Agtultuloy ti debosion dagiti Katoliko ken ni Santo Cristo Milagroso

SAAN nga agkupas ti natibker a debosion dagiti adu a Katoliko nangruna dagiti Ilokano ken ni El Santo Cristo Milagroso wenno maaw-awagan iti Apo Lakay.

Iti tunggal Tres de Mayo a piesta ti pannakabirok ti napukaw a krus ken piesta ni Santo Cristo Milagroso, makita ti kaadu dagiti deboto ni Apo Lakay a makikaykaysa kadagiti Nasantuan a Misa iti simbaan iti Archdiocesan Shrine of Santo Cristo Milagroso sadiay Parokia ni San Nicolas de Tolentino iti ili ti Sinait, Ilocos Sur. Nagatiddog ti pila dagiti deboto a mapan umagep iti nangisit nga imahe ni Santo Cristo Milagroso iti simbaan iti Sinait.        Reprep dagiti deboto ken ni Apo Lakay a tinawen a makimkimisa iti sango ti Simbaan a Bassit iti Vigan City tunggal agsapa ti Mayo 3.

Ti kaadu dagiti deboto ken ni Santo Cristo Milagroso ket ipakitana ti agtultuloy a natibker a pammati ken debosion dagiti relihioso nga Ilokano iti nakariinganda a pammati manipud pay idi intukit dagiti Kastila a misionero ti bukel ti Kristianismo  Katolisismo iti pagilian.

Agtultuloy met ti panangbigbig dagiti adu a Katoliko nga Ilokano iti nailangitan a bileg ni Santo Cristo a kamang ken katalekda iti panawen dagiti nakaro a sakit ken nadagsen a problema iti panagbiagda kalpasan dagiti adu a tawen manipud idi 1620 a naalaw dagiti mangngalap ti kasla-tao ti kadakkel ken nangisit nga imahe ni El Santo Milagroso ken La Virgen Milagrosa de Badoc a naidaknir iti igid ti baybay sadiay Sitio Lugo, Barangay Dadalaquiten, Sinait, Ilocos Sur.

Maibasar iti pakasaritaan, idi maidaknir ti kahon a naglaon dagiti imahe ni El Santo Cristo Milagroso ken La Virgen Milagroso iti igid ti baybay ti nagbedngan ti Sinait ken Badoc nga idi a panawen ket maymaysa pay laeng a probinsia ti Ylocos ta sa laeng nabingay wenno napagbalin a dua a probinsia ti Ilocos Sur ken Ilocos Norte idi 1818 babaen ti dekreto ti Ari ti España. Napagtulagan dagiti nakaalaw a pagbingayanda dagiti imahe. Naipan ti imahe ni El Santo Cristo Milagroso iti simbaan iti Sinait. Innala met dagiti taga-Badoc ti imahe ni La Virgen Milagrosa ket impanda iti simbaanda.

In-inut ti panagadu dagiti deboto kada Santo Cristo Milagroso ken La Virgen Milagrosa kas maibasar iti bilang dagiti agdebdebosion a Katoliko a napatgan dagiti kararag ken kiddawda.

Idi 1656 – 1660 ken 1882 – 1883, nagsagaba ti Vigan iti peste ket kiniddaw dagiti umili ti pannakaipan ti imahe ni Santo Cristo Milagroso iti daytoy nga ili. Napasnek a nagnobena ken nagkarkararag dagiti deboto ket adu dagiti immimbag ken naispal iti peste. Manipud idin, nagsaknap ti debosion dagiti Ilokano ken ni El Santo Cristo Milagroso, ken ni La Virgen Milagrosa iti Badoc.

Kas pammaneknek ti panagdur-as ti debosion dagiti mamati, nagbalinen ti simbaan nga ayan ti imahe ni La Virgen Milagrosa iti Parokia ni San Juan Bautista iti Badoc kas maika-14 a minor basilica iti Pilipinas.            Mangnamnama met dagiti taga-Ilocos Sur a maipagnanto met ti panagbalin a minor basilica ti simbaan nga ayan ni Santo Cristo Milagroso iti Sinait ta immunan a naital-o ti balay ni La Virgen Milagrosa, tapno ad-adda pay a makita ken maipalagip ti kinatibker ti pammati iti Dios dagiti Katoliko nga Ilokano ken dagiti nagkauna a Hapon a nagtalinaed a napudno ti pammatida ken ni Apo Jesucristo iti sango ti panangidadanes kadakuada kadagiti nagturay iti pagilianda.

Ti debosion dagiti Ilokano a Katoliko kada El Santo Cristo Milagroso ken La Virgen Milagroso ket iyanninawna ti natibker a pammati dagiti Kristiano a Pilipino ken Hapon manipud pay idi un-unana a tiempo.   

Maibasar iti pakasaritaan, naipayanud dagiti imahe da El Santo Cristo Milagroso ken La Virgen Milagrosa ken dadduma pay a narelihiosuan a banag a naipalaon iti kahon, ken naggapuda sadiay Nagasaki, Japan. Impayanud dagiti Katoliko dagiti imahe kabayatan ti pannakaidadanes dagiti Kristiano iti dayta a panawen a panagturay ti Tokugawa Shogunate manipud idi 1597. Mapapati a dagiti imahe ken insangpet dagiti Kastila a misionero iti Japan para kadagiti Kristiano a Hapon. Impayanud dagiti Kristiano sadiay Japan dagiti imahe tapno saanda a madadael ken saanda a matakuatan a Katolikoda ket mailisida iti pannakapapatay ken panangidadanes dagiti agturay. 

Simmangpet iti Japan idi 1540 dagiti misionero a Kastila nga indauluan ni San Francisco Javier ket nadaras a nagsaknap ti Kristianismo. Idi un-unana, pinalubosan dagiti agturay ti panangaskasaba dagiti misionero ta kayatda a mabalanse dagiti monghe a budista a nakaron ti impluensiada iti biag dagiti Hapon. Nagbalaw dagiti agturay iti napartak a panagadu dagiti Kristiano iti pagilianda ket nagamakda a mapasamak ti kolonialismo iti Japan kas ti napasamak iti Pilipinas a sinakup dagiti Kastila kalpasan ti pannakaisaknap ti Kristianismo manipud idi 1521 nga idadatengda iti Pilipinas.

Idi 1565 ken 1568, immandar ni Emperador Ogimachi ti pannakaipawil iti Japan ti Katolisismo, ngem nakapsut ti epekto ti bilinna. Idi 1587, nainget nga impawil ni Toyotomi Hideyoshi ti idadateng dagiti Jesuita a misionero iti pagilianda. Naibilang ti Kristianismo a pangta iti nailian a panagkaykaysa dagiti Hapon ta nagamak dagiti agturay a napatpateg ken ad-adda a napudpudno dagiti adu nga umili ken ni Apo Jesucristo ngem isuda a mangidaulo iti pagilian.            Nangrugi idi 1597 – 1620 a panawen ti Tokugawa Shogunate, naipawilen ti Kristianismo iti publiko. Nangrugi a napapatay dagiti adu a Kristiano a saan a nangtallikud iti pammatida. Adu dagiti nagbalin a martir ti pammati a nabigbig a santo pakaibilangan ti umuna a Pilipino a santo ni San Lorenzo Ruiz. Adu a Katoliko dagiti naglemmeng ngem nagtalinaedda a nalimed ken napudno iti pammatida agingga a napalubosan manen ti Kristianismo iti pagilianda kalpasan dagiti adu a tawen.