Footer

Dati a bokal, posible nga agbalin a mangibagi kadagiti kooperatiba iti Kamara

STA. CRUZ, Ilocos Sur – Maysa a dati a bokal ditoy probinsia ti posible nga agbalin a congressman a mangibagi kadagiti kooperatiba iti pagilian.

“Barbareng, adda gundaway nga agkadduakami (iti Kongreso) ken ni Joe (dati a Bokal Jose Ping-ay, Jr),” kinuna ni House Deputy Speaker Eric Singson bayat ti  launching ti kaunaan nga ATM service iti amin a kooperatiba iti Amianan a Luzon nga imatonan ti Sta. Cruz Savings and Development Cooperative (SACDECO).

Kinuna ni Ping-ay a manamnama ti panangiparuar ti Korte Suprema iti desisionna mainaig kadagiti partylist groups a nakagun-od iti nasursurok ngem dua a porsiento iti kadagupan a butos iti napalabas a nasional nga eleksion idi Mayo 2007.

Segun ken ni Ping-ay, adda ti COOP-NATCCO, political arm ti National Confederation of Cooperatives (NATCCO) iti pagilian, iti maikawalo iti sangapulo ket tallo a partylist groups a nakagun-od iti nasursurok ngem dua a porsiento iti kadagupan dagiti butos iti eleksion idi 2007.

Iti dayta nga eleksion, binutosan dagiti umili dagiti partylist groups a mangibagi kadagiti nadumaduma a sektor iti Kamara.

“No agbalin a favorable ti desision ti Korte Suprema, posible a maaddaan ti COOP-NATCCO iti dua wenno tallo pay a representative iti Kongreso,” kinuna ni Ping-ay, agdama a bise presidente iti nasao a grupo.

Iti agdama, ni laeng Guillermo Coa, ti kakaisuna a representative ti COOP-NATCCO.#