Footer

Dayag ti Pangasinan, Saniata ti Ylocos 2012

VIGAN CITY – Nakoronaan ni Hannah Ruth Sison manipud iti Carmen, Pangasinan a Saniata ti Ylocos 2012 bayat ti salip ti kinapintas a naangay iti Plaza Salcedo idi Pebrero 3.

Inatiw ni Sison, agtawen iti duapulo ket tallo, dagiti 29 a nakabalubalna ket inyawidna ti premio a P100,000.00 ken plake. Napili pay a Best in Gown kalpasan nga irampana ti abel a gown a dinesinio ni Raymund Arce a napili met kas Best Designer.

Napili met kas Saniata ti Ylocos World nga addaan iti premio a P75,000.00 ni Jannie Loudette Alipo-on manipud iti San Fernando City, La Union. Iti talent portion idi Enero 30, napili pay ni Alipo-on kas Star of the Night.

Naisaad met ti korona ken ni Mary Candice Ramos ti Sto. Domingo, Ilocos Sur kas Saniata ti Ylocos Environment idinto a Saniata ti Ylocos Model of the World-Philippines ni Reina Mae Maerina ti Villasis, Pangasinan. Agpada dagitoy nga immawat iti P50,000.00.

Nagpuesto kas first runner-up ni Jennica Ollero ti Tubao, La Union malaksid a napili pay daytoy kas Miss Photogenic ken Ilocano’s Choice. Ni met Kate Ann Goza ti Bautista, Pangasinan ti nagbalin a second runner-up a napili pay kas Best in Swimsuit.

Naipaay met ti sabali pay a minor awards kada May Ann Naguit ti Bugallon, Pangasinan ken Miss Congeniality ni Rochelle Cadiente ti Magsingal, Ilocos Sur.

Malaksid a naikadakkel dagiti premio, napagbalin pay a Saniata ti Ylocos ti titulo ti salip manipud iti Saniata ti Ilocos Sur iti napalpalabas a Kannawidan Festival tapno mailukat daytoy kadagiti babbalasang manipud iti uppat a probinsia iti Rehion Uno ken iti probinsia ti Abra.#