Daytoy a Dagaang

Sarita ni Jobert M. Pacnis
(Maudi a paset)

Apaghusto nga alas dies idi malpasak. Rimmuarak a dagus iti pasdek.

“’Panam?” sinaludsod ti maysa kadagiti traysikel drayber idi makababaak iti agdan iti sango ti pasdek a naisaad iti turod. Ditoy ti parkingan dagiti traysikel ta dida mabalin ti umuli nga ag-pick-up iti sango ti pasdek tapno di nariribuk dagiti tao nga agsangpet-pumanaw.

“Terminal ti van, ‘nong…” kinunak. Centralized itan ti terminal dagiti pampasahero a van a sumrek-rummuar iti siudad.

“Capacity lattan ta intan,” inngirsi ti drayber.

Napaisem laeng ti unegko. Awan latta gayam ti namalbaliwan dagiti drayber. Sipud panagbasak ditoy siudad, ammokon dayta a modus-da. Capacity, kayatna a sawen, bayadam amin a tugaw. Times five iti normal a plete!

“Agurayak lattan iti kaduak, ‘nong,” kinunak lattan.

“Manglikustay’ ngamin dita paset ti Alimanao,” paset ti ili ti Peñablanca ti kayatna a sawen. “Tartarimaanenda ti rangtay dita batog ti cockpit arena. Agtraysikelkanto met laeng no agdiretsoka idiay sentro…”

Nagkuenta ti panunotko. Ala, saanen a bale nga agtraysikelakto met laeng. Makainutak latta! “Urayen, ‘nong,” kinunak.

Nakitak ti panagngilangilna. Ngem uray man! Nagrigat ngata ti agsapul iti kuarta. Agurayak lattan iti kaduak yantangay nasapa pay met.

Napayamanak ta apagbiit a nakaurayak iti kaduak. Kapilitan a dimsaagak iti kanto a sumrek iti Don Domingo ta adayo unayen no agsaltekak pay iti sentro a biahe ti lugan. Nangamparaak iti sabali a traysikel a mangitulod kaniak iti Pengue a yan ti terminal.

“Saan ka, boss?” inamad ti drayber nga apaglabes la ngata a kuarentana.

Imbagak.

“Double pay, boss…”

Napasanamtekak. Ania ketdin, aya, dagitoy a traysikelan! Nagasideg a papanan ket.

“Saan lattan, ‘nong,” kinunak.

Pinagrebolusionna ti luganna ket nabungonak iti asuk. “Kuripot!” sana pay la indayamudom.

Dika pay la ma-flat-an, inkibuar la ketdi ti unegko.

Nangamparaak manen iti sabali. Lakay ti drayber. Imbagak ti papanak. Pinaglugannak a dagus. Napayamanak.

Addakamin iti Brickstone idi ma-traffic-kami. Adda gayam naglinnidlid a dua a kotse iti masanguananmi. Madama ti inningar dagiti impatok lattan nga akinkukua kadagiti kotse. Arigna agbinnuntaldan! Naalak ti nagdanag ta amangan no maysa kadakuada ti adda igamna ket paputokanna ti kalabanna. Kas kadagiti mabuybuyak iti telebision a mapaspasamak iti Kamaynilaan. Naimbag ta isu met a dimteng dagiti pulis.

“Dida la ketdi nagbinnigay iti dalan,” kinuna ti drayberko.

“La ketdi, ‘long,” kinunak. “Makita met iti puesto dagiti luganda.”

Nagmenoren ti nagluganak ket ipaigidnan idi makagtengkami iti sango ti terminal idi kellaat a naganit-it ti motor iti makanawanmi. Ngannganinakami nasagud!

Nagkusilap ti nakamotor! “Mag-ingat ka naman sa pagmamaneho, tanda!” kinunana. Sa simiag a dagus.

Ne, ta isu pay ti adda ganasna nga agunget ket wrong way met ti dalanna! Napangilangilkami laengen iti lakay.

“Aduda a talaga dagita kakasta, barok,” kinunana kaniak.

Inyawatko ti nabukel a beintek. Suplianak koma pay, ta sangapulo pisos ti plete, ngem inatipak. Kaykayatko a nayonan ti pletek no nasingpet ti drayber… no saanna nga ipasungad kaniak ti kina-Ingliserona.

Nangaldawak iti karinderia iti suli ti terminal. Inimasko ti pinapaitan nga inorderko. Nabang-aran pay ti riknak kalpasanna.

Pasado ala una idi makagtengak iti balay.

“Naalam met laeng ti rinantam?” sinaludsod ni baket.

“Wen, baket,” insungbatko.

“Nasayaat ngarud. Agsukatkan ta, ne, nasnaslepkan sa?”

“Nagdagaang idiay siu-dad, baket. Permi!”

“Kastan sa met nga inaldawen didiay? Ala, ta igaw-anka pay ngarud. Immunakamin kadagiti annakmo a nangan itay. Naglutoak iti paboritom a sinigang a dalag. Immay nangipan itay da tatang iti nakarsanda.”

Napatubbog pay ti dilak. Ibagak koma a nangaldawakon ngem baka sabali manen ti pagsaadanna. Ken ammok lattan a no kasta a sidudungngo a yayabna ti pannangan, nagnadnaden ti riknana. Awanen ti ‘drama’ a napasamak iti kallabes. Ket sanayakon kadayta nga ugali ni baket. Isu ngarud a diak sabsabten iti pudot ti pudot ti riknana no kasta a marugianna.
Narigat no bumtak. Mapuorankami la ketdi nga agpadpada. Ken kaasi dagiti ubbing.#