Debosion iti Nangisit a Nazareno: naidumduma a pammati (Maudi iti dua a paset)

Naidumduma a pammati

Naidumduma ken saan a marukod ken magatadan daytoy a pammati ken debosion dagiti Pilipino iti Black Nazarene.

Ngamin, naimuntar iti katatao ti pammati. Ditoy a timmubo, nagrukbos ken rimmangpaya.

Ti estatua ti Nangisit a Nazareno iti Quiapo ket maysa laeng a representasion iti panagrukbab ken panagtalek iti Mannakabalin. Ti representasion ket simbolo ti nasged a panagayat ken panagrukbab.   Kas ti representasion ti panangipateg a maipapaay kadagiti ladawan dagiti ipatpateg, gagayyem, kasinged, am-ammo ken saan.

Ngem maminribu nga amang a naun-uneg, nair-irut ken nabilbileg daytoy a representasion ti panagdaydayaw, panagtamed, debosion ken panamati ken ni Jesus!

Ti representasion ket maysa laeng a behikulo tapno ad-adda pay a rumangrang ken rumukbos ti pammati. Kas maymaysa wenno sangkagimongan nga agdaydayaw ken agrukbab ken Jesus, makuna a naisangsangayan unay a panagayat a rimmusing manipud iti kaunggan tunggal maysa, ket daytoy ti nagbatayan ti pammatina.

Timmao ti Anak ti Dios, immay ditoy lubong tapno ibayogna ti pannakaisalakan dagiti tattao ken patay. Nagsagaba iti nakana unay iti yaayna ditoy lubong babaen ti panagbaklayna iti krus, pannakailansa ken ipapatayna iti krus.  Iti baet ti nakana  a pannakasaplitna, ti pannakakoronana iti siit, pannakaidugmam ken pannakaparintumengna iti panagawitna iti  nadagsen a krus, timmangad pay laeng iti Dios Ama sana dinawat ti pammakawanna ta ti tao dina ammo ti inaramidna.

Makimaymaysa dagiti amin a deboto kadayta a panagtuok a panagtuok ni Jesus. Marikna met dagiti deboto ti panagtuok a kas iti panagtuok idi ni Apo Jesus. Ti panagtuok iti  agdama ket ipalay dagiti nagsasamusam a parikut, ladingit ken sainnek, dagiti saksakiten iti pisikal, mental ken espiritual  a bagi. Iti baet ti panagtutuokna, ibilang ti tao a saan a nakana ti panagrigrigatna no di ket  pannakimaymaysa ken Jesus idi immay ditoy lubong. Iti pannakaidugmam ni Jesus, maidugmam met ti tao – iti basol, iti saksakiten, iti ladingit ken iti sainnek. Kas ken ni Jesus, sidadaan ti tao a mangawat iti amin, tumatangad iti Ngato ken agnanayon a sipapakumba.

Representation pay ti nangisit a Nazareno dagiti nangisit nga aldaw ni Jesus. Addaan met ti tao iti nangisit nga aldaw a gapu ti panagsagaba ken an-anayenna.

Dayta ti representasion ni Apo Jesus a taga Nazareno – ti nangisit a Nazareno.

Kasta ti kinaisangsangayan ti panagayat ni Jesus kadagiti amin a tattao. Maitutop ngarud la unay a subadan ti tao dayta a naisangsangayan a panagayat. Dayta ti mapaspasamak tunggal Enero 9. Dayta ti naun-uneg a kaipapanan daytoy nga aldaw.

“The devotion we give to this statue should be properly understood. This does not have special powers, it’s just a representation of our Lord,” kuna ni Bishop Deogracias Iniguez iti maysa nga interbio kenkuana iti maysa a radio station.

Pudno la unay nga imbalikas ti bishop. Saan nga iti imahe ti nangpaimbag kadagiti saksakiten dagiti deboto no di ket mismo a nagtaud ken Jesus.  Naited dagiti kiddawda gapu iti kaadalem ti pammatida. Kasta met kadagiti nagkiddaw iti panangsaranay ken panangiwanwan, napatganda gapu iti pammatida.  No nasged ti pammati, patgan la ketdi ni Jesus ti araraw.

Nasken a mailawlawag daytoy ta adda dagiti saan a makaawat iti naun-uneg a kaipapanan ti debosion.  Mapagbiddutanda a maisalungasing dayta a debosion iti napudno la unay a kaipapanan ti pammati. Ngem ti pudno, adda met la iti pusotayo, karirikna ken kinaasinotayo nga aganninaw ti nasged a pammati ken ni Nuestro Padre Jesus Nazareno. Adda iti aramid, tignay, panagsasao ken iti puso ti asinoman.

Kinapakumbaba ti iparangarang dagiti deboto a sakasaka a makiprusision.  Naidumduma a galad ti panagpakumbaba ti asinoman nga addaan iti naisangsangayan a pammati. Nagramut daytoy iti pannursuro a kas nailanad iti Sermon ni Apo Jesus iti Bantay, ken mabasa iti Ebanghelio ni San Mateo 5:5: “Nagasat dagiti napakumbaba, ta tagikuaendanto ti daga nga inkari ti Dios.”

Isu a no dadduma, palugodan ti simbaan dagitoy a debosion, saan laeng nga iti Nangisit a Nazareno no di pay iti dadduma nga imahe agsipud ta lalo pay a madegdegan ken rumukbos ti pammati.#