Latest News: DBP, LBP mangipaay nababa’t interesna a pautang kadagiti mannalon — Tawid News Magazine - Weekly Ilocos News 📰

DBP, LBP mangipaay nababa’t interesna a pautang kadagiti mannalon

VIGAN CITY — Impakaammo ni Senador Cynthia Villar a mangipapaay ti Land Bank of the Philippines (LBP) ken Development Bank of the Philippines (DBP) ti nababa ti interesna a pautang para iti paggatang ti kasapulan dagiti mannalon ken manggalap iti intero a pagilian.

Kabayatan ti panagserbina a naisangsangayan a sangaili iti Aldaw ti Agrikultura iti 2020 Vigan Longganisa Festival idi Domingo (Enero 19) idiay Vigan Convention Center, inallukoy ni Senador Villar dagiti mannalon a mapanda laengen umutang iti LBP wenno DBP para iti pagkasapulanda nga agtalon imbes nga umutangda ti 5-6 nga addaan ti nangato nga interes.

Babaen iti Rice Competitiveness Enhancement Funds (RCEF) ti gobierno, kinuna a maipapaay P1 bilion pondo iti LBP ken DBP iti tunggal tawen tapno maipautang kadagiti mannalon, ken addaan iti interes a 2% kada tawen.

“Saan kayo a mapan umutang ti 5-6 ngamin nangina ti interesna, idiay kayo laengen DBP wenno LBP nga umutang ta nalaklaka ti interesna,” kinuna ni Villar.

Inlawlawag ni Villar nga apaman a napirmaan ni Presidente Rodrigo R. Duterte ti Rice Tarrification Law, nabuangay ti RCEF a no sadino nga amin dagiti masingiran a buis wenno taripa manipud iti panagangkat ti bagas manipud sabali a pagilian ket maipaay kadagiti mannalon.

Agdagup ti P10 bilion a pondo ti ilatang ti gobierno iti kada tawen para iti RCEF. Uray no saan a makasingir ti gobierno ti taripa manipud iti panagangkat ti bagas, kinuna ni Villar a mailatang latta ti P10 bilion pondo ti RCEF iti kada tawen babaen iti General Appropriations Act. Maipaay daytoy a pondo kadagiti mannalon a pangpadur-as ti kalidad ti apit iti panagtalon.

Babaen iti nasao a linteg, kinunana a napili ti 947 nga ili manipud iti 57 a probinsia iti intero a pagilian a maipaayan iti nasao a pondo.

Maipaayan dagiti mannalon ken manggalap ti kada ili ti P5 milion a gatad ti alikamen a pagtalon kas ti transplanter, harvester, tiller, dryer, milling machine ken iket a pagkalap iti kada tawen.

Malaksid iti P5 milion a gatad ti alikamen a pagtalon, maipaayan pay dagiti mannalon ti 20 kilos nga inbred a bin-i wenno bukel ti pagay iti kada ektaria tapno pumintas ken ngumato ti apitda.