Dati a hepe ti RID, naipromot a provincial director

SAN FERNANDO CITY – Pormal a nagtugaw ti dati a hepe ti Regional Intelligence Division iti PRO1 a kas baro a provincial director ti La Union iti panaginnallawat iti takem a naangay iti Camp Diego Silang, Carlatan ditoy a probinsia idi Enero 7.

Inyawat ni Police Senior Supt. Ramon O. Purugganan ti komandansiana ken ni Police Senior Supt. Ramon L. Rafael babaen ti naangay a turn-over of command ceremony nga inimatangan dagiti police officials, ken sangsangaili a pakairamanan ni Governor Manuel C. Ortega.

Nasurok a dua a tawen a nagtakem ni Puruganan kas provincial director ti La Union.

Iti panagbitla ni Puruganan, kinunana a signipikante a bimmassit ti krimen bayat ti panagtakemna a kas provincial director iti La Union.

Kinuna met ni Rafael a dakkel a karit kenkuana ti mangituloy iti nasayaat a gapuanan ti sinuktanna.

“I thanked Governor Ortega for this new position… and together, with the help of the stakeholders of this province, the local community and all, we shall not fail, we shall continue to sustain the gains, especially in preparation for the midterm elections (Agyamanak ken ni Governor Ortega gapu iti daytoy kabarbaro a puesto… ket iti panagkakaduami, babaen ti tulong dagiti stakeholders iti daytoy a probinsia, ti lokal a komunidad ken amin, ituloymi a susteneren dagiti nagun-odan, nangruna iti panagsagana iti midterm nga eleksion.),” innayon ti baro a provincial commander.

Kabayatanna, nagtitipon dagiti personnel ti 1st Regional Public Safety Battalion (RPSBI) ken ti PNP National Support Units a nakabase ditoy PRO1 a nangselebrar iti 19th PNP Ethics Day idi agsapa ti Enero 7.

Sangaili ken espiker iti nasao a pasek ni Napolcom Regional Director Angelita B. Concepcion nga imbagian ni Asst. Regional Director Evangeline R. Almirante.

Iti panagbitla ni Almirante, inyunay-unayna ti kinapateg ti etika nangruna kadagiti police officers a nakaipabaklayan ti panagaramid iti nasayaat iti maikanatad a tiempo.

Kalpasan ti flag raising ceremony, naangay ti maysa a thanksgiving mass iti kapilia ti PRO1 a sinaruno ti maysa a lektiur mainaig iti graft and corruption practices.#