Iti Duyog ti Singasing: Dagiti sarsarita para ubbing (Umuna iti tallo a paset) | Tawid News Magazine - Weekly Ilocos News đź“°

Dagiti sarsarita para ubbing (Umuna iti tallo a paset)

Idi radio pay laeng ti  kangrunaan a taudan ti impormasion, paboritotayo a denggen dagiti putar (daydi) Angkel Pete Aromin (awan relasionmi, kas pangawagmi  laeng kenkuana)  a napauluan iti “Dagiti Sarsarita ni Angkel Pete” a nabayag a nangilillili ti mugingtayo iti yuyeng ti imahinasion; a kunaentayo a nabayag a nangtaraon ti mugingtayo kadagiti sarsarita. Nangngegan daytoy kadagiti kangrunaan a radio stations iti Northern Luzon babaen ti produksion ti MPBC; dagiti sarsarita a nangited iti binagbag-oy a liwliwa ken impormasion a nangtaraon iti adu a muging iti dinekdekada.

Idi inayabanen ti Namarsua (daydi) Angkel Pete, sinublat ni Amor Cabaccang, ket pinauluanna met iti “Dagiti Sarsarita ni Lola Angela.” Agingga iti agdama mangngegan pay laeng iti tangatang idinto a dinekada metten daytoy.

Saanko a mabubos a maisip ti panagwerret dagiti panunot dagiti dua a mannurat (Aromin ken Cabaccang), no kasanoda a pinagubbog ti mugingda kadagiti sarsarita a para ubbing ta immabut ti panagsursuratda iti dinekdekada, iti inaldaw-aldaw—Lunes agingga iti Sabado..

Nupay nagtrabahotayo met iti MPBC a kas scriptwriter iti innem a tawen, saantayo a nagsurat  iti sarsarita a para ubbing. Kadagiti sangapulo ket uppat a drama a produksion ti MPBC, sangapulo ket tallo ti intay nagsursuratan, ti laeng sarsarita a para ubbing ti saan.

Nupay kasta, iti kapaliiwantayo kadagiti putar da Angkel Pete ken Amor Cabaccang, saanda laeng a didaktiko no di ket simmalpada met kadagiti sensitibo a panirigan ken paspasamak a naigamer iti lasag ken dara ti gimong. Dagiti sarita a saan laeng a mangbagbaga no di ket luktanna ti muging iti kabarbaro nga eksperiensa wenno mangguyugoy (persuade), iti kinainosente ken panangiladawan iti panangawat ti maysa nga ubing iti  aglawlawna, iti biagna a kas ubing, ken pananganalisarna kadagiti sumagpat a kabarbaro a banag kenkuana.

Ti kinainosente, panagtakuat, panangawat ken pannakiramraman iti mapaspasamak iti gimong ken panangiparang kadagiti sensitibo a panirigan ti ammotayo a depinision ti sarsarita.

Nabiit pay a naipasngay dagiti sensitibo a panirigan ta nabayag a saan a makaaliwaksay dagiti sarsarita iti pagilian ta dinominaran dagiti didaktibo a tema.

Ngem ita a panawen, nagbalbaliwen ti panirigan ti kaaduan a mannurat kadagiti sarsarita ta simmagpatdan kadagiti putar a nasken ti pannakibiangda iti gunay ti gimong ken iti panagaddang ti panawen.

Iti bukodtayo a panirigan nasken laeng a makiramraman dagiti ubbing wenno makibiangda iti bukodda a gimong tapno saanda nga agkalaegan ken agtaytayyek iti maymaysa wenno sumagmamano laeng a tema. Iti ababa a pannao, nawayan  dagiti sarsarita (para ubbing) nga agdakiwas iti sadinoman a yuyeng ti imahinasion. Nupay agdakiwasda, saanda nga umadayo iti konsepto ti kinainosente ti maysa nga ubing.

Iti Ilocano Children’s lit, dagiti konsepto maipapan ti pananggamulo dagiti ubbing iti bukodda a biag ket maanninaw kadagiti putar (daydi) Reynaldo A. Duque ken Clesencio Rambaud;  Masarakan met kadagiti putar ni Sherma Benosa ti panangiladawan kadagiti nakain-inosente a sarsarita  ta naigamer sadiay ti kinaubing—aramid ken kapanunotan dagiti ubbing.

Ti kinainosente ket saan a maiyadayo kadagiti sarsarita uray no gamuluenda ti bukodda a biag, iti man pannakiramanda iti mapaspasamak iti gimong, iti man panagtakuatda iti kabarbaro a banag, iti panangiduronda a nawaya ti kabukbukodanda a pangngeddeng, ket iti panangipresentarda kadagiti sensitibo a panirigan.

(Maituloyto)