Dentista, nars, nahold-ap iti klinika

VIGAN CITY – Sinerrek ti dua a lalaki ti maysa a klinika sada kinurimes ti selpon ken kuarta dagiti empleado idi aldaw ti Oktubre 28.

Nagpulong iti polis da Charinelle Sy y Pacis, 32, naasawaan, dentista, ken residente iti Zone 1, Bantay, Ilocos Sur ken ni Camille Mendoza y Bernales, 25, awanan asawa, nars, ken residente iti Barangay Pantay Daya, Vigan City a natakawanda iti kuarta ken selpon iti uneg ti klinika a pagtrabahuanda

Segun kadagiti biktima, madama nga agtrabtrabahoda iti uneg ti Jurado Dental Clinic a masarakan iti Bonifacio Street, Barangay 1, Vigan City idi agarup 10:30 ti bigat ti Oktubre 28 idi dua a lalaki ti simrek sada nangiruar iti patadem ken binallaagan ida.

Kinurimes dagiti suspek ti tallo a selpon nga aggatad iti P5,000.00 manipud ken ni Mendoza ken P1,760.00 manipud ken ni Charinelle sada naglibas a nagpaamianan.

Kinuna ti polis a rebioenda ti CCTV camera a naipasdek iti asideg ti crime scene para iti pannakabigbig dagiti mannanakaw.

Immun-una ngem daytoy, naireport idi Oktubre agsapa ti Oktubre 25 a sinerrek dagiti di nabigbig a tattao ti balay ni Rustico Bagcal y Agatep, 66, ken residente iti Barangay San Julian Sur, Vigan City.

Iti panagimbestiga dagiti polis, nakastrek dagiti mannanakaw iti uneg ti balay babaen ti panangputedda iti interlink nga alad iti amiananen a paset ti balay ken panangikkatda iti steel grills ti sliding window iti abagatan a paset sada simrek iti guest room iti umuna a kadsaaran ken iti kuarto iti maikadua a kadsaaran.

Natakaw iti balay ni Bagcal iti innem a relo, assorted nga alahas, tallo a selpon, canon camera, anteohos, kuarta nga agdagup iti P4,000.00, 2 a bungkos ti tulbek ti balay, ken motorsiklo nga agdagup amin iti sumurok kumurang P129,000.00.

Mapapati a nagna dagiti mannanakaw iti sango a ridaw iti balay a nangbagkat iti tallo a kahon ti steel cabinet a mapapati a naggianan dagiti tinakawda.

Narekobre dagiti polis iti uneg ti balay ti maysa a plais a mapapati nga inaramat dagiti mannanakaw iti panangputedda iti interlink.

Di pay ammo ti kinasiasino dagiti nagisayangkat iti panagtakaw iti balay ni Bagcal.#