Dati a security guard, napapatay

NARVACAN, Ilocos Sur – Awan pay ti suspek dagiti polis iti pannakapapatay ti maysa a dati a security guard sadiay Barangay San Jose ditoy nga ili idi aldaw ti Oktubre 22.

Nupay kasta, maysa nga anggulo a kitkitaen dagiti polis iti panagimbestigada no adda pakainaigan ti pammapatay iti dati a trabaho ti biktima.

Napapatay ni Benedict Carbonel y Escobar, 40, naasawaan, dati a security guard, ken residente iti Barangay Sucoc, Narvacan, Ilocos Sur babaen iti di pay nabigbig a suspek a mapapati a naglugan iti motorsiklo.

Segun iti maysa a dina kayat ti nagpabigbig nga empleado iti Regional Trial Court ti Narvacan, sakbay ti pamma-patay, nagatendar da Carbonel ken ti asawana a managan Cynthia iti maysa nga hearing ti maysa a kaso iti nasao a korte.

Iti inisial nga inbestigasion dagiti polis, agdaldaliasat iti daan a national highway ni Carbonel a nakalugan iti nangisit a SYM motorcycle, kakuyogna ti asawana a back rider, idi manipud iti likudanna, mapapati a pinaltogan ti suspek iti sumagmamano a daras a nagsagrapanna iti sugat iti nadumaduma a paset ti bagina ken nakagudasanna a dagus.

Naammuan a saan a naan-ano ti asawa ti biktima.

Nakarekobre ti SOCO team manipud iti Ilocos Sur Provincial Office iti 10 a kapsula a mapapati a naggapu iti cal 9mm.

Iti pannakaisurat daytoy, madama ti panagpalutpot dagiti inbestigador no ania ti motibo ti pammapatay.#