Footer

Dayag ti Bantay, nakoronaan a Saniata ti Ilocos Sur 2010

VIGAN CITY – Nabalangatan ni Hazelyn Santos, mutia ti ili a Bantay kas Saniata ti Ilocos Sur 2010 bayat ti naangay a salip ti kinapintas ken sirib idi rabii ti Pebrero 1 iti sanguanan ti provincial capitol ditoy.

Iti pannakakoronana a Miss Saniata ti Ilocos Sur, inyawid ni Santos ti P50,000 a premio ken maaddaan iti gundaway a mangirepresentar iti Ilocos Sur iti sumaruno a Bb. Pilipinas Pageant. Napili pay isuna a Best in Gown.

Ni met Sherlyn Gonzales ti ili a Magsingal ti nakaiyawatan ti korona a Saniata ti Ilocos Sur Tourism ket immawat iti P40,000 a premio. Isu pay ti nakaiyawatan ti Ilocano’s Choice Award.

Ni met Marie Lorraine de Guzman, kandidata manipud iti ili a Caoayan ti nakaipaayan ti titulo a Saniata ti Ilocos Sur Tourism nga addaan iti premio a P30,000.

Napili met a kas first runner up ni Julie Ann Santos ti Tagudin ken Kristine Peral Ladera ti Gregorio del Pilar kas 2nd runner-up.

Dagiti naipaayan iti special awards:

Best in Casual Wear ken Miss Photogenic ni Paula Rich Bartolome (Sinait); Miss Talent ni Kristine Peral Ladera (Gregorio del Pilar); Best in Swimsuit ni Kimberly Brandon (Sta. Maria); ken Media’s Choice ni Kashmir Marjorie Hernaez (Sta. Lucia).

Napili met a Best Designer ni Raffy Sy para iti diniseniona a gown nga inusar ti maysa kadagiti dayag.

Ti Saniata ti Ilocos Sur ti maysa kadagiti tampok iti 3rd Kannawidan Ylocos Festival iti Ilocos Sur.#