Dati a congressman ti Ilocos Sur, mawayawayaan Enero 14

VIGAN CITY – Mawayawayaan ni dati a Congressman Ronald Singson iti maikadua a lawas ti Enero 2012, daytoy ti impakaammo ti kabsatna nga agdama a congressman ti first district ti Ilocos Sur.

Kinuna ni Cong. Ryan Luis Singson a makadennadanton ti kabsatna a ni Ronald iti Enero 14 agsipud ta maikaronan ti sentensiana.

Kinuna ni Singson a naisapa ti pannakawayawaya ti manongna agsipud iti “good behavior” nga imparangna bayat ti pannakaibaludna iti Hong Kong.

Innayon ti diputado nga iti naudi nga isasarungkar ti inana iti kabsatna, “nasaysayaaten ti kasasaad ni Apo Ronald, naisemen daytoy agsipud ta “ammona metten a dandani aggawiden.”

“Uray dakami a kakabsatna, dimi malapdan ti ragsakmi ta sumagmamano la nga aldawen, makaduami manen ni Apo Ronald,” kinuna ni ub-ubing a Singson.

Sinentensiaan ti Hong Kong court ni dati a Congressman Ronald iti makatawen ken innem a bulan gapu iti panagikutna iti droga.

Maipalagip nga inaresto dagiti otoridad ni Singson iti airport iti Check Lap Kok International Airport iti Hong Kong idi Hulio 11, 2010 kalpasan a nasukalan iti ikutna ti cocaine nga agdagsen iti 6.67 grams ken 2 a tablet ti valium.

Iti interbiona iti media, impetteng ni Gov. Luis Chavit Singson a na-frame up ti anakna ngem kapilitan nga inannugot daytoy ti panagikutna iti droga tapno mapalag-anan ti dusana.

Sinentensiaan ti korte ni Singson a mabalud iti makatawen ken uppat a bulan gapu iti panagikutna iti droga ken kanayonan a dua a bulan gapu iti panagikutna pay iti valium kalpasan a namati ti Hong Kong judge a para laeng iti personal nga aramat ni Singson, saan a para lako, ti droga a nasukalan iti ikutna.

Kalpasan ti pannakasentensia ni Singson, naglusulos iti takemna kas pannakabagi ti umuna a distrito ti Ilocos Sur ket naideklara ti puestona a bakante.

Ti kabsatna a ni Ryan ti nangabak iti special election a naangay para iti binakantean ti dati a congressman a puesto iti umuna a distrito ti probinsia.

Kinuna ni Cong. Singson nga apaman a mawayawayaan ti kabsatna, sarabuenda babaen ti maysa a party ken thanksgiving mass.

Iti maysa nga interbiona iti media, kinuna ni Gov. Singson a saanen nga agsubli iti politika ti anakna a ni Ronald no rummuar iti pagbaludan ket isunton ti mangimaton kadagiti negosioda iti Metro Manila ken iti ballasiw-taaw.#