Dayo iti Cabugao, Ilocos Sur, gannuat ni Mayor Edgardo Cobangbang, Jr. mangbatir iti ekonomia ti ili

Salaysay ni Salvador A. Espejo ken Mario Purugganan

Maysa kadagiti prioridad a programa ni Mayor Edgardo S. Cobangbang, Jr.  ti pannakaital-o ti panagbiag dagiti agtaltalon iti ilina.

Kas kinunana iti maysa nga interbiona kadagiti kameng ti media, rumbeng nga agsubli kadagiti mannalon dagiti pagimbagan a mapaspasangpet ti Cabugao manipud iti bingayna iti excise tax ti tabako wenno R.A. 7171.

Kas paset ti programana a mangpadur-as iti agrikultura iti Cabugao, nasurok a 4,000 a mannalon ti winarasan ti gobierno munisipal iti libre a hybrid seeds. Nupay awan ti nadanonanna a pondo, inkarigatan ti mayor a pinaadda daytoy a benepisio para kadagiti mannalon tapno matulonganda iti panagmulada iti pagay.

Naki-tie-up pay ti mayor kadagiti pagtagilakuan kadagiti suplay ti agrikultura para iti pannakapautang dagiti mannalon kadagiti farm inputs kas iti ganagan babaen ti plant now pay later program.

Iti daytoy nga iskema, mangted ti munisipio iti pondo kadagiti farm supplies store nga ipautangda a kas farm inputs kadagiti mannalon iti nababa laeng a porsiento. Ti farm supply store ti agsingir kadagiti mannalon ket isunto met ti agbayad iti munisipio.

Sabali pay a brainchild ni Mayor Cobangbang ti pannakaipasdek ti dayo iti Cabugao a namnamaenna a makatulong iti pannakabatir ti ekonomia ti ilina.

Ita, iti baet a nasurok pay laeng a lima a bulan ti pannakaipasdek ti dayo, umad-adun dagiti negosiante a mapan iti Cabugao tunggal Sabado tapno mapanda aglako ken gumatang iti nuang ken baka. Adda pay kalding a lako iti dayo.

Nagturongkami iti Cabugao idi agsapa ti Oktubre 1  tapno imatanganmi ti madamdamagmi a dayo ditoy nga ili uray no naiwaragawag a Signal No. 3 ti Ilocos Sur gapu iti Bagyo Quiel.

Nupay dakes ti panawen, nakitami ti kinaburnok dagiti tattao a napan nakidayo iti lauden ti rangtay ti Cabugao tapno mapanda sumirpat iti gatangen wenno ilakoda nga animal. Dagiti dadduma a nakadamag metten iti kaimas ti pinapaitan wenno sinanglaw ken tinuno a karne ti baka wenno nuang, ditoyen ti umayda pammigatan.

Nadakamat pay ni Mayor Cobangbang a ditoy dayo ti nammigatan dagiti taga-DWRS Commando-Brigada idi naisayangkat iti Cabugao ti Ilocos Sur Hotline. Kasta met a magustuan dagiti turista ti mapan agsinanglaw iti dayo ta ipalagipna ti napalabas a nakaugalianda ti yuuragada iti maparti a karne a lutuenda a pinapaitan.

Naammuanmi ken ni Mayor Cobangbang iti pannakitungtongmi kenkuana bayat ti panammigatmi iti kapudpudotanna a sinanglaw ken naituno a karne a doble ti kaburnok dagiti dayo no saan koma a dakes ti panawen. Kinunana a no napintas ti panawen, agingga iti aldaw ti kapaut ti dayo.

Innayon ti mayor a makadanonen dagiti negosiante manipud iti Cagayan, Isabela ken Ilocos Norte nga agidayo kadagiti animal iti Cabugao. Uray payen dagiti aglaklako iti animal iti Sinait tunggal Biernes ket  umayda payen dumayo ditoy Cabugao, segun iti mayor.

“Bassit pay laeng ti mapastrek ti munisipio iti transparensia ngem ti importante ket mangrugin nga aglatak ti dayo ditoy Cabugao,” kinuna ni Mayor Cobangbang.

Kinuna ti mayor a malaksid nga adda mainayon a pamastrekan ti ili, makaipaay pay iti panggedan kadagiti kailianna, nangruna dagiti aglutluto iti karinderia.

Impalgak ti mayor a panggepna pay ti mangipasdek iti bagsakan iti abay met laeng ti dayo tapno ditoy ti pakaisayangkatan ti panaggiginnatang kadagiti produkto ti talon sakbay a maiserrekda iti tiendaan ti ili.

Kinapudnona, napaliiwmi nga iti amiananen ti dayo ti pakatimbanganen dagiti baboy sakbay a mapartida a mailako iti tiendaan iti kabigatanna.

Wen, nasurok pay laeng a makatawen a nagtugaw ni Mayor Cobangbang ngem addan dagiti programa nga inrusatna para iti pannakaital-o iti biag dagiti mannalon, kasta met dagiti gannuatna para iti idadakkel ti pamastrekan ti ilina nga agsublinto met laeng kadagiti kailianna babaen ti nasaysayaat ken napimpintas a serbisio.#