BANNER NEWS. Delivery truck, hinold-ap armado lallaki nagkakalubbon iti motorsiklo

NARVACAN, Ilocos SurĀ  -Hinold-ap ti tallo nga armado a lallaki a nagkakalubbon iti motorsiklo ti maysa a delivery truck iti Barangay Casilagan, ditoy nga ili idi malem ti Abril 24.

Nagpulong iti polis ni Rosemarie Liaguso y Abella, 34, naasawaan, ken residente iti Barangay Codoog, Narvacan a hinold-ap ida dagiti tallo a lallaki a nagkakalubbon iti asul a motorsiklo bayat a nakaparking ti delivery truck a luganda iti Barangay road iti Sitio Teppang, Barangay Casilagan kabayatan ti panagideliber ti maysa a pahinantena kadagiti kargamento iti balay ti maysa a kustomerda.

Segun ken ni Liaguso, nakigtotda laengen ken ni Rodel Cantorna y Ingran, 48, naasawaan, drayber ti delivery truck, idi kellaat a nagparang dagiti tallo a di nabigbig a lallaki a nakasakay iti Honda TMX, ket dua kadagitoy ti nangpaturong iti uloda iti .38 revolver, ginammatanda ti bag ni Liaguso sada naglibas babaen met laeng iti motorsikloda.

Sumurok kumurang P32,813.00 ti naggian iti bag ni Liaguso.

Madama ti pannakaiwayat ti naun-uneg nga inbestigasion mainaig iti nasao a panagtakaw.#

Kabayatanna, uppat nga armado a lallaki ti nanggandat a manghold-ap iti maysa a dati a mayor idi agsapa ti Abril 21 iti Barangay Cappa-Cappa ditoy nga ili.

Iti report a dimmanon iti polis ditoy,Ā  bayat ti panagdaliasat tiĀ  Isuzu Elf a lugan da dati a Vice Mayor ti San Esteban Armando Abad y Vergara, 68, ken dagiti lima a katulonganna a lallaki iti provincial road a sakup ti Barangay Cappa-Cappa idi agarup 7:50 ti agsapa ti nadakamat nga aldaw, kellaat a nagparang dagiti uppat nga armado a lallaki, naakkuban ti rupada iti bonete, nagimetda iti long ken short firearms, ken nakaaruatda iti camouflage.

Nagpaputok ti maysa iti ngato idinto nga insenias dagiti kaduana ti panagsardeng ti lugan.

Ngem imbilin ni Abad ken ni Gringo Jade Pader y Trinidad, 24, a dina isardeng ti lugan no di ketdi patarayenna.

Mapapati a nakaadayon ti Isuzu Elf iti agarup 10 agingga iti 15 a metro idi nakangeg da Abad iti tallo a nagsasaruno a kanalbuong ti paltog.

Nupay kasta, saan a naan-ano dagiti naglugan iti Elf.

Mapapati a naglibas dagiti di nabigbig a suspek iti abagatan a direksion.

Nangiwayat dagiti nagresponde a polis iti manhunt operation maikontra kadagiti suspek ngem saandan a nasarakan dagitoy.

Kasta met nga awan ti nasarakan dagiti polis a kapsula wenno dadduma pay nga ebidensia iti mapapati a nakapasamakan ti panaggandat a panaghold-ap.

Segun ken ni Abad, patienna a panaghold-ap ti panggep dagiti suspek agsipud ta adda kuyogna a dakkel a kuarta a paggatangna iti naluto a bulong ti tabako iti Ansad, maysa met laeng a barangay ditoy nga ili.#