Adu dagiti makagapu iti pannakarakrak ti langenlangen dagiti agassawa. Saggaysaentayo ida nga ibinsabinsa.
Pannakiabig
Iti maysa a panagadal nga insayangkat ti maysa a warnakan, naduktalan nga uppat a pulo a porsiento, no di nangatngato pay, kadagiti lallaki nga addaanen iti asawa ti agsebba iti extra-marital affair.
Iti sabali a bangir, nasurok a tallopulo a porsiento kadagiti babbai a naasawaan nga adda iti edad tallopulo agingga iti tallopulo ket lima ti maaddaan ti extra-marital affair.
Mangdakamattayo iti dua a rason a natakuatan ti warnakan a mangiduron ken ni lalaki wenno babai a makiabig a puon ti pakarakrakan ti umok a binangonda.
Umuna, agsipud iti nabayagen a gura ken sakit ti nakem ti babai wenno lalaki iti asawada. Apay a kasta ti mariknada?
Alaentayo a pagarigan da Mario ken Annabel. Idi agar-arem pay ni Mario ken ni Annabel, adda latta iggemna a sabong, wenno tsokolate wenno ania ditan a regalona. Masansan nga awisen ni Mario ni Annabel a mapanda agpasiar iti mall, wenno iti parke, sada mangaldaw iti maysa a nalatak a restaurant.
Dagitoy a galad ni Mario ti maysa kadagiti nakaawisan ni Annabel tapno iyetnagna ti nasam-it a “wenna” iti baro.
Idi katiptiponda, kastoy latta ti ar-aramidenda iti Sabado wenno Domingo. No aggapu ni Mario iti trabahona, adda latta yawidna a masaramsam wenno pasarabona. No kasusueldona, iti ruar iti pangrabianda.
Ngem idi addan anakda, bimmattaway ti iruruarda. No sumangpet ni Mario, dagiti metten annakda ti kaay-ayam wenno kagantilna. Wenno saan, dagus a luktanna ti TV ket agbuya a nakailad bayat nga umin-inom iti serbesa. Iti bigat, dina payen malagip nga agkan ni Annabel sakbay a pumanaw a mapan agopisina.
Adda dagiti rabii no kasdiayen a nakaturog dagiti annakda nga agdigos ni Annabel sa agbangbanglo ken isuotna ti narasay a nightie. Ngem no umabayen ken ni Mario, agur-urok metten daytoy.
Naur-urnong dagitoy a sakit ti nakem ken gurana iti asawana. Idi damo, inalikumkomna iti barukongna dagitoy a marikriknana. Pinadasna nga awaten ni lakayna. Ngem kastay kunada, adda tiempo nga aglippias lattan dagiti nauk-ukkon a rikna ket bumtak a kasla bulkano nga agtungpal iti pannakarakrak ti langenlangen wenno iti pannakiabig ti maysa a babai.
Kasta ti napasamak ken ni Annabel. Naam-ammona ni Anthony iti maysa a pasken a tinabunuanna a solsolo. Idi damo, dina intaltalek dagiti kidday ni Anthony ken sagawisiwna no kasdiay a lumabas iti kanto iti ruar ti balayda.
Ngem idi agangay, iti semsemna iti asawana, nakisinninged iti baro. Idi damo, agiinnisemda laeng nga agsabat. Maysa nga aldaw, nasarakanna laengen ti bagina a makiin-innangaw iti baro. Dua bulan kalpasanna, nariinganna laengen ti bagina iti maysa a nalaka nga otel a kaduana ni Anthony.
Kalpasan daydiay a pasamak, naamiris ni Annabel ti dakkel a biddutna. Ngem ania pay ti maaramidna? Saannan a maisubli pay ti kinapudno a liniputanna ni lakayna.
Dimmawat iti pammakawan ken ni lakayna. Ngem saan a pinastrek ti lalaki iti pagtaenganda. Impalladawna ketdi dagiti aruaten ni baketna iti ruar.
Iti naudi a damag ken ni Annabel, naggawid iti probinsiada. Agingga kadagitoy nga aldaw, di pay makatadog iti pagtaenganda ken ni Mario wenno ipalubos daytoy a makadennana uray iti apagkanito laeng dagiti annakda.
Gapu laeng ti sakit ti nakem ken gurana iti asawana, nakaaramid ni Annabel iti basol ket naigarangugong iti derraas a dina pulos pakalung-awan.
(Adda tuloyna)
