Dati a CAFGU, nagandat ti biagna

MAGSINGAL, Ilocos Sur – Nagandat ti biag ti maysa a dati a CAFGU member bayat ti panagdaliasat ti traysikelna iti kalsada ti Barangay San Ramon ditoy nga ili idi lawasna.

Nakatapuak ni Ryan Ben Cuaresma, 28, baro, dati a CAFGU member ken residente iti Barangay Sarsaracat ditoy nga ili iti luganna ket saan a napuntaan dagiti nanggandat iti biagna.

Nabigbig dagiti suspek a da Franklin Osana, residente iti Barangay Patong, ken ni Derick Parbo, residente iti Barangay Maas-asin, ditoy met laeng nga ili.

Napilaan iti frustrated murder dagiti suspek iti provincial prosecutor’s office.

Naammuan iti report a bayat ti panagdaliasat ti traysikel a minaneho ni Cuaresma iti barangay road ti nadakamat a lugar idi agarup alas 7:30 ti bigat ti Hunio 8, inobertekan dagiti suspek a naglugan iti XRM motorcycle sada pinaltogan ti biktima ngem nakatapuak daytoy ket ti laeng tangke ken chain guard ti motorsiklo ti napuntaan.

Naglibas a dagus dagiti suspek kalpasan ti pammaltog.

Nakarekobre dagiti polis iti tallo a kapsula mula iti cal. 45 iti nakapasamakan ti pammaltog.

Mapapati a dati a susik ti motibo ti pannakagandat ti biag ti dati a CAFGU member.#