Daytoy Election Gun Ban

Komentario ni Jobert M. Pacnis

(Tuloyna)

 

 

Dakkel a kinapudno a dumakdakkel a negosio daytoy panagpartuat iti paltog. Sadiay siudad ti Danao (am-ammo a kas Gun Capital of the Philippines), sibibiag daytoy a kinapudno. Inayon payen dita ti panagadu ti armas a mapmapan kadagiti di kualipikado nga indibidual dagiti maipuspuslit nga aggapu kadagiti nadumaduma a pagilian. Ken dagiti matiltiliw nga armas a limed a mailaklako. Asino ti makalipat kadagiti nakumpiskar iti ikub dagiti Ampatuan? Naggapuan koma dagitoy a nayarmas kadagiti taoda?

Adda proyekto dagiti otoridad nga Oplan Katok. Daytoy ‘tay mangkumpiskar kadagiti saan a nai-renew ti lisensiana nga armas. Ngem iti panagadal, 97.7 a porsiento kadagiti kriminalidad nga adda pakainaiganna iti paltog ti nagramut kadagiti kolorum nga armas. Saan a kadagiti lisensiado, wenno nagpason ti lisensiana. Dayta ti report dagiti otoridad idi 2009.

Nupay kasta nga ibagbaga dagiti otoridad a bimmassit dagiti krimen  nga adda pakainaiganna iti armas, kuna met dagiti dadduma nga ahensia a saan a naka-update ken reliable dagitoy a report. Kitaen koma ngarud dagiti maseknan ti naiget a pannakaipatungpal ti linteg.

Iti panagadal, rumrummuar a di daytoy panagimet ti armas ti dakkel a parikut ti pagilian. Adda dita ti kumarkaro a kinarigat, insurhensia, maiparit nga agas, kidnapping, trafficking, ekstorsion, rebellion, sugal (hueteng) ken panagtakaw. Ditoy koma nga ad-adda a yintek dagiti otoridad ti atensionda tapno aglupos ti pagilian. Ta mapaspasamak dagitoy nakaam-ames a krimen nupay awan ti armas a kas kadagiti paltog.

Ngem adtoyen ti total gun ban.

Saan ngarud a nakakasdaaw no makakitatayo kadagiti agtubo a kasla uong a tsekpoint kadagiti lugartayo. Ngem kitaentayo koma no legal dagitoy. Ta datayo nga ordinario a tao, addaan met iti karbengan no kasta a masita iti tsekpoint. Ania dagitoy?

Kadagiti tsekpoint, masapul a nalawag a makita ti signages a pakabasaan ti nagan ken contact number ti in-charge iti tsekpoint, ti nagan ti tserman ti COMELEC nga akinsakup iti lugar (no COMELEC tsekpoint daytoy), nakauniporme dagiti otoridad ken masapul a ‘tay opisial a luganda ti usarenda, plain view laeng ti mapasamak—dida mabalin ti mangiserrek iti imada nga agsukimat iti uneg wenno ania man a paset ti lugan, agbayag laeng iti 10 segundo ti pannakatsekpoint, ken naanus wenno di nga agbugbugkaw dagiti para tsekpoint a di nababbaba ngem iti 7 a katao.

Kadatayo met a motorist, saantay’ nga agbalin a managpudpudot. Maawatantayo koma dagiti otoridad. Ipatpatungpalda laeng dagiti pagrebbenganda.

Kadagiti met otoridad, kas nasaon, saan koma a kadaytoy a programa a yintek/ipokusda ti atensionda. Ad-adu pay dagiti parikut a masapul a saguenda, nga ikkanda iti importansia ken panagadal tapno makissayan wenno maparmek dagitoy. Ken di la koma nga iti kakastoy a gundaway ti panangyimplementarda iti total gun ban. All year round koma.

Ala, amintayo, adda pasetna iti pannakatagiben ti kappia. Tumulongtayo koma kadagiti otoridad.#