Day care pupil, nasapgid ti lugan, DOA iti ospital

SUYO, Ilocos Sur – Saanen a naidanon a sibibiag ti maysa a day care pupil iti ospital a nakaitarayanna gapu iti panangsapgid kenkuana ti maysa a lugan iti mismo a sanguanan ti balayda sadiay Barangay Urzadan ditoy nga ili idi bigat ti Marso 9.

Iti report manipud ti polis ditoy, mapapati a kellaat a nagballasiw iti kalsada iti sanguanan ti balayda ni Icis Adrian Villaruel y Macgalo, 5, day care pupil, ket saan a nasigudan ni Philip Jason Cepian y Bacdangan, 28, naasawaan, ken residente iti Barangay Poblacion, Suyo, a nagmaneho iti Isuzu Elf a puon ti nakasapgidanna iti ubing.

Nagsagrap ni Villaruel kadagiti sugat iti nadumaduma a paset ti bagina ket naitaray iti Tagudin General Hospital and Capilliarasis Center, Tagudin, Ilocos Sur ngem indeklara ti doktor a nangtaming kenkuana a dead on arrival.

Boluntario a simmuko ni Cepian iti police station ti Suyo.#