Dati a gobernador ti Abra, 7 pay, nasaklangan iti kaso a murder

QUEZON CITY – Pormal nga indatag ti kapolisan ditoy ti rekomendasionna a mapilaan ti dati a gobernador ti Abra ken pito pay a tattao iti dua a counts tunggal maysa iti murder ken frustrated murder iti pannakapapatay ti maysa a diputado idi 2006.

Impila ti hepe ti District Criminal Investigation and Detection Unit ditoy a siudad Supt. Franklin Moises Mabanag, ti dua a kaso tunggal maysa iti murder ken frustrated murder maikontra kada dati a Gobernador ti Abra Vicente Isidro Valera, Sgt. Leo Bello,  Jerry Turqueza,  maysa nga “Uncle”, Jun, Jeff-Jeff, Mel and Ka Dado, agindeg amin iti Abra, gapu iti pannakapapatay ni Diputado Luis Bersamin, Jr., 62, ken ti badigardna a ni SPO1 Adolfo Ortega, 49.

Napaltogan ni Bersamin iti sanguanan ti Mt. Carmel Church iti New Manila, ditoy a siudad, iti itatabunona iti kasar ti kaanakanna idi Disiembre 16, 2006. Nairaman a natay iti pammaltog ni Ortega idinto a nasugatan ni Allan Sawadan, drayber ti diputado, ken maysa nga agtawen iti 13 a lalaki.

Immun-unan a nasaklangan iti Quezon City Regional Trial Court Branch 84 da Freddie Dupo, dati a bise mayor ti La Paz, Abra; Sonny Taculao, nagmaneho iti motorsiklo a naaramat a getaway vehicle; Dominador Barbosa ken Rufino Panday, dati nga Army Surgeant.

Iti nasapataan nga statement da Dupo ken Taculao, intudoda ni Valera nga ulo ti pammapatay ket ni Turqueza ti gunman.

Mapapati a plinano ni Valera ti pannakapapatay ni Bersamin gapu iti panggep daytoy nga agkandidato para gobernador ti Abra idi 2007.

Pinaglibakan ni Valera nga adda pannakainaigna iti pammapatay.

Idi maarestoda ken ni Dupo iti Antipolo City, nakakumpiska dagiti polis ti cal. 45 iti ikut ni Taculao. Iti ballistic tests a naisayangkat iti paltog, limtuad nga ag-match dagiti bala daytoy ken dagiti narekobre ti polis iti nakapasamakan ti krimen.#