Dati a sheriff ti korte, 3 pay, natiliw iti buy bust operation

VIGAN CITY – Pito a tattao a pakairamanan ti maysa a dati a sheriff ti korte ti natiliw iti nagsasaruno a buy bust operations nga insayangkat ti kapolisan iti San Ildefonso, Narvacan, ken ditoy siudad idi Oktubre 2.

Uppat a tattao ti inaresto dagiti nagtitipon nga elementoĀ  ti ISPAIDSOTG, Vigan City Police Station nga indauluan ni Police Supt. Maximo Taclas ken PDEA ISSET nga indauluan ni Intelligence Officer 3Ā  Darnel L. Bacate iti insayangkatda a buy bust operation iti maysa a balay a pagindegan ti maysa a Norma Florendo sadiay Encarnacion Street, Barangay V, Vigan City idi agarup alas 4:00 ti malem ti Oktubre 2 a nakasamsamanda kadagiti droga ken drug paraphernalia.

Karaman kadagiti naaresto da Romeo Ang Liquete, 43, naasawaan, ken residente iti Brgy. III; Terencio Florendo y Gonzales, 64, naasawaan, dati aĀ  sheriff iti regional trial court iti Vigan City, ken residente itiĀ  Brgy. VI; Rustico Palapala y Monzon, 52, naasawaan, tricycle driver ken residente iti Brgy. IV; ken Bartolome Piano y Oliva, 24, baro ken residente iti Brgy. Capangpangan, Vigan City.

Malaksid ti nailako a maysa a heat-sealed transparent plastic sachet a nagkarga iti white crystalline substance a mapapati a shabu, nakakumpiska pay dagiti polis iti 10 a heat-sealed transparent plastic sachets a nagkarga iti mapapati a shabu, maysa a leather wallet, maysa nga eye glass case, assorted drug paraphernalia a pakaibilangan ti awan naggianda a plastic sachets, lighters, scissor, rolled aluminum foil ken 5 a sag-P1,000.00 a naaramat iti buy bust operation.

Kinuna ni Taclas a nakalista dagiti suspek iti drug watch list idinto a sinipsiputandan ti aktibidad dagitoy a nagtungpal iti pannakaisayangkat ti buy bust operationĀ  a sinaksian da Barangay Captain Ramon Dumbrique ken pannakabagi ti media ken DOJ.

Kinuna ti hepe a kumpirmado a shabu ti linaon dagiti nasamsamda a plastic sachets nga impaamirisda iti crime laboratory sadiay San Fernando City, kasta met a kinumpirmaran ti drug test a naisayangkat kadagiti suspek nga agar-aramat dagitoy iti droga.

Innayon ni Taclas a nangato ti kalidadna ti droga a nasamsamda kadagiti suspek.

Kinuna pay ni Taclas a mamati a napilayanda ti grupo dagiti aglaklako iti droga iti Siudad ti Vigan iti pannakatiliw dagiti suspek.

Sabali met a buy bust operation ti insayangkat dagiti nagtitipon nga elemento ti SPAIDSOTG, PIB, PDEA ISSET, ken San Ildefonso Police Station nga indauluan niĀ  COP, Chief Inspector Jose Languisan Abaya II iti Barangay Sagsagat, San Ildefonso idi agarup alas 9:40 ti bigat ti nadakamat nga aldaw a nakatiliwan ti maysa a Jason Ramos y Tabis, 35, naasawaan.

Tiniliw dagiti polis ni Ramos kalpasan a naiyawat daytoy ti dua a babassit a heat-sealed plastic sachet a nagkarga iti masuspetsa a shabu ken ni PO3 Charito Palado a nagpammarang a poseur-buyer.

Narekobre dagiti polis iti ikut ni Ramos ti dua a sag-P500.00 a marked money nga addaan serial number a CD 183108 and PT 887358, maysa a nangisit a selpon nga addaan iti 6 a sim card, 6 a crumpled aluminum foil nga addaan iti mapapati a shabu residue, ken 3 a sag-P100.00.

Sinaksian da Brgy. Kagawad Fernando Jonathan Tabin, Brgy. Kagawad Leonila Retreta, Mars Madaguio ti ABS-CBN ken Glen Tulas ti DOJ ti buy bust operation.

Nairaman ni Ramos iti drug list iti probinsia, kinuna ti polis.

Kabayatanna, dua a masuspetsa a drug pusher ti natnag iti ima dagiti polis iti sabali pay a buy bust operation nga insayangkatda iti maysa a galiera sadiay Barangay Lungog, Narvacan.

Inaresto dagiti nagtipon a bunggoy ti PDEA RO1 nga indauluan ni Intelligence Officer 3 Darnel L. Bacate ken ti Narvacan police station da Jeffe Caabay y Antolin, 20, baro ken residente iti Barangay Cagayungan, Narvacan ken ni Naifa Fernandez, 27, awanan asaawa ken residente iti Barangay Katuparan, Taguig City.

Nakumpiska iti ikut dagiti dua ti dua a heat-sealed a sachet a nagkarga iti mapapati a shabu nga agdagsen iti 2 grams a mapattapatta nga agbalor iti P30,000.00, ken kuarta a naaramat a buy bust money nga addaan serial numbers NK 856749 ken CP 874896 ken nainisialan iti AGC.

Dagus nga inaresto dagiti polis dagiti suspek kalpasan nga inyawat ni PO3 Arnold Calzado a nagpammarang a poseur-buyer ti markado a kuarta.

Iti pannakaisurat daytoy, madama ti pannakaisagana dagiti maikanatad a kaso maikontra kadagiti natiliw iti buy bust operations.#