Footer

Dagiti Rituer iti Natalingenngen ti Pagtaengan (Maudi a paset)

Personal a pagkasapulan

Ti personal a pagkasapulan ti maysa a pakarakrakan iti maysa a pagtaengan ken langenlangen. Mapasamak daytoy kadagiti babbai a mapadpaidaman iti ayat a kas ken ni Milagros.

Idi damo a tawenda a nagdenna ken ni Andy, awan pagkunaan ni Milagros ken ni lakayna, no maipapan iti sex lifeda. Ammo ni lakayna a paragsaken iti ikamen, adu dagiti ammona a wagas a pangparugso kenkuana agingga iti umalimpatok tunggal agkanaigda.

Ngem nagbaliw dayta idi agsasarunon dagiti annakda.

Gapu iti kaadu dagiti trabahona iti balayda, saanen a maasikaso ni Milagros a tamingen ti bagina. No kasdiay nga aggawid ni lakayna, madatnganna ti baketna a nakasugabba wenno saan, agat-ling-et nangruna no kasdiay a kalkalpasna a naglaba wenno nagplantsa.

Adda dagiti tiempo a sakbay a pumanaw ni Andy, yarasaasna a masapa nga aggawid ket nakadigosen ni Milagros a datnanna.

Ngem saan a naawatan ni Milagros dagita a parapirip. Dagiti annakda lattan ti nakaituonan ti imatangna.

Idi damo, masapa met nga agaw-awid ni Andy. Ngem idi agangay, masansan metten a maladaw a sumangpet.

No agusisa ni Milagros, ipambarna nga adda mitingda, wenno saan, nag-blow-out ti maysa a barkadana.

Maysa nga aldaw, nakasukain ni Milagros iti nakupin nga ababa a surat iti bulsa ti pantalon ni lakayna. Naggapu iti maysa a babai nga agnagan iti Babe.

Nariing ti suspetsana. Nagsiput. Ditoy a naduktalanna nga adda kaopisinaan ni lakayna nga agnagan iti Babe.

Sinitarna ni lakayna. Inako ti lalaki a babaina ni Babe.

Ania ti nagliwayak kas asawa ta liniputannak? insidir ti babai.

Awanen ti panawenmo para kaniak! imper-ak ti lalaki.

Kayaten ni Andy nga agsinada. Ngem bimmallaet dagiti nagannakda. Imballakad dagitoy nga ikkanda ti bagida iti sabali pay a gundaway.

Nakita ni Milagros dagiti nagkamtudanna kas asawa. Nakita met ni Andy a nagbalin a managimbubukod, a dina inikkan iti ad-adu pay a pannakaawat ken ni baketna.

Nalukatan dagiti matada nga agassawa. Ket ita, naragsak manen ti panagdennada.

Kasapulan ti natibker a determinasion ken pinget-nakem iti panangliklik iti sulisog tapno agsebba iti pannakiabig a mabalin a pagbabawian ti agassawa iti kamaudianan ken pakarakrakan metten ti pagtaenganda. Kasapulan ti pannakaammo ti tunggal maysa kadagiti pagilasinan ti kaadda ti nadagsen a problema iti nagbaetan dagiti agassawa. Madakamat ditoy nga adda dagiti aw-awaganda a danger signals kas iti sumaganad: kaykayatmo a kadua dagiti katrabahuam ngem ti asawam; ibagbagam ti sekretom kadagiti gagayyem ken katrabahuam; mas naragragsakka a kaduam ti sabali a lalaki wenno babai ngem ti asawam; wenno agbalinka a defensive no masaludsod kenka no apay a nakaas-asidegka iti sabali a tao ngem iti asawam.

Kinaliway

Ti kinaliway ti ipatpategda ti maysa kadagiti kangrunaan a mangiduron iti babai wenno iti lalaki a mangtallikud iti pagtaengan a binangonda.

Kas iti daytoy: makumikom ni mister iti trabaho ken manmanon a makita ti pamiliana. Ni met misis, adda nangato nga ambisionna para iti bagina, kayatna a sawen, paggiddanenna ti careerna ken panangaywanna iti pamiliana. Iti panaglabas ti aldaw, awanen ti panawenda nga agkita ken agdenna nga agasawa! Iti agsapa, dida payen agkalanglang ta umigup laeng ni mister iti kape sa agdardarasen a pumanaw idinto nga agpakpakutibeng pay laeng ni misis iti iddana. Kasta a kasta iti inaldaw, agingga ti dimmanon ti panawen a saandan a maawatan ti maysa ken maysa ket mabalin a kunadan: “Ania koma pay la ti rason nga agtiponta?” Isu nga agsinada metten.

Panagabuso

Sabali pay a makagapu iti pannakarakrak ti maysa a pagtaengan ti panagabuso a malak-am ti babai wenno lalaki iti denna ti asawana.

Maibasar iti estatistika, tallo agingga iti uppat a milion a babbai ti makabkabil iti tinawen iti uneg ti pagtaenganda babaen ti asawa, sigud nga asawa, kamalala wenno nobioda.

Innem a pulo met a porsiento kadagiti ubbing ti mismo a makakitkita iti amada a mangkabkabil iti inada.

Ti pannakaabuso ti pinakagrabe a rason ti panagsina dagiti agassawa.

Ngem agingga a saan a rumimbaw ti panagpasensia ti tunggal maysa, addanto latta dagiti di panagkikinnaawatan iti uneg ti pagtaengan a no saan a maaluadan, posible a pakarakrakan ti panaglangen ti agassawa nga agtungpal iti panagsinada.

Kayarigan ti pagtaengan ti maysa nga umok a kasapulan a pagtinnulongan dagiti agassawa a sukogen tapno agbalin a nabaked ken natalingenngen ket saan a marakrak iti isasangbay ti aniaman a pannubok wenno allawig iti biag.#