Footer

Dakdakkel a benepisio dagiti mannalon, manamnama iti napabaro a pagalagadan iti excise tax ti tabako: NTA

AMIN a bingay ti industria ti tabako manipud iti koleksion iti excise tax ti sigarilio, kas sagudayen iti Republic Act (RA) 7171 ken RA 8240, ket maiturong laeng kadagiti nakaisangratanna a benepisario, daytoy ti kinuna ti dadaulo ti National Tobacco Administration itay nabiit.

“Dayta ti kayat nga ipanamnama unay ti gobierno kadagiti amin a maseknan a mannalon ken  lokal a gobierno,” kinuna ni NTA Administrator Edgardo Zaragoza iti pannakitaripnongna kadagiti lokal a lider ken dadduma pay nga opisial iti provincial capitol ti Laoag City idi Marso 14

Impalawag pay ti hepe ti ahensia nga awan ti nagbaliwan ti pannakaipakat ti proyekto, malaksid ti kaadda dagiti mekanismo a kayat nga ipakat ti linteg tapno maipasigurado met laeng a dagiti mannalon ti mairanud kadagitoy a proyekto .

Kas sagudayen iti Seksion 3, Rule VIII ti implementing rules ti RA 10351 wenno ti baro a Sin Tax Law, mabilin ti Department of Agriculture ken ti NTA a mangaramid kadagiti annuroten a mekanismo tapno mabantayan a nasayaat ti pannakausar kadagiti pundo nga intuding ti RA 7171 ken RA 8240 a rumbeng a maipaay kadagiti agmulmula iti tabako.

Segun ken ni Zaragoza, dagiti latta met lokal a gobierno, babaen dagiti mayor wenno gobernador ti agpili kadagiti kayatda a proyekto wenno programa nga isayangkatda kadagiti lugarda.

“Saan nga inagaw ti Sin Tax Law ken ti IRR dayta a bileg kadagiti lokal nga ehekutibo,” innayonna.

Kinunana a gapu pay  iti baro a pagalagadan iti pannakairuar ken pannakausar ti pundo manipud iti koleksion iti excise tax, kas ipekpeksa met ti RA 10351, addan gundaway dagiti nadumaduma nga stakeholder iti industria a mangkita no ti implementasion dagiti proyekto wenno programa ket agserbi met laeng kadagiti mannalon, ti industria ti tabako ken ti panagdur-as dagiti amin nga ili.

“Daytoy ti rason no apay a kasapulan unay dagiti mannalon ken dadduma pay nga stakeholder a makiraman kadagiti lokal a lider iti pannakabalabala dagiti master plan para iti panagdur-as ti industria iti tabako,” pananginayonna.

Gapu iti baro a pagalagadan, nangisayangkat ti NTA iti agsisina a consultative meeting idi Pebrero para kadagiti lokal a lider, dagiti pribado a sektor, ken dagiti lider dagiti mannalon.

Linawlawagan ni Zaragoza a sabali ti IRR ti RA 10351 a rimmuar idi Pebrero ken ti baro a pagalagadan a pagtitinnulongan ita a sursuraten ti Department of Budget and Management, ti DA ken ti NTA a para iti RA 7171 ken RA 8240.

Impanamnama pay ni Zaragoza nga aniaman a rummuar a pagalagadan para iti RA 7171, addanto pammatalged a probision ditoy a dagiti pundo nga agtaud kadagiti koleksion iti excise tax ket mapan laeng kadagiti pagimbagan ken pagdur-asan dagiti mannalon, ti sibubukel nga industria ti tabako, ken dagiti amin nga ili.

Ibagbaga ti Sin Tax Law a ti bingay ti koleksion iti buis kas sagudayen ti  RA 7171 ken RA 8240 ket maaramat a mangpalag-an ti kasasaad dagiti agmulmula iti tabako a mabalin a maapektaran gapu iti manamnama a panagbaba iti pannakasapul iti sigarilio iti merkado gapu met laeng iti kangina iti buis.

Kas maisurot met iti RA 8240, ibagbaga pay ti baro a sin tax law a dagiti pundo manipud iti bingay dagiti lokal a gobierno kadagiti probinsia nga agmulmula iti burley ken native a tabako, ket maaramat laeng kadagiti programa a mangbirok kadagiti alternatibo a pamastrekan dagiti mannalon a nalaka latta met koma a gumanansiaanda iti dakkel.

Para kadagiti lokal a gobierno kadagiti probinsia nga agmulmula iti Birhinia, kas ipekpeksa iti RA 7171, masurot latta ti dati a pagannurotan wenno dagiti listaan dagiti proyekto a pakaaramatan laeng iti pundo. (Manipud iti report ni Neyo Valdez)