Footer

Delivery boy, natay iti aksidente

GALIMUYOD, Ilocos Sur – Napaspas ti taray ti traysikel a minaneho ti biktima gapuna a nadungparna ti pinuon ti kayo sadiay Barangay Bidbiday ditoy nga ili a puon ti nakatayanna idi rabii ti Abril 25.

Daytoy ti limtuad iti inisial a panagimbestiga dagiti polis mainaig iti aksidente a nakatayan ni Erwin Marvel y Tumacdang, 26, awanan asawa, delivery boy, ken residente iti Barangay Bitong ditoy nga ili.

Awanen ti biag ni Marvel idi maidanon iti Candon City Hospital gapu iti grabe a sugatna iti ulo kalpasan a dinungpar ti luganna ti pinuon ti langka iti igid ti kalsada idi agarup 10:30 ti rabii iti nadakamat a petsa.

Segun iti maysa a saksi a nakaimatang iti aksidente, napaspas ti taray ti Honda TMX Supremo motorcycle nga addaan sidecar (kurong-kurong) a minaneho ni Marvel nga agturong iti Barangay Mabayag/Nagsingcaoan idi kellaat a nagibar ti lugan iti makannigid nga abaga ti kalsada sana dinungpar ti pinuon ti langka.

Nakaro ti dadael ti traysikel.#