Dancing fountain, pinapigsana ti imahe ti Ilocos Sur kas tourist destination – Senate Pres. Drilon

VIGAN CITY – Nainaguraran  ti second phase ti dancing fountain ditoy nga ili kas paset ti ad-adda pay a pannakaidur-as ti turismo ditoy probinsia a naigiddan iti panangrugi ti Kannawidan Ylocos Festival itay Enero 29.

Kangrunaan a bisita iti daytoy nga okasion ni Senate Pres. Franklin Drilon, dagiti kabagian daydi nag-Pres. Elpidio Quirino ken dagiti movie ken television celebrities a pakaibilangan da Pops Fernandez ken Alice Dixon.

Binendisionan ni Monsignor Vicente Avila, kura paroko ti siudad, ti dancing fountain babaen ti panangbayabay kenkuana dagiti agtuturay ti probinsia nga indauluan da Gov. Ryan Singson, Vice Gov. Deogracias Victor Savellano, dati a Gov. Luis Singson, dagiti bobokal ken dagiti mamayor ti probinsia nga indauluan ni Mayor Germelina Singson-Goulart.

Naipasdek ti Phase 2 ti dancing fountain iti met laeng Plaza Salcedo, iti mismo a nakailugaran idi ti mapa ti pagilian iti dayaen ti immuna a naipasdek a dancing fountain (Phase 1) a nagbalinen a nalatak a pagpallailangan ken pagbuyaan dagiti sangsangaili ken agindeg iti sardam.

Maysa a pakaidumaan daytoy Phase 2 ti dancing fountain ti panagsala dagiti pussuak ti danum bayat ti panagandap ti mapa ti Pilipinas iti nadumaduma a maris.

Dinayaw ni Drilon ti pannakaipasdek ti nasao a dancing fountain a kunana nga umuna a naipasdek iti intero a pagilian.

Kinuna ti senador a daytoy a proyekto ti gobierno probinsial a damo nga inyussuat ni dati a Gov. Luis “Chavit” Singson ket pinapigsana ti imahe ti Ilocos Sur kas maysa a tourist destination iti pagilian.

Kinuna ti senador  a maysa a “natured nga addang” ti inaramid dagiti agtuturay iti pannakaipasdek ti nasao a dancing fountain a saan laeng a pangawis kadagiti turista no di pay agbalin a “unifying activity” para kadagiti agindeg iti Ilocos Sur.

Nagyaman met ni Gov. Singson iti senador gapu iti panangsuportana iti nasao a proyekto.

Kinuna ni Gov. Singson a malaksid nga adda paglinglingayan  dagiti tattao a buyaen, mabalin pay dagiti agbuya ken ubbing ti agbabasa wenno agdigos iti rabaw ti agandap-agpukaw a mapa ti Pilipinas bayat ti panagpussuak dagiti danum.

Kinuna ti gobernador a kasla nagsubli ti kinaubingna idi makitana dagiti kailianna a naragsak a nagdigos bayat ti panagpussuak ti fountain.#