sinursuran-banner-sqSinursuranNi Jobert M. Pacnis

Demokrasia ken Kristianismo

Sinursuran ni Jobert M.Pacnis

(Maikadua a paset)

 

No mapan a tallo a riwriw dagiti maatap nga adda pannakainaigna iti daytoy a bisio ket pumudno a maisaklangda amin no dida agbalbaliw, ket ipantayo lattan nga uppat agpangato ti mangnamnama kenkuana nga anak wenno kabagian, mano daytan nga indibidual a nabualan iti puon a pagsadagan gapu ta di naikkan iti gundaway nga agbalbaliw?

Wen, ta kadagiti mabati a pamilia, saanda met ngata pakabasolan no kasta ti nastrek ti pannakaulo tapno mabiagda (no pusher-da) a padapada.

Ania ngarud ti pagbanagan dagiti mabati?

Mabalin nga agtinnag iti prostitusion ti ina tapno mabiagna laeng dagiti annak a nabati kenkuana ti asawana. Dagiti met annak, dakkel ti posibilidadna nga agrebeldeda wenno agbalinda nga itta/parikut iti gimong. No kastoy, di kad’ umad-adu latta dagiti problema a sanguen dagiti agturay?

Dakkel a batibat iti maysa nga ubing wenno agtutubo ti masaksian wenno maimatanganna a krimen aglalo no kameng ti pamiliana daytoy. Dayta a pagteng, saanto a maunas iti panunotna a mabalin a mangiduron kenkuana nga agibales, agpagunggan, ken saan a produktibo nga umili.

No kasta laeng, agraira latta ti panagpatay a mabalin a makadadael iti maysa kadagiti kinabaknangtayo a kas pagilian—ti Kristianismo. Pagaammotayo a kadagiti sursuro a sursurotentayo kas maysa a Kristiano a pagilian, maiparit la unay ti panangutang iti biag.

Iti agdama, adda dayta dakkel a giwang iti nagbaetan ti presidentetayo ken ti presidente ti kabilgan a nasion iti sangalubongan—a kaduatayo idi pay punganay kontra kadagiti nangsakup kadatayo.

Kaykayat kano ti presidente ti agparintumeng iti sanguanan ti lider ti Tsina ngem iti Amerika. Kasta met a kaykayatna ti makikinnayammet, agdawat iti tulong kadagiti pagilian ti Russia ken Korea.

Ania ti klase ti panagturay/gobierno kadagitoy a pagilian? Saan kadi a komunismo?  Siempre no adu ti agtaud a tulong kadagiti naagapad a pagilian, saan a didanto met diktaran ti taray ti pagiliantayo. Saantayo a sigurado iti gagemda iti pagiliantayo. Kitaen laengen ti agdama a situasion iti West Philippine Sea.

Iti komunismo, wen, adda dayta adbokasiana a panagpapatas iti pannakaiwaras ti pagimbagan, ti gameng ti pagilian. Awan ti maudi wenno awan ti marigrigat.

Agpayso a simmalun-at ti ekonomia dagitoy aglalo ti Tsina ta makita itan ti nagdadakkelan a pasdekda ken immadu ti negosio. Ngem saan met a pudno nga adda panagpapatas ti pannakaiwaras dagiti “gameng.” Riniwriw latta met dagiti marigrigat iti pagilianda ket nakarkaroda pay ngem iti karirigatan kadagiti kakabsattayo ditoy.

No masukatan ngarud ti klase ti pagiliantayo— Demokratiko nga agturong iti Komunismo— kasano pay ti agbalinto a biag dagiti sumarsaruno a henerasion? Ania pay ti pagbanagan ti tunggal umili?

Mapukaw dagiti adu nga ahensia ti gobierno. Ngarud, adu ti maawanan iti panggedan. Rigat latta, kasta la ketdi ti mabalin a mapasamak.

Kristianismo ken demokrasia, dua a napapateg a gameng ti pagiliantayo. Nakain-inaka ti mabalin a mapasamak no mapukawtayo dagitoy. Nakaad-adu a pagilian ti umap-apal kadatayo gapu kadagitoy a gameng. Ngem no mapukaw , ania pay ti turongentayo?

Kas maysa a makipagili, masapul ti panagbalin a naridam. Tingitingen dagiti pasamak. Irupir ti ammo a nainkalintegan. Saan a baybay-an nga agari dagiti makailuod, makaidagem nga aramid. No kasapulan, saan a bumdeng a mangyikkis iti adda a karirikna.

Iti met agdama a gobierno, tingitingenna koma a naimbag dagiti ania man nga iwayatna nga addang ken sawenna iti internasional a gimong—no makadadael iti kinnayammet a nabayagen a nabukel wenno makapadur-as daytoy.

Ta iti udina, datayo nga umili met laeng ti agsagrap iti ania man nga ibunga ti aramid/aramiden dagiti lidertayo.

Ditayo ngarud ipalubos a mapukaw dagiti gamengtayo a kas pagilian.#