Dati a susik kitkitaen dagiti polis ramut ti pannakapapatay ti barangay kagawad

CABUGAO, Ilocos Sur – Dati a susik ti kitkitaen dagiti polis a ramut iti pannakapapatay ti maysa a retirado a polis ken agdama a barangay kagawad iti Barangay Bungro ditoy nga ili idi malem ti Disiembre 15.

Iti insayangkat dagiti polis a follow-up investigation, limtuad a nagsubang idi malem ti Septiembre 9, 2012 da Carlito Sumagit, 64, naasawaan, kagawad ti Barangay Bungro ken maysa a Jerry Sonido y Agbayani, a.k.a. “Garciano”, addaan iti legal nga edad, naasawaan, ken residente met laeng iti nasao a barangay a nagtungpal iti mapapati a panangatake ken panangkabil ti suspek iti kagawad.

Mapapati a binallaagan pay ni Sonido ni Sumagit babaen dagiti sumaganad a balikas: “Gago, laglag, manipud ita bilbilangem ti orasmon; inka ibaga ken kapitan, agpadakayo nga mulmulloong.”

Kinuna met ni Angela, 62, asawa ti biktima, temporario nga agnaed iti Sitio Sagsagat, Barangay Cuantacla, Cabugao, a naminsan, naibaga ti asawana nga “idarumta man la ketdin, kankanayonnak met la nga ikaskastoyen,” a ti suspek ti mapapati a nakaiturongan dagiti balikasna.

Segun iti inisial nga inbestigasion dagiti polis, aggawiden ni Sumagit a nakalugan iti MCX motorcycle ket bayat ti panagdaliasatna iti barangay road ti Bungro, pinaltogan ti sumagmamano a daras ti saan pay a nabigbig a tao.

Naitaray ti biktima iti Suero General Hospital ngem naideklara a dead on arrival ti nangtaming kenkuana a doktor.

Kas maibatay iti autopsia, lima a bala ti naitama iti nadumaduma a paset ti bagi ni Sumagit a puon ti nakatayanna.

Nakarekobre dagiti inbestigador iti pito a kapsula manipud iti cal. 45 iti nakapasamakan ti krimen.

Nupay kasta, kiniddaw ti balo ti biktima a maikkan iti naan-anay a tiempo kalpasan ti pannakaidulin ti lakayna no agipila iti kaso maikontra iti/dagiti suspek.#