglikliklik iti panagbayadda iti buis.

Masagidko ketdi dagiti kidayko kadagiti indibidual a mangipapaay iti tulong kadagiti kailian manipud iti bulsada. Dagiti indibidual nga agingga’t mabalin saan a madakdakamat ti naganda a nangted iti relief goods. Dagitoy dagiti pudno a tao. Saanda a pagpangas ti itutulongda. (Ngem adda met dagiti umun-una ti publicity sakbay ti itutulongda. Kasta met dagitay nakaad-adu a ladawan ti kolektaenda nga iposteda iti social media tapno maammuan ti aramidda.).

Saksitayo la ketdi kadagiti luglugartayo nga ita a panawen ti krisis, adda dagiti kastoy a klase ti kailian. Dida kayat ti publisidad. Siuulimekda nga agkutkuti. Siuulimekda a tumultulong.

Ala, sapay koma ta malpasen ti isyu maipanggep kadagitoy a relief goods. Agkaykaysatayo ketdi a manglaban iti napaypayso a problema — ti COVID-19. Saan a dagiti relief goods.

Dinatayo koma ngarud pagsisinaen dagitoy a relief goods!