Department heads, di mapalubosan a dumatag iti sangguniang bayan no mapaayabanda

SINAIT, Ilocos Sur – Awan pay makabulan manipud panagtugaw dagiti kabarbaro nga opisial ditoy nga ili, mapaspasimadan ti panagbangga ti opisina ti ehekutibo ken ti sangguniang bayan ditoy.

Nagramut daytoy iti maysa a memorandum nga impatulod ni Mayor Marlon Ines kadagiti hepe dagiti departamento idi Hulio 2 a nangibilinanna a mangalada pay nga umuna iti pammalubos kenkuana sakbayda a dumatagda iti sangguniang bayan no mapaayabanda.

Sabali laeng ti surat ni Ines nga impatulodna ken ni Vice Mayor Glenn Guzman mainaig iti nasao a memorandum.

Mapapati a kangrunaan a nagbatayan ni Ines iti pammilinna ti panagsina ti bileg ti ehekutibo ken ti lehislatibo.

Ngem iti privilege speech ni Konsehal Romel Dayoan itay nabiit, kinuestionaranna ti naipalaon iti memorandum ni Mayor Marlon Ines a mangiparit kadagiti department heads a dumatag no mapaayabanda iti sangguniang bayan no awan ti pammalubos ti mayor.

Kinuna ni Dayoan nga addan dagiti sumagmamano a kaso a nangiyetnagan ti Korte Suprema iti desision a masapul nga adda natibker a rason iti pannakaipakat ti executive privilege.

Kinuna pay ti konsehal  a labsingen ti nasao a memorandum ti sumagmamano a probiso ti 1987 Constitution, kas iti Article 11, Section 1, Article 2, Section 28, ken ti Article 3, Section 7.

Sagudayen ti Article l1, Section 1 a “public office is a public trust” ket amin a public officers ken empleado ket iti amin a tiempo, akauntableda kadagiti umili…

Ibagbaga met ti Article 2, Section 28 a ….nga adaptaren ken iyimplementar ti Estado ti polisia a sibubukel a pannakaibaskag amin dagiti transaksionna a pakainbolbaran iti interes ti publiko.

Iti sabali a bangir, sagudayen ti Article 3, Section 7 a marekognisar ti kalintegan dagiti tattao iti impormasion kadagiti banag a pakaseknan ti publiko ket maipaay kadagiti umili ti access kadagiti opisial a rekord, dokumento ken pappapeles pakainaigan dagiti official acts, transaksion wenno desision….

Kinuna ti konsehal a rumbeng laeng a mapalubosan dagiti department heads a dumatag iti sangguniang bayan no mapaayabanda uray awan pammalubos ti mayor idinto nga impatalgedna nga itandudoda ti pannakarespeto dagitoy no agparangda iti session.

Kinuna ni Vice Mayor Glenn Guzman a maikkan amin dagiti department heads iti kopia ti privilege speech ni Dayoan.#