Delivery truck, motorsiklo, van, impaay ti city government iti kooperatiba dagiti mannalon, public safety office, OSCA

VIGAN CITY – Maysa a delivery truck, tallo a motorsiklo ken maysa a van ti inted ti gobierno ti siudad ditoy para iti kooperatiba dagiti mannalon, Public Safety Office, ken iti Office of the Senior Citizens itay Septiembre 8.

Mismo a ni Mayor Eva Marie S. Medina, babaen ti panangbayabay kenkuana da Vice Mayor Lourdes Baquiran, ken dagiti konsehal iti siudad, ti nangiyawat iti delivery truck ken ni Maximo Rabanal, presidente iti Pantay Onion Producers Cooperative; tallo a motorsiklo para iti Public Safety Office nga idauluan ni Quebral ken maysa a van para kadagiti senior citizens.

Impalgak ni Medina nga adda inted idi ni dati a Senador Francis Pangilinan a nasurok P1 million ngem agkurang ket dakdakkel pay ti impunno ti city government tapno makagatang iti panakkelen ken baro a delivery truck.

Segun ken ni Medina, makatulong ti lugan para iti pannakaibiahe dagiti produkto dagiti mannalon iti Pantay Daya, nangruna dagiti agmulmula iti lasona.

Nakaserra ti nasao a delivery truck tapno saan a mair-iran dagiti maibiahe a produkto dagiti mannalon ket napresko ken nanginngina met laeng ti pakailakuanda, kinuna ni Medina.

Saanen a red plate ti nasao a delivery truck ta nangaramid ti city government iti deed of donation tapno agbalinen a kukua ti nasao a grupo dagiti mannalon.

Kinuna ni Medina a mabalin dagiti sabali a grupo ti mannalon nga arkilaen ti delivery truck para iti pannakaibiahe dagiti produktoda ket addanto bayadanda para iti maintenance ti lugan.

Naammuan ken ni Medina nga adda tie-up Pantay Onion Producers Cooperative iti Jolibee Foundation a manggatang kadagiti produktoda.

Kabayatanna, tallo a baro a motorsiklo ti naiyawat iti Public Safety Office nga idauluan ni SP04 Quebral tapno adda aramaten dagiti traffic enforces iti pannakaipakat iti nasaysayud a panagtaray ti trapiko ditoy siudad.

Kinuna ni Medina a nupay addan naited a lugan iti nasao nga opisina, daandan ket kasapulanen nga adda mainayon a baro a lugan nga aramatenda dagiti traffic enforcers.

Iti daytoy met laeng nga aldaw, inyawat ni Medina ti baro a van ken ni Maria Sumabat, presidente ti gunglo dagiti senior citizens iti siudad.

Limitado ti mobility dagiti senior citizens, ket kasapulan nga adda paglugananda no adda mitingda iti Center for Senior Citizens a masarakan sadiay Barangay Ayusan, kinuna ti mayora.#