Day care pupils, pinakan dagiti police trainees

BANTAY, Ilocos Sur – Nangipaay dagiti police trainees iti panagpakan kadagiti day care pupils iti Zone 1 ditoy nga ili kas panagyamanda iti naballigi a panagsanayda kas baro a polis.

Nagpatingga itay Enero 8 ti lima-bulan a Field Training Program dagiti police trainees a naidestino iti Bantay Police Station ket agsublidan iti training camp iti Police Regional Office, San Fernando, La Union.

Kinuna ni Edmund Sabio, lider ti grupo, nga initiatiboda daytoy a feeding program tapno maikkat ti panagbuteng dagiti ubbing kadagiti polis.

Napakan dagiti day care pupils iti sopas ken fruit juice ken adda karamanna a tinapay.
Kinuna ni Sabio a mangibatidanto pay iti kuarta para iti makalawas a feeding program kadagiti nadakamat nga ubbing.#