Dance troupe ti Caoayan, nagkiddaw iti tulong iti provincial board

VIGAN CITY – Nagkiddaw ti Salinlahi Dance Troupe ti Caoayan, babaen ken ni dati a konsehal ti Vigan City Germy Singson-Goulart iti tulong pinansial iti Sangguniang Panlalawigan para iti panagpartisiparda iti streetdancing competition ti Panagbenga Festival a maangay iti Baguio City inton Pebrero 23.

Kiniddaw ni Goulart ti tulong pinansial para iti transportasion ken P30,000 para iti uniporme ti tropa.

Kinuna ni Vice Gov. Jerry Singson nga idatagna ti kiddaw ken ni Gov. Savellano tapno maisagana ti dua a bus a pagluganan ti tropa ken ti pondo para iti unipormeda.

Ti Salinlahi Dance Troupe a buklen ti 80 a dancers ti nangabak iti Longganisa streetdancing competition, open category, idi Enero 22 iti panangrambak daytoy a siudad ti panagbalinna a component city.#