Del Monte Phils., gumatang iti pasta iti ISTPP

Santa, Ilocos Sur – No pumasa ti partuat ti Ilocos Sur Tomato Paste Plant a pasta, tinonelada a tomato paste ti sisasagana a gatangen ti Del Monte manipud iti planta, daytoy ti kinuna dagiti pannakabagi ti nasao a kompania kalpasan a bimmisitada iti ISTPP idi Enero 19-20 tapno obserbarenda ti proseso ti panagaramid iti tomato paste ti nasao a planta.

Nakitaripnong ti grupo kada Engr. Felipe Mateo, general manager ti planta, ken ti Italiano a kasosio ti provincial government a ni Nuccio Saverio tapno ammuenda dagiti variety ti kamatis nga impamula ti ISTPP a maproseso ditoy.

Nangitedda pay iti bukbukel ti kamatis manipud ti United Genetics Seed Company a paipadasda nga imula tapno maidilig kadagiti agdama a maimulmula a bukel manipud iti Syngenta ken Taytano.

Binisita pay dagiti taga-Del Monte dagiti talon a namulaan iti kamatis sadiay San Juan ken Narvacan.

Agsublinto ti grupo iti umuna a lawas ti Pebrero tapno imatanganda a mismo ti aktual a pannakaiproseso dagiti kamatis a maaramid a tomato paste ket no pumasa kadakuada ti partuat ti planta,  sisasagana ti kompania a gumatang iti aganay 400 a tonelada ti tomato paste manipud iti ISTPP.

Impasigurado ni Engr. Mateo a kabaelan nga ipaay ti planta dayta a volume.#