Banner News: Dayaw ti Ilocos Sur: Ensign Dionne Mae Umalla, PMA Mabalasik Class 2019 Valedictorian | Tawid News Magazine - Weekly Ilocos News 📰

Dayaw ti Ilocos Sur: Ensign Dionne Mae Umalla, PMA Mabalasik Class 2019 Valedictorian

BAGUIO CITY – “Mabalin a planuen ti tao ti amin a banag, ngem ti pagayatan ti Apo ti matungpal.”

Dayta a linaon ti Proverbio 19:21 ti Nasantuan a Biblia ti nangirugian ken nagbatayan ti valedictory address ni Cadet First Class Dionne Mae Apolog Umalla, topnotcher ti Philippine Military Academy Mabalasik Class 2019. Impaayna ti mensahena kabayatan ti PMA graduation rites sadiay Fort del Pilar, Baguio City idi bigat ti Mayo 26, 2019.

Iti mensahe ni Dionne Mae, linagipna ti arapaapna nga agbalin a doktora, ngem gapu ta ammona a marigatan ti inana a mangisakad ti panagadalna iti Medisina ket inrugina ti nagadal ti edukasion. Ngem inturong ni Apo Dios iti pagayatan ken pagbalinanna nga agserbi iti pagilian ken kadagiti tattao.

Linagip ni Dionne Mae dagiti adu a rigat a naglasatanna. Pinagyamananna ti Dios ken ti awan-kaaspingna nga ayat, suporta ken inspirasion ti inana. Nagyaman pay iti ama, kakabsat, kaklasena ken dagiti amin a nagbalin a paset ti panagballigina.

Indauluan ni Dionne Mae, 21 ken tubo ti Alilem, Ilocos Sur, dagiti 261 a nagturpos a kameng ti PMA Mabalasik (Mandirigma ng Bayan, Iaalay ang Sarili, Lakas at Tapang Para sa Kapayapaan) Class of 2019. Buklen ti klase dagiti 73 a babbai ken 188 a lallaki a nagturpos. Lima a babbai dagiti nakastrek iti Top 10 graduates.

Ti PMA graduation rites ket inatenderan da Presidente Rodrigo Duterte, Vice President Leni Robredo, Defense Secretary Delfin Lorenzana, Armed Forces of the Philippines Chief of Staff General Benjamin Madrigal, PMA Superintendent Lt. Gen. Ronnie Evangelista, dagiti major service commander, ken dadduma pay nga opisial ti gobierno iti Pilipinas ken dadduma a pagilian.

Naatrasado ti graduation rites gapu ta naladaw ni Presidente Duterte iti agarup dua nga oras. Nadlaw dagiti agbuybuya iti panagkakapsut ti Presidente ta ni Dionne Mae ken ti goat wenno naudi laeng a nagturpos ti inyawatanna iti diploma. Tradision iti PMA ti agiyawat ti diploma ken mangkomision kas opisial ti AFP kadagiti agturpos, ngem ni Sec. Lorenzana ti nangakem kadagita a ceremonial acts.

Iti ababa a mensahe ni Presidente Duterte, kinaritna dagiti nagturpos nga agbalin ken agtalinaedda a napakumbaba ken napudno nga agserbi iti pagilianda uray biagda ti kasukatna.

Dimmar-ay iti PMA graduation rites dagiti adu a bisita pakairamanan dagiti nagannak ken kapamila dagiti nagturpos pakairamanan ni Mrs. Dionisia Apolog Umalla, ken Reuben Umalla Sr. a nagannak iti Class Valedictorian. Nagabayda a nagtugaw iti mismo a likudan dagiti dignitaries wenno kangrunaan a bisita.

Iti pakabuklan ti valedictory ni Dionne Mae, sinalaysayna dagiti adu a rigat ken tuok a linak-am ti inada a nagmaymaysa a nangisakad ti panagbiag ken panagdakkelda nga uppat nga agkakabsat. Impaganetgetna a dayta ti nagubbogan ti kired ken tibkerna a nagan-anus ken nagpursigido iti panagadalna iti akademia.

Adda dagiti paset ti mensahe ni Dionne Mae a nakasangit ken tinengtengngelna ti panagayus dagiti luana aglalo idi ipeksana ti panagyamanna iti inana, ama ken dagiti kakabsatna a nagakem a manong ken tatangna a saanna a napadasan kabayatan ti panagdakkelna.

“Ma, daytoyen, naimbag la ketdin, ta napilitka, agyamanak ta nagtalekak kaniam, I love you, agyamanak,” insaibbekna.

“Thank you, Pa, for attending my graduation,” kinunana iti panagyamanna iti amana iti laksid ti panangpanawna kadakuada a mangipaneknek nga awan ti immulana a sakit ti nakem iti kaungganna.

“To Almighty, God, thank you, and to you be all the glory, we do not know what the future holds but with you, we know we are secured,” kinunana iti panagyamanna iti Dios iti paggibusan ti mensahena a nangipaganetgetanna a no man pay saan a nagbalin a doktora wenno maestra ngem nagun-odna ti nangiturongan kenkuana ti Dios a pagbalinanna nga agserbi iti pagilian ken kadagiti tattao.

“Handa na po kami, patuloy kaming mangarap sa bayang Pilipino, maraming salamat at mabuhay ang Mabalasik Class 2019,” inggibusna ti mensahena.

Ummuna nga inawat ni Dionne Mae ti diploma, Presidential Saber ken certificate of ownership iti lote ken daga manipud ken ni Presidente Duterte. Immawat pay kadagiti dadduma a pammadayaw pakaibilangan ti Philippine Navy Saber, Distinguished Cadet Award, Academic Group Award, Spanish Armed Forces Award, Joint United States Military Assistance Group Award, Association of Generals and Flag Officers Award, ken Australian Defense Best Overall Performance Award ken dadduma pay a pammadayaw.

Iti PMA rites, nagpaiduma ti ragsak ti narikna ni Mrs. Umalla iti balligi a nagun-od ti buridek ken kakaisuna nga anakna a babai – ti panagbalinna a topnotcher iti PMA a kangrunaan a pagadalan dagiti agbalin a commissioned officers ti AFP. No man pay retirado a mangisursuro iti Alilem National High School, adu a rigat ken sakripisio ti naglasatan ti pamiliada nangruna iti panangisakadna iti panagadal dagiti uppat nga annakna manipud idi panawan ida ti asawana, agdua dekadan ti napalabas. Napalaus ti panagyamanna iti Dios ta babaen iti grasiana ket nagbunga dagiti adu a tuok ken rigatna, ket napagadal ken nagballigina dagiti amin nga annakna: maysan a police major ni Benjie, ti inauna, head nurse met ni Reuben Jr. a maikadua, ken chemical engineer ni Philmar a maikatlo, buridek met ni Dionne Mae.

Adda pay laeng iti Grae 2 ni Dionne Mae idi pumanaw ti soldado nga amada a pinilina ti naaddaan iti sabali a pamilia. Nagadal sadiay Saint Louis College, San Fernando City. Nagbalin nga scholar ti First Asia Institute of Technology and Humanities idiay Tanauan, Batangas. Adda isuna iti maikadua a tawenna iti kolehio idi inkeddengna ti agadal sadiay PMA kalpasan ti pannakaipasana ti entrance examination gapu ta marigatan ti inada a mangisakad ti panagadalna.

Pinilina ti sumrek iti Philippine Navy, ken na-commissioned nga Ensign.

Isuna ti maikalima a babai a nagturpos a Class Valedictorian iti PMA. Dagiti dadduma ket daydi pimmusayen a Navy Lieutenant Senior Grade Arlene dela Cruz idi 1999; Major Tara Velasco Cayton idi 2003; Navy Commander Andrelee Mojica idi 2007; ken Ensign Rovi Mairel Valino Martinez idi 2017.