Dayo nasukalan illegal agkalkalap iti kabaybayan ti Cabugao

CABUGAO, Ilocos Sur – Saan a mangngalap a taga-Barangay Pug-os ditoy nga ili dagiti natiliw nga agisaysayangkat iti illegal a panagkalap no di naggapuda iti kaparanget a barangay.

Segun iti report manipud iti polis ditoy, taga-Teppeng, Sinait dagiti walo a mangngalap a nasalamaan nga agisaysayangkat iti illegal a panagkalap iti kabaybayan a sakup ti Barangay Pug-os ditoy nga ili idi aldaw ti Marso 17.

Nainaganan dagiti illegal nga agkalkalap a da Reynante Carria y Rafanan, 38; Ronald Ines y Ibatuan, 42, baro; Edison Ines y Yadao, 49, naasawaan; Dionicio Galolac y Lacuesta, 46; Ryan Ines y Ibarra, 28, naasawaan; Reno Rafanan y Yadao, 46, naasawaan; Luis Marcos y Botascion, 26, baro; Ian Mark Dangcil y Peralta, 25, naasawaan, agpapada amin a residente iti Brgy. Teppeng, SInait, Ilocos Sur.

Iti panagpatroliada, nasukalan dagiti kameng ti MARPSTA nga indauluan ni SPO3 Orlino G. Palalay, Jr. ken dagiti polia-Cabugao dagiti suspek a nakalugan iti tallo a bangka nga agkalkalap babaen iti compressor iti kabaybayan a sakup ti Barangay Pug-os.

Maiparit ti compressor nga aramaten iti panagkalap ditoy probinsia kas intuding ti Provincial Ordinance No. 1, Article IV, Section 1 & 2, series of 2009.

Malaksid iti air compressor ken tangke nga addaan hose a naikabit iti makina, kinumpiska dagiti otoridad ti walo a kilos nga assorted a lames a nakalapan dagiti suspek.

Naipan dagiti mangngalap ken dagiti nakumpiska a ramit-pagkalap iti MARPSTA para iti dokumentasion ken disposision sada napagmulta iti Provincial Treasurer’s Office, Vigan City.#